Anchatan llakikunchis familianchis otaq amigonchispas huchankumanta mana kutirikuqtinku Diospa llaqtanmanta qarqosqa kasqankuta rikuspa. Bibliapiqa kanmi kamachikuykuna qarqosqakunata imayna qhawarinanchispaq. Chay kamachikuykunata kasukusqanchispin rikuchisun Jehová Dios munakusqanchista kasukuq kasqanchistapas. * Chaypaq qhawarisun kinsa tapukuykunamanta.

¿Huñunakusunmanchu Diospa llaqtanmanta qarqosqa runawan? “Mayqenpas ‘Diospi iñiqmi kani’ nishaspa qhelli huchapi purishanman, otaq payllapaq kananta munaqpas kanman, ídolo yupaychaqpas kanman, millay k’amiqpas kanman, machaqpas kanman, suwapas kanman chayqa, ama chay hina runawanqa huñukuychischu, amapuni chay hina millaywanqa kuskapas mikhuychischu.” (1 Corintios 5:11.) Huk texton kayta niwallanchistaq: ‘Pipas Cristoq yachachikuyninpi mana takyaqtaqa [...] ama [...] wasiykichispi chaskiychischu, amataq allin hamuytapas qoychischu. Pipas payta allin hamuyta [griegopi kjáiro] qospa chaskiykuqqa mana allinkunata ruwaqmasinñan kapun’, nispa (2 Juan 9-11). 1981 watamanta 15 noviembre killamanta La Atalaya revistapi 19 paginapi nin: “Huk runata ‘allillanchu kashanki’ nispallapas nisunman chayqa parlatan tupachisunman otaq qhepaman amigontinpas kasunman. Chhaynallataqmi kanman Diospa llaqtanmanta qarqosqa runawanpas”, nispa. Chayraykun paykunawanqa manapuni iñiyninchismanta nitaq imamantapas rimananchischu.

¿Manapunichu ima kaqtinpas chay runawan hukllachakusunman? Manapunin, ¿imarayku? Ñawpaqta, Jehová Diosta Simin Qelqatawan kasukunanchisrayku. Diostan tukuy sonqomanta munakunchis chaymi sasaña kaqtinpas payllata kasukuyta munanchis. Chaymantapas yachanchismi chanin Dios, munakuq Dios kasqanta, kamachikuyninkuna allinninchispaq  kasqantapas (Isaías 48:17; 1 Juan 5:3). Iskaypi, huchanmanta mana kutirikuq runaqa samaykuwasunmanmi. Chayrayku kawsayninchispi iñiyninchispipas ch’uya kanapaqqa manapuni paykunawan huñunakunanchischu, chaywanmi Diospa llaqtantapas allinta qhawarichisun (1 Corintios 5:6, 7). Kinsapi, huchallikuqpa allinninpaqmi kanman. ¿Imaynapi? Paytaqa ñan umalliqkuna yanapanña, chaymi Bibliapi kamachikuykunata kasukuspa umalliqkunaq decidesqankutapas yanapakuspaqa huchallikuqtan yanapasun yuyayman kutinanpaq. Arí, manaña rimaykusunchu chayqa sonqontan kuyurichisunman yuyaykusqanta t’ikrapunanpaq. Munakusqan runakuna paymanta t’aqakapusqankuta rikuspan ‘yuyayninman’ kutinman, huchanta reqsikuspataq Jehová Diospa llaqtanman kutinpunman (Lucas 15:17).

¿Chay qarqosqa runa familianchis kanman chayri? Chhayna kanman chayqa, yaqapaschá sasa kanman Jehová Diospa kamachikusqanta kasukuy. ¿Imaynatan payta qhawarisunman? Askhan kan chaymanta yachanapaq, kunanmi ichaqa iskayllamanta yachasun.

Yaqapaschá chay qarqosqa runa kanman qosapas, warmipas otaq mayqen churipas. Chhayna kanman chayqa manan mayqenninkupas qarqosqa kasqankuraykuchu wikch’unakunanku. Ichaqa kikillanmantataq huchallikuspa Diospa llaqtanmanta qarqochikun chayqa, manapunin paywanqa Diosmanta rimanankuchu, chaywanmi rikuchinqaku ñawpaqta Dios munakusqankuta. Familiantin Diosta yupaychashaqtinkupas chaypin kanman ichaqa manan rimarinanchu. Tayta mamakunaqa yachachinankun makillankupiraq kaq wawankuta, chaymi mayqellanpas qarqosqa kanman chaypas Diospa Siminta yachachishanallanku (Proverbios 6:20-22; 29:17). *

¿Qarqosqa runa familianmanta sapaqpi tiyanman chayri? Chhayna kaqtinqa familiamanta imapas rimana kallaqtinmi cristianokunaqa paywan huñunakunanku. Manan yanqa qasichu  imapas tunpalla paywan huñunakushananku. Jehová Diosta munakusqankurayku llaqtantapas kasukusqankuraykun paykunaqa familiankupi qarqosqa runa wanachiyta allinpaq qhawarinku. Qarqosqa runaq allin kanantan munanku. Diospa kamachikusqanta kasukuspaqa yaqapaschá huchallikuq familiankuta yanapankuman Diosman kutirikunankupaq. *