Wiicela nnoonaahu otokweene vaavaa mmusi naari nthamwene oniikariweiye mmulokoni nthowa na ohicharuwa yoocheka. Mukhalelo nnaakhulelaahu ohoolela wa Piipiliya mmwaha yoola onnooniherya wunnuwa wa osivela wahu wa Muluku ni wiiwelela wahu marehereryo awe. * Muthokororye makoho anakhumelela mmwaha yoola.

Nnaphwanela omukhaliha hai muchu iikariwe? Piipiliya onnaloca: “Muhátáneno, khwino mukina aweriwa munna ári mulipa-oraruwa, akhweya anrima, nari óthamala sophwaniherya, nari ónyemula, nari ówuryasha, nari awákha, nari olyano awihiha, hoe.” (1 Akorinto 5:11) Vooloca sa yaawo “ahinítchála m’mahusiheryo a Kristu” ninnaalakhanya: “Muhimwákheleru m’mpa, nave muhimulocheleru. Ntakhara yowo onamulochela onnátánano miteko awe yonanara.” (2 Yohane 1:9-11) Hiyaano hannapaka onthamwene woomunepani naari weemusi ni yaale yiikariwe. Mulipeleli (em português) 15 a Setempuru a 1981, epaaxina 25 onnaloca: “Pahiru oloca ‘mooni’ wa muchu onnapaceryiha ovaanela naari akhweya opaceryiha onthamwene. Apwanne naahaala ochuna weerano yeeyo ni muchu iikariwe mmulokoni?”

Osepa moomalela ti woochuneya chiryene? Aai, wa mathowa mancipale. Noopacerya, owo mwaha wa omwiiwelela Muluku ni Masu awe. Ninnamwiiwelela Yehova ohiya pahiru wakhala wookhweya nyenya tho naamwi weerano yeeyo eri yoovila. Omusivela Muluku onnaneeriha okhapelela malamulo awe, nsuwelaka wi owo teekhaikhai ni oosivela nave wi malamulo awe annakumiherya mphurelo wawaaca. (Yesaya 48:17; 1 Yohane 5:3) Nanaawiili, ohaataanano mulipa oocheka ennanaakiha nave ennaakiha muloko woothene onanarihiwa omunepani ni meecelo nave ennakhapelela  ncicimiho na muloko. (1 Akorinto 5:6, 7) Naneeraru, wiiwelela wahu malakiheryo a Piipiliya enahaala tho omukhaviherya awiikariwa owo. Moorweela wa wiiwelela yoolakelela ya nikhuuru na othoriha, munanwerya otannya murima wa namacheka yoowo nlelo onnaviliwa waakhulela wiilipixerya wa atokweene omukhaviherya. Oyeleela onthamwene wasisapo onahaala omukhaviherya namacheka wi ‘isupuwelele’ ni woona wunnuwa wa yoocheka awe, nave opaka marehereryo a omukookela Yehova.—Luka 15:17, BNM.

Hanka wakhala wi mmusi ohiikariwa? Mmukhalelo yoola, amusi anamukhalano yaweeha etokweene ya ororomeleya. Nnii nimukhalihe hai mmusi iikariwe? Hinnawerya oloca mikhalelo soothene inahaala okhumelela va yoolaleeryiwa yeela, nyenya hankooni nthokororye mikhalelo miili sookhweleya.

Mmikhalelo mikina, mulipa awiikariwa akhweya nlelo onakhala veechokoni vamoha ni amusi. Wiikariwa honanyaanya emusi, mwa yeeyo miteko ni olocihana wa nihiku nnihiku wa amusi onaphwanela otitelela. Nyenya, nthowa na meecelo awe, mulipa awiikariwa othanlile onanariha waataana wawe woomunepani aareiyeno ni emusi. Mwawiihiiha amusi oororomeleya hanaphwanela wuuka miyaha soomunepani ni mulipa awiikariwa. Ntoko yootakiherya, wakhala wi mulipa awiikariwa ori vaava elukuluku emusi enathukumanaaya wi epake malapelo eechoko owo hanaphwanela opaka makupa. Nyenya, wakhala wi mulipa awiikariwa mwaana mukhaani, asitiithi nlelo aakhalano murici wa omuhusiha ni omulaka. Mwa yeeyo, ntoko asitiithi oosivela anaphwanela opaka marehereryo a weeciha yoohuserya ya Piipiliya ni mwaana. *—Masiposipo 6:20-22; 29:17.

Mmukhalelo mukina, mulipa awiikariwa ori mmusi akhweya onakhala ocai wa emusi. Naamwi mu ilukuluku ikina akhweya onahaala ochuneya othokororya miyaha  sa emusi ni muchu iikariwe, olocihana weiwo onaphwanela okhalano mphimo. Achu oororomeleya a emusi Yeekiristu haniikuphelela wi ekhaleno ovaanela ni mmusi iikariwe yoowo ohinakhala va echoko emohamoha. Opwaha yeeyo, ororomeleya wa Yehova ni marehereryo awe onanweriha ochara malakiheryo a Piipiliya yaawo aniiwanana ni wiikariwa. Mukhalelo aya woororomeleya onnatannya murima wa mulipa awiikariwa nave tho onahaala omukhaviherya okumihavo mphurelo olaka aakhenleiye. *—Ahepri 12:11.