Dala ruma kongregasaun tenke hasai ita-nia família ka belun tanba sira halo sala neʼebé boot no la hakribi sala neʼe. Ida-neʼe halo ita triste tebes. Maibé, kuandu ita halo tuir matadalan husi Bíblia kona-ba arranju neʼe, ita bele hatudu domin neʼebé kleʼan ba Maromak no mós laran-metin ba ninia arranju sira. * Mai ita buka-hatene matadalan ba pergunta sira neʼebé baibain mosu.

Ita bele ransu malu nafatin ho ema neʼebé kongregasaun hasai ona ka lae? Bíblia hatete: “Keta laʼo hamutuk ho ema naran deʼit neʼebé bolu an maun-alin wainhira nia laran-aat, karak-teen, adora lulik, konta ema nia vida, lanu-teen ka naʼok-teen; keta han hamutuk ho ema hanesan neʼe.” (1 Korinto 5:11) Kona-ba ema neʼebé “la horik iha Kristu nia hanorin”, Bíblia dehan: “Keta simu nia iha imi-nia uma eh kumprimenta nia, basá sé mak kumprimenta nia halo parte iha nia hahalok aat.” (2 Joao 9-11) Ita la ransu malu ho ema neʼebé kongregasaun hasai ona hodi la halimar ka hodi la koʼalia kona-ba buat espirituál. The Watchtower husi 15 Setembru, 1981, pájina 25 hatete: “Kumprimentu deʼit hanesan fó bondia bele sai hakat primeiru atu koʼalia ba malu no karik atu halo kolega ho sira. Ita hakarak ka lae, atu komesa hakat primeiru neʼe ho ema neʼebé kongregasaun hasai ona?”

Ita presiza duni atu sees an husi ema neʼebé kongregasaun hasai ona ka lae? Sin, ita iha razaun balun atu halo nuneʼe. Primeiru mak tanba ita hakarak hatudu ita-nia laran-metin ba Maromak no ninia Liafuan. Ita halo tuir Maromak Jeová laʼós deʼit kona-ba buat neʼebé fasil, maibé mós kona-ba buat neʼebé susar. Domin ba Maromak book ita atu halo tuir ninia ukun-fuan hotu, hodi fiar katak nia mak Maromak neʼebé iha justisa no domin, no fiar mós katak nia halo ninia ukun-fuan sira ba ita-nia diʼak. (Isaías 48:17; 1 Joao 5:3) Segundu, se ita sees an husi ema neʼebé la hakribi ninia sala, ida-neʼe sei proteje ita no ema seluk hodi kongregasaun bele sai moos nafatin iha Maromak nia oin iha dalan  espirituál no morál. No mós, ida-neʼe sei halo kongregasaun iha naran diʼak nafatin. (1 Korinto 5:6, 7) Terseiru, se ita hamriik metin nafatin atu tuir matadalan husi Bíblia, ida-neʼe mós bele ajuda ema neʼebé kongregasaun hasai ona. Hodi la ransu malu ho nia, ita apoia desizaun neʼebé katuas sira iha grupu tesi-lia nian mak halo ona. Ida-neʼe bele book ema neʼe nia laran atu arrepende an, maski toʼo agora nia lakohi simu konsellu husi katuas. Kuandu nia lakon ona kolega sira neʼebé diʼak, ida-neʼe bele ajuda nia atu “hanoin” hodi komprende katak nia halo ona sala neʼebé boot, no buka atu fila fali ba Maromak Jeová.—Lucas 15:17.

Oinsá se kongregasaun hasai ita-nia família rasik? Se nuneʼe, karik ita sente susar atu nafatin laran-metin ba Maromak, tanba ita hadomi ita-nia família. Kuandu hasoru problema hanesan neʼe, Ita tenke halo saida? Livru ida-neʼe la esplika kona-ba situasaun hotu-hotu neʼebé karik bele mosu, maibé mai ita koʼalia kona-ba situasaun rua.

Karik, kongregasaun hasai Ita-nia oan, inan ka aman, ka Ita-nia biin, maun ka alin, neʼebé hela hamutuk ho Ita iha uma ida deʼit. Maski nia sai ona husi kongregasaun, ida-neʼe laʼós katak nia sai husi Ita-nia família, tan neʼe Ita kontinua atu halaʼo moris loron-loron nian hamutuk ho nia. Maibé, nia deside ona katak nia lakohi atu iha relasaun nuʼudar maluk kristaun entre nia ho nia família. Tan neʼe, se Ita hakarak hatudu laran-metin ba Maromak Jeová, nia sei la hola parte iha Ita-nia atividade atu adora Maromak. Porezemplu, bainhira halibur hamutuk atu estuda Bíblia nuʼudar família, ema neʼebé kongregasaun hasai ona sei la hola parte iha estudu neʼe. Maski nuneʼe, se família neʼebé kongregasaun hasai mak labarik, inan-aman sei iha responsabilidade atu hanorin no fó dixiplina ba oan neʼe. Tan neʼe, inan-aman neʼebé hadomi nia oan bele fó estudu Bíblia ba oan neʼe. *—Provérbios 6:20-22; 29:17.

Situasaun seluk tan mak se família ida neʼebé kongregasaun hasai ona la hela hamutuk ho Ita iha uma ida. Maski dala ruma  Ita presiza duni atu hasoru ema neʼe atu koʼalia kona-ba buat ruma neʼebé importante nuʼudar família, Ita tenke kuidadu atu la hasoru beibeik ho nia. Ema kristaun neʼebé laran-metin ba Maromak la buka razaun atubele hasoru ninia família ida neʼebé kongregasaun hasai ona, neʼebé la hela hamutuk. Maibé, tanba laran-metin ba Maromak Jeová no ninia organizasaun, ema kristaun ida-neʼe hakarak atu nafatin apoia desizaun kona-ba ema neʼebé kongregasaun hasai ona. Hahalok hanesan neʼe karik sei ajuda ema neʼebé kongregasaun hasai ona atu simu dixiplina no fila fali ba Maromak Jeová. *—Ebreu 12:11.