Anchatam llakikunchik amistadninchik otaq ayllunchik huchanmanta mana wanakusqanrayku congregacionmanta qarqochikuptinqa. Chayna pasaptin Bibliapa nisqankunata imayna qawasqanchikmi rikuchinqa Diosta kuyasqanchikta hinaspa kamachikuyninta respetasqanchikta otaq manapas. * Chaynaqa, yachasunchikyá congregacionmanta qarqochikuqkunata imayna qawanamanta.

¿Hukllawakunachu congregacionmanta qarqochikuqkunawan? Bibliam nin: “Nirqaykichikqa ‘Wawqem kani’ otaq ‘Panim kani’ nispa huchapakuqkunawan, qollqella kuyaqkunawan, taytacha-mamacha adoraqkunawan, cuento qepikunawan, sinkakuqkunawan hinaspa suwakunawan mana hukllawanakunaykichikpaqmi. Chaykunawanqa amam kuskapas mikunkichikchu”, nispa (1 Corintios 5:11). Bibliaqa niwanchiktaqmi: ‘Jesucristopa yachachikuyninkunallapi mana takyaqtaqa [...] amayá chaskiychikchu nitaq “yaykukamuy” niychikchu. Pipas “yaykukamuy” niqqa [otaq saludaqqa] mana allin ruraqmasinñam rikurirun’, nispa (2 Juan 9-11). 1981 watapi 15 de noviembre La Atalaya nisqa revistapa 19 paginanpim nin: “¡Imaynallam! nisqallanchikwanmi piwanpas rimaytaña qallaykuchwan hinaspa amistadtapas rurachwan. ¿Munachwanchu congregacionmanta qarqochikuqta rimaykuyllatapas?”, nispa. Chaynaqa congregacionmanta qarqochikuqwanqa manam imapaqpas hukllawakunchikchu.

¿Manachu imapipas hukllawakunanchik? Manapunim, achka razonrayku. Punta kaq, Jehová Diosta hinaspa Palabranta kasukusqanchikraykum. Jehová Diosta anchata kuyaspanchikmi kasukuytapuni munanchik sasa kaptinpas. Yachanchikmi kuyakuq hinaspa allin ruraq kasqanta, yachanchiktaqmi lliw kamachikuyninkuna allinninchikpaq kasqantapas (Isaias 48:17; 1 Juan 5:3). Iskay kaq, huchallikuqwanqa manam hukllawakunchikchu mana allin amistad kasqanrayku. Mana hukllawakuspanchikmi  Diospa agradonpaq hina kawsakuyninchikta hinaspa paywan amistadninchikta yanqacharunanmanta cuidakunchik, cuidanchiktaqmi congregacion penqaypi kananmantapas (1 Corintios 5:6, 7). Kimsa kaq, congregacionmanta qarqoptinkuqa huchallikuqpa allinninpaqmi kanman. ¿Imaynanpi? Bibliapa kamachikuyninkunata hinaspa hucha ruraqta atiendeq ancianokunapa tanteasqanta respetaspaqa ichapas yanapachwan huchallikuqtaqa, payqariki manam kasukurqachu ancianokunapa consejasqanta. Arí, chayna rurasqanchikqa yanapanmanmi cuentata qokuspan cambiananpaq. Huchallikuqqa, amistadninkunawan allin tarikusqanta yuyarispanmi allintaña ‘piensanman’ hinaspa mana allin rurasqanmanta cuentata qokuspan Jehová Diosman kutirikunman (Lucas 15:17).

¿Imatam rurachwan familianchik qarqochikuq kaptinqa? Diosman sonqo kasqanchikqa pruebasqam kanman congregacionmanta qarqochikuq familianchik kaptin. Chayna kaptinqa, ¿imaynatam qawananchik congregacionmanta qarqochikuqta? Qatiqninpim yachasunchik iskay asuntomanta.

Wakinpiqa qarqochikuqmi familianwan kuska yachan. Chaymi wakin familiaqa hinalla saqenku paykunawan kananta, hinaspa wasipi ima ruraypipas yanapakunanta. Ichaqa Diosman sonqo kasqankuraykum yupaychasqankupiqa huchallikuqwanqa mana hukllawakunankuchu, huchallikuqqariki Diostam qepancharun. Familianqa saqenmanpaschá Biblia estudiasqankupi kananta ichaqa upallallam uyarinan. Qarqochikuq warmallaraq kaptinqa tayta-mamanmi Bibliamanta estudiota qonman, paykunaqariki hinallam nanachikunku wawa-churinmantaqa (Proverbios 6:20-22; 29:17). *

Qarqochikuq, ¿familianwan mana yachaptinqa? Chayna kaptinqa familiapi ima asuntotapas atiendenapaq kaptillanmi Diosman sonqo cristianokunaqa qarqochikuqwan huñunakunmanku. Manam yanqapuniqa huñunakunkuchu. Diosman sonqo kaspanku hinaspa llaqtanpi takyayta munaspankum huchallikuq  corregikunanpaq Bibliapa imam nisqanta kasukunku. Qarqochikuqpa allinnintam munanku chaymi Bibliapa imam nisqanta kasukuspanku huchallikuq corregikunanpaq yanapanmanku (Hebreos 12:11). *