Tuku na lu lilipuwanaw wa akxni chatum xalak kifamiliajkan o tiku lu paxkiyaw maxtukan kcongregación xlakata ni makgxtakga tuku nitlan tlawama. Pero akxni Biblia kinkamaxkiyan akgtum limapakgsin, chuna la natlawayaw nalimasiyayaw la xlilhuwa paxkiyaw Dios chu pi putum kgalhakgaxmataw xlimapakgsin. * Wa xlakata, kaʼakxilhwi tuku natlawayaw akxni wi tiku tamakxtukan kcongregación.

¿La natalalinaw tiku maxtukanit kcongregación? «Nialh katalalipitit katiwa tiku tala litapakuwi chu tlawa talakgxtumit nema ni xlitatlawat o lhuwa tuku kgalhiputunkgo, o kakninanikgo ídolos o lixkajni kawanikgo amakgapitsin, o kgotnin, o kamakglhtikgo amakgapitsin tuku xlakan, chu ni para katawayantit tama chixku.» (1 Corintios 5:11.) Nachuna, Biblia kinkawaniyan: «Nti xtamasiyun nCristo na ni ntapalhiniy [o ni tamakgxtakga], [...] lapi [...] nakalakgminan, na ni wa xtachuna yuma ntamasiyun limin, ni timakgamakglhtinanatit kminchikikan, na ni tiwaniyatit: “Luwa tlan mpi tat.” Xampi wanti nawaniy [...] talikatsiy nitlan ntu ntlawama» (2 Juan 9-11). La Atalaya 15 xla noviembre kata 1981, página 19, wan: «Maski kaj ni lhuwa tuku nawaniyaw chatum, max “¡Tlen!”, chuna nalitsuku akgtum takgalhchuwin chu max tlan natsukuya talalipina. ¿Tlan talalimputunaw tiku maxtukanit kcongregación?». Akxni chatum maxtukan kcongregación, nialhpara tsinu talalinaw chu na nialh litachuwinanaw xlakata takanajla.

¿Pi kawa talakaskin nipara tsinu natalalinaw? Chuna xliwanat, chu lhuwa tuku xlakata chuna kilitlawatkan. Xapulana, xlakata putum kilhtamaku kgalhakgaxmatputunaw Dios chu xTachuwin. Lu paxkiyaw Dios wa xlakata xliputum kilhtamaku kgalhakgaxmatputunaw maski namin kilhtamaku tuwa  namakgkatsiyaw. Na liwana katsiyaw pi tuku Dios tlawa xaʼakgstitum, xapaxkina chu putum xlimapakgsin kaj kilitlankan (Isaías 48:17; 1 Juan 5:3). Xlipulaktiy, tiku lakgalhinalh, ni makgxtakga tuku nitlan tlawama wa xlakata max nakinkamapasiyan nixatlan xtayat. Akxni ni talalinaw, kuentajtlawayaw ni nakinkamapasiyan xtayat chu nitu nalani kintakanajlakan, tlan tawila chu congregación ni lixkajni natalichuwinan (1 Corintios 5:6, 7). Xlipulaktutu, akxni maxtukan tiku lakgalhinalh, litamakgtaya. ¿La makgtaya? Komo makgantaxtiyaw tastakyaw xalak Biblia chu katatayaw lakgkgolotsin tiku lakkaxtlawakgolh xtaʼakglhuwit, max namakgtayayaw tiku lakgalhinalh chu ni makglhtinan tastakyaw nema maxkikgolh lakgkgolotsin. Chuna la nalikatsiniyaw max natlawa natsatatan xnaku chu nalakgpali xtayat. Akxni tiku tamakxtuka kcongregación naʼakxilha pi nialhla katalalin tiku lu kapaxki, max “tlan nalakapastakpara” chu nakatsi pi lu nitlan tuku tlawalh chu nalakgpali xtayat xlakata nalakgtaspitpara Jehová (Lucas 15:17).

¿Chu komo xalak kifamiliajkan tiku maxtuka kcongregación? Akxni chatum xalak kifamiliajkan maxtukan kcongregación, max nataliʼakxilha komo xlikana kgalhakgaxmataw Jehová. Akxni chuna natitaxtuyaw, ¿la natalalinaw tiku maxtuka kcongregación? Maski nila putum nalichuwinanaw la natalalinaw tiku maxtuka kcongregación, naʼakxilhaw pulaktiy nema tlakg xlakaskinka.

Namin kilhtamaku tiku maxtukan kcongregación akxtum katawi xfamilia. Akxni wi tiku maxtukan kcongregación, ni wamputun pi nialh xfamilia nawankgo, xfamilia tlan tachuwinankgo chu maxkikgo talakaskin namakgtayanan kchiki. Pero xlakata putum familia kgalhakgaxmatkgo Jehová, nila nalitachuwinankgo tuku xla Dios tiku tlawalh talakgalhin, xlakata xla nialh kstalanina Cristo wamputun. Max namaxkikan talakaskin natawila akxni xfamilia nakakninanikgo Dios pero ni namaxkikan talakaskin nachuwinan. Pero komo tiku maxtuka kcongregación aktsujku, xtlatkan tlan namakgalhtawakgakgo  xlakata chuntiya lakgayakgolh namasiyanikgo chu nastakyawakgo (Proverbios 6:20-22; 29:17). *

Pero ¿komo tiku maxtuka kcongregación ni tawi xfamilia? Xfamilia tiku ni makgatsankgananikgo Dios ni lu talalinkgo, kajwatiya akxni lu xlakaskinka namakgtayanan kfamilia. Chu ni putsakgo tuku natlawakgo kaj xlakata akxtum natatawilakgo. Xlakata kgalhakgaxmatkgo tuku wan Jehová chu xkachikin, ni tachuwinankgo tiku tamakxtuka chuna la wan Biblia. Lakaskinkgo pi tlan kakitaxtunilh tiku xalak xfamilia chu akxni chuna nakalikatsinikgo max nalitamakgtaya tastakyaw nema maxkika (Hebreos 12:11). *