Saa bɛtu yɛ nwo sonla anzɛɛ yɛ gɔnwo kpalɛ bie mɔɔ yeyɛ ɛtane na yeannu ɔ nwo la bɛfi asafo ne anu a, ɔmaa yɛdi nyane kpole. Kɛzi yɛdi edwɛkɛ ɛhye anwo adehilelɛ mɔɔ wɔ Baebolo ne anu azo la kola maa bɛnwu Nyamenle anwo ɛlɔlɛ mɔɔ yɛlɛ nee nɔhalɛ mɔɔ yɛdi yɛmaa ye ngyehyɛleɛ ne la. * Suzu edwɛkɛ ɛhye anwo kpuyia bie mɔ mɔɔ bɛbiza la anwo nea.

Kɛzi ɔwɔ kɛ yɛyɛ awie mɔɔ bɛdu ye la ɛ? Baebolo ne ka kɛ: “Bɛ nee awie biala mɔɔ fɛlɛ ɔ nwo Keleseɛnenli na ɔbɔ [nla nwo ɛbɛlatane], ɔle anyebolo, ɔsonle awozonle, ɔ nloa ɛdendɛlɛ ɛnyɛ fɛ, ɔle nzanli anzɛɛ ɔle awule la mmatu. Bɛ nee sonla zɛhae mmatɛnla ɛkponle nwo bɔbɔ di debie.” (1 Kɔlentema 5:11) Bɛha “awie biala mɔɔ ɛnli Kelaese ngilehilelɛ ne azo” la anwo edwɛkɛ kɛ: “Bɛmmadie ye bɛkɔ bɛ azua nu; bɛmmayɛ ye akoaba bɔbɔ. Ɔluakɛ awie biala mɔɔ kɛlie ye la nee ye yɛ adwenle wɔ ye ninyɛndane ne mɔ ɛyɛlɛ nu.” (2 Dwɔn 9-11) Yɛ nee menli mɔɔ bɛdu bɛ la ɛnli sunsum nu ninyɛne nwo adwelie anzɛɛ yɛ nee bɛ ɛmbɔ nu ɛnyɛ debie. The Watchtower September 15, 1981, mukelɛ 25 ne hanle kɛ: “‘Ahye’ mgbane mɔɔ yɛbabiza awie la bahola ahakyi adwelielilɛ na bie bɔbɔ a yeayɛ agɔnwolɛvalɛ. Asoo yɛkulo kɛ yɛbiza awie mɔɔ bɛdu ye la ahye na yɛmaa agɔnwolɛvalɛ zɛhae bɔ ɔ bo?”

Asoo amgba ɔhyia kɛ yɛtwe yɛ nwo bɔkɔɔ? Ɛhɛe, ɔlua ndelebɛbo bie mɔ ati. Mɔɔ lumua la, ɔfane nɔhalɛ mɔɔ yɛdi yɛmaa Nyamenle nee ye Edwɛkɛ ne la anwo. Tɛ mekɛ mɔɔ ɔnyɛ se la anu angomekye a yɛtie Gyihova a, yɛtie ye noko wɔ mekɛ mɔɔ zɔhane ɛyɛlɛ bɔbɔ yɛ se kpalɛ la anu. Nyamenle anwo ɛlɔlɛ ka yɛ maa yɛdi ye mɛla ne kɔsɔɔti azo, yɛdie yɛto nu kɛ ɔle pɛlepɛle yɛɛ ɔlɛ ɛlɔlɛ na ye mɛla ne mɔ boa yɛ kpalɛ kpalɛ. (Ayezaya 48:17; 1 Dwɔn 5:3) Mɔɔ tɔ zo nwiɔ, saa yɛtwe yɛ nwo yɛfi ɛtanevolɛ mɔɔ ɔnnu ɔ nwo la anwo a, ɔngua gyinlabelɛ mɔɔ yɛlɛ wɔ Nyamenle anyunlu nee yɛ ɛbɛlabɔlɛ nwo evinli na ɔmaa duma kpalɛ mɔɔ asafo ne lɛ la tɛnla ɛkɛ. (1 Kɔlentema 5:6, 7) Mɔɔ tɔ zo  nsa, yɛfa Baebolo ne anu ngyinlazo yɛdi gyima bɔkɔɔ a ɔbahola yeaboa ahenle mɔɔ bɛdu ye la. Saa yɛdie edwɛkɛlilɛ kɔmatii ne kpɔkɛzilɛ ne yɛto nu a, ɔbahola yeaha ɛtanevolɛ ne mɔɔ ɛkpo kɛ ɔkɛlie mɔdenle mɔɔ mgbanyima ne mɔ ɛlɛbɔ aboa ye ado nu la ahonle. Saa agɔnwolɛvalɛ mɔɔ sonle bolɛ mɔɔ ɔ nee ye alɔvolɛ lɛ la bɔ ye a “ye adwenle bara ɔ nwo zo,” yeanwu ɛtane kpole mɔɔ yeyɛ la na yeadu nwolɛ agyakɛ mɔɔ bamaa yeazia yeara Gyihova ɛkɛ la.​—Luku 15:17.

Na saa bɛtu yɛ busuanli bie ɛ? Saa ɔba ye zɛhae a, agɔnwolɛvalɛ kpole mɔɔ la yɛ avinli wɔ abusua ne anu la bayɛ nɔhalɛlilɛ nwo sɔnea kpole amaa yɛ. Kɛzi ɔwɔ kɛ yɛyɛ busuanli bie mɔɔ bɛdu ye la ɛ? Yɛnrɛhola yɛnrɛha edwɛkɛ biala mɔɔ bazi la anwo edwɛkɛ wɔ ɛke, noko bɛmaa yɛhwe yɛ adwenle yɛhɔ nwiɔ mɔɔ hyia la azo.

Bie a ɛnee abusua ne anu sonla ne mɔɔ bɛdu ye la wɔ sua nu ɛkɛ ne bie. Kɛmɔ ye ɛdulɛ ne ɛngile kɛ bɛye ye bɛvi abusua ne anu la ati, yɛbahola yɛ nee ye ahɔ zo ayɛ alehyenlɛ biala gyima mɔɔ yɛyɛ wɔ abusua ne anu la. Noko, ɔlua ɛbɛla mɔɔ yebɔ la ati, yehwe ɔ nwo yevi sunsum nu agɔnwolɛvalɛ mɔɔ la ye nee ye abusua ne anu amra mɔɔ le diedima avinli la anwo. Yemɔti abusua ne anu amra mɔɔ di nɔhalɛ la nee ye ɛnrɛhola ɛnrɛdu wɔ sunsum nu bieko. Kɛ neazo la, saa ahenle mɔɔ bɛdu ye la wɔ ɛkɛ, na abusua ne ka bɔ nu kɛ bɛyɛ abusua ɛzonlenlɛ a, ɔnrɛyɛ bie. Noko akee, saa ahenle mɔɔ bɛdu ye la le kakula a, ɔle awovolɛ ne mɔ gyima kɛ bɛkɔ zo bɛkilehile ye na bɛtenrɛdenrɛ ye. Ɛhye ati, awovolɛ mɔɔ bɛlɛ ɛlɔlɛ la bɛahola ayɛ ngyehyɛleɛ na bɛ nee kakula ne azukoa Baebolo ne. *​—Mrɛlɛbulɛ 6:20-22; 29:17.

Ɔdwu mekɛ ne bie noko a, ɛnee abusua ne anu sonla ne mɔɔ bɛdu ye la ɛnde sua nu ɛkɛ ne bie. Bie a ɔyɛ a bɛbahola bɛ nee ye ali ngitanwo wɔ mekɛ ekyi bie anu bɛava bɛali abusua ne anu edwɛkɛ bie mɔɔ hyia la anwo gyima ɛdeɛ, noko ɔwɔ kɛ bɛte mekɛ dodo mɔɔ bɛ nee ye di ngitanwo la azo. Keleseɛne abusua nu amra mɔɔ di nɔhalɛ la ɛnva edwɛkɛ ɛnye bɛ nloa na bɛ nee abusua ne anu sonla mɔɔ bɛdu ye na ɔnde sua nu ɛkɛ ne la  ɛnli ngitanwo. Emomu, nɔhalɛ mɔɔ bɛdi bɛmaa Gyihova nee ye ahyehyɛdeɛ ne la ka bɛ maa bɛdie Ngɛlɛlera ne anu ngyehyɛleɛ mɔɔ bɛdua zo bɛtu awie la bɛto nu. Bɛ nɔhalɛlilɛ ne baha ɛtanevolɛ ne ahonle kpalɛ na yeaboa ye yeamaa yeahola yeanyia nvasoɛ yeavi ɔ nyunlu mɔɔ bɛhwi la anu. *​—Hibuluma 12:11.