Ovipuka ovinyingi vipondola okutunumanesa mahi tyitunumanesa vali okutala ombunga ine epanga lietu wapolua mewaneno mokonda yokualinga onkhali onene iya ehelivele. Onkhalelo tutala ehongolelo Liombimbiliya konthele yotyipuka otyo ipondola okulekesa ohole yetu na Huku noukuatyili movitumino viae. * Tala omapulo amwe alingwa konthele yotyipuka otyo.

Oñgeni tuna okukala nomunthu wapolua mewaneno? Ombimbiliya yati: “Yekeipo okuliwaneka na kese umwe utiwa omukuatate, mahi ulinga oundalelapo, ine welulu, ine omunthu ufenda ovikahuku, ine wokutukana, ine onkholwa, ine wokupunda viamuene. Muhaliei nomunthu watyo oo.” (1 Coríntios 5:11) Konthele yomunthu “uhatualako melongeso lia Kristu,” tutanga okuti: “Muhemutambulei momaumbo enyi, nii muhemukukunyei. Mokonda una umukukunya, ukahi nokulinga onthele movilinga viae ovivi.” (2 João 9-11) Onthue katulingi oupanga nomunthu wapolua mewaneno, tyilinge movilinga viopaspilitu, ine movitalukiso. O A Sentinela 15 ya Dezembro yo 1981, pefo 21, yati: “Okukukunya” omunthu ondyila pala okutomphola ine okulinga oupanga. Okuti tuhanda okulinga oupanga nomunthu wapolua mewaneno?”

Okuti tyesukisa okulityilika okupopia nomunthu wapolua mewaneno mononkhalelo ambuho? Yoo, mokonda yomahunga omanyingi. Tete, okulinga ngotyo tulekesa oukuatyili na Huku Nondaka yae. Katutavela ku Jeova tyina tyapepuka, mahi tupu natyina tukahi movitateka. Ohole na Huku itulunda okutavela ovitumino viae aviho, okuimbuka okuti oe omuviuki nokuna oluembia, iya ovitumino viae vivatela vana vemuumbila. (Isaías 48:17; 1 João 5:3)  Vali, okuhapopi nomunthu walinga onkhali uhelivele tyitutyilika opo tutualeko novituwa oviwa atuhasilisa ewaneno. (1 Coríntios 5:6, 7) Tatu, okutualako tyapama movitumino Viombimbiliya tyivatela omunthu wapolua mewaneno. Tyina tutavela etokolo lialingwa novakulu vewaneno, matukuatesako omunthu walinga onkhali uhetavelele ombatelo yovakulu vewaneno. Okuhalingi vali oupanga novanthu ehole hamwe tyimukuatesako okulivela nokutala okuti otyipuka alinga tyapenga iya alingi omapiluluko opo akale vali noupanga na Jeova.—Lucas 15:17.

Inkha omunthu wapolua mewaneno ombunga yetu? Inkha omunthu walinga onkhali ombunga yetu okulinga oupanga nae tyipondola okulola oukuatyili wetu. Oñgeni tuna okukala nombunga wapolua mewaneno? Katupondola okupopia ovitateka aviho vipondola okumoneka konthele oyo, mahi matupopi ovitateka vivali viakolela.

Mononkhalelo mbumwe, ombunga wapolua mewaneno hamwe nkhele tukala nae meumbo like. Mokonda omunthu wapolua mewaneno nkhele ombunga yetu, ovilinga via kese nthiki mombunga nomatompho apondola okutualako. Mahi, mokonda yovituwa viae, omunthu wapolua mewaneno waholovona okunyona oupanga ankho ena nombunga. Ngotyo, ovanthu ovakuatyili mombunga kavapopi vali nae ovipuka viopaspilitu. Mongeleka, inkha omunthu wapolua mewaneno ukalapo tyina ombunga yeliongiya pala efendelo liombunga, kapondola okupopia natyike. Mahi, inkha omunthu wapolua mewaneno omona omututu, ovohe nkhele ovo vena okumulongesa . Moluotyo, mokonda ovohe vena oluembia, vapondola okulongesa omona Ombimbiliya. *—Provérbios 6:20-22; 29:17.

Tupu, hamwe omunthu wapolua mewaneno ombunga yetu mahi katukala nae meumbo like. Namphila pamwe  tyesukisa okutomphola otyipuka tyelikuata nombunga nomunthu wapolua mewaneno, muhatompholei ehimbwe. Ovakristau vekolelo valinga onthele yombunga kavaovola omahunga okutomphola nomunthu wapolua mewaneno uhakala navo meumbo like. Mahi, oukuatyili na Jeova neongano liae tyivelunda okulandula ovitumino Viombimbiliya vipopia konthele yomunthu wapolua mewaneno. Oukuatyili wavo maukuatesako omunthu wapolua mewaneno okupola esilivilo keviyulo apewa. *—Hebreus 12:11.