Fiixinke woyi mittu lubbote jaalinke loosino cubbira maaro ea giwe songotenni bohamiro lowonta xissiisanno. Qullaawu Maxaafi tenne hajo lainohunni aanno biddishsha ayirrisanke woyi ayirrisa hooganke, Magano mageeshshi geeshsha banxeemmoronna isi assino qixxaawo mageeshsha dagganfeemmoro leellishshanno. * Tenne hajo lainohunni hanni mite mite xaˈmo laˈno.

Bohamino manchi ledo hiittoo xaadi heeˈrankera hasiisanno? Qullaawu Maxaafi togo yaanno: ‘Ammanino manni giddo mittu foorannoha, woyi woxe yogorannoha, woyi kakkalo kakkalannoha [“kaphphu maganna magansiˈrannoha,” NW], woyi xonamannoha, woyi dimbannoha, woyi manna mulqiˈrannoha ikkiro, isi ledo sumuu yitinoonte. Hattoore assannohu ledo sagale nafa ittinoonte.’ (1 Qorontoosi 5:11) Maganu Qaali, ‘Kiristoosi rosinni kaajje’ uurrannokkiha ayee manchono “wosinchimma adhitinoonte, keere nafa haadhinoonte” yaannonke. ‘Hakkuno mayiraati? Keere haaˈrannosihu bushu loosisi beeqqaancho ikkannohuraati.’ (2 Yohaannisi 9-11) Songotenni bohantinori ledo ayyaanaamitteteno ikko dagoomittete xaadi diheeˈrannonke. Tenne hajo lainohunni Wocawaaro 15, 1981 Agarooshshu Shae qoola 25 aana togo yitanno: “Mitto mancho haranchunni ‘Keereho?’ yaa nafa hasaawu widira soorrantaranna hakkiinni nafa saˈe jaaloomu widira massitara dandiitannote umi qaafooti. Bohamino manchi ledo xaadissannonketa tenne umi qaafo adha hasiˈneemmo?”

Bohamino manchiwiinni woˈmunni woˈma xeertiˈra hakkeeshsha hasiissanno? Ee, hasiissanno; tennera haammatu korkaati no. Bohamino manchiwiinni xeertiˈranke umihunni, Maganohonna Qaalisira ammanammoommore ikkinoommota leellishshanno. Yihowara hajajammeemmohu  injaannonke wote calla diˈˈikkino; hajajama kabbaade ikkitanno woteno hajajammeemmo. Maganoho noonke baxilli, isi ayeewoteno gara ikkinore assannohanna baxillaancho ikkinota, hattono higguwasi duuchchunkunni roore xaqqantannota ikkitinota huwante, hajajosi woˈmanta ayirrinseemmo gede xixxiiwannonke. (Isayyaasi 48:17; 1 Yohaannisi 5:3) Layinkihunni, loosino cubbira maaro einokki manchiwiinni xeertiˈranke, hakko manchihu ayyaanaamittetenna amanynyootu xuri ninkewano ikko songonniwa saˈˈannokki gede assitanno; qolteno songonnihu danchu suˈmi baˈˈannota agartanno. (1 Qorontoosi 5:6, 7) Sayikkihunni, Qullaawu Maxaafiha xintu seera seekkine harunsanke, bohamino manchira nafa xaqqantara dandiitanno. Cimeeyyete bisi wossanino wussaane dagganfeemmoha ikkiro, cimeeyye iso kaaˈlate assitino sharro dunqulli asse keeshshino manchi godowisi shashshafameenna qaafo adhara dandaanno. Baxanno manni ledo noosi jaaloomi tainota afasi, “wodanisi” raga higanno gede, loosino cubbi mageeshsha kabbaade ikkinoro wodanchanno gedenna Yihowawa higate qaafo adhanno gede assitasira dandiitanno.—Luqaasi 15:17.

Bohamino manchi fiixanke ikkirona? Maatete miilla mimmitu ledo lubbora baxantanno ayiddi giddo togoori kalaqamiro, tenne maatera Yihowa higgera ammanama kabbaade ikkitara dandiitanno. Bohamino fiixinke ledo hiittoo xaadi heeˈrankera hasiisanno? Kalaqantara dandiitannotera mitte mittente ikkitora koye dawaro qola didandiinanni; ikkeennano hanni qara ikkinoha lame coye laˈno.

Mito wote bohamino manchi maatete ledo mitto mine heeˈrannoha ikkara dandaanno. Kuni manchi songotenni bohamasi maatesi ledo noosi fiixooma gatissannokki daafira, maatete ledo addi addi looso loosanni mitteenni heeˈrara dandaanno. Ikkollana, kuni manchi haˈrino haˈrinshonni ammaˈnitino maatesi ledo noosiha ayyaanaamittete fiixooma umisi tayise huˈnino. Konni daafira, Yihowara ammanammoommore ikkinoommota leellisha hasiˈnummoro, bohamino fiixinke Magano magansiˈneemmo wote tasaattafara faqqada dihasiissannonke. Lawishshaho, maate Qullaawa  Maxaafa xiinxallitanno wote bohamino manchi ledonsa ofollannoha ikkirono, tasaattafa kayinni didandaanno. Ikkollana, bohaminohu annunna amate anga nooha shiima beetto ikkiro, annahonna amate xaano iso rosiisatenna seejjate halaafinatu noonsa. Konni daafira, annunna ama beettinsara noonsa baxilli iso Qullaawa Maxaafa xiinxallisate qixxaawo assitanno gede assansara dandaanno. *—Lawishsha 6:20-22; 29:17.

Wole widoonni kayinni, bohaminohu mine baxxinohanna maatetewiinni baxxe heeˈrannoha ikkara dandaanno. Lowonta hasiissannota ayiddu hajo wonshate yine konni manchi ledo saˈne saˈne xaada dandiinanniha ikkirono, togoo xaado ajisha hasiissanno. Maganoho ammanantinori maatete miilla, xiwinoreno xiwinokkireno korkaata assite bohamino fiixinsa ledo xaadate faro dihasidhanno. Hatteentenni insa Yihowaranna dirijjitesira ammanantinore ikka hasidhanno daafira, cubbo loosse maaro eˈannokkire boha lainohunni Qullaawa Borro uyitanno biddishsha harunsitanno. Yihowara noonsa baxillinni isira ammanantinore ikkansa, bohamino manchira roorenka xaqqantara dandiitanno; hattono uyinoonnisi seejjonni roore xiqime afiˈranno gede kaaˈlitasira dandiitanno. *—Ibiraawuyaani 12:11.