Ni vinthu vichoko chomene ivyo vingatiŵinya nga umo vikutiŵinyira para mubali panji mubwezi withu wasezgeka mu mpingo chifukwa cha kunanga mwambura kupera. Umo tikuchitira na ulongozgi wa Baibolo pa nkhani iyi tikulongora umo tikutemwera Chiuta ndiposo umo tiliri ŵakugomezgeka ku ivyo wali kunozga. * Wonani mafumbo ghanyake agho ghakuŵapo pa nkhani iyi.

Kasi tikwenera kuchita wuli na munthu wakusezgeka? Baibolo likuti: “Muleke kwenderana na waliyose wakuchemeka mubali uyo ni muzaghali, muryezi, wakusopa vikozgo, wakutuka, muloŵevu, panji wakuphanga, ndipo mungaryanga nayo yayi munthu wanthena.” (1 Ŵakorinte 5:11) Pakuyowoya za waliyose uyo “wakukhalilira mu chisambizgo cha Khristu yayi,” tikuŵazga kuti: “Mungamupokeleranga yayi mu nyumba zinu, nesi kumutawuzga. Chifukwa uyo wakumutawuzga, wakuzomerezga milimo yake yiheni.” (2 Yohane 9-11) Munthu uyo wasezgeka tikudumbiskana nayo vinthu vyauzimu yayi panji nesi vinthu vilivyose. Gongwe la Mulinda la Chingelezi la Seputembala 15, 1981, peji 25, likuti: “Kutawuzga munthu kungaŵa nthowa yakwamba yakuti mwambe kuyowoyeskana nayo ndiposo kuŵa nayo paubwezi. Kasi tingakhumba kuchita nthena na munthu wakusezgeka?”

Kasi ntchakukhumbikwa kugegerathu munthu wakusezgeka? Enya, pali vifukwa vinandi ivyo tikwenera kuchitira nthena. Chifukwa chakwamba ntchakuti para tikuchita nthena, tikulongora kuti tili ŵakugomezgeka kwa Chiuta ndiposo tikupulikira Mazgu ghake. Tikupulikira Yehova pa vinthu ivyo ntchipusu kulondezga pera yayi, kweni nanga pangaŵa pa nyengo iyo chingaŵa chakusuzga kuchita nthena. Kutemwa Chiuta kukutituma kuti tipulikirenge malango ghake ghose, kumanya kuti ngaurunji na ghachitemwa ndiposo kuti ngachandulo. (Yesaya 48:17; 1 Yohane 5:3) Chifukwa chachiŵiri ntchakuti kugega wakwananga wambura kupera kukutivikilira ise ndiposo mpingo wose kuti tileke kukazuzgika mwauzimu ndiposo mwakuthupi, na kusungilira mbiri yiwemi ya mpingo. (1 Ŵakorinte 5:6, 7) Chifukwa chachitatu  ntchakuti kudemelera ku fundo za mu Baibolo kungawovwira munthu wakusezgeka. Para tikukhozgera ivyo komiti ya cheruzgo yadumura, vingamukhwaska chomene munthu wakwananga uyo wakatondeka kuchitapo kanthu apo ŵalara ŵakayezgayezganga kumovwira. Para ubwezi wadumuka na ŵanthu awo wakatemwananga nawo, vingamupangiska kuti ‘wajinyumwe’ na kuwona kuti wakabuda nadi vikuru, ndipo wangachitapo kanthu kuti wawelere kwa Yehova.—Luka 15:17.

Wuli usange mubali withu wakuthupi wasezgeka? Para vinthu vili nthena, ubwezi uwo ukuŵa pa ŵanthu ŵa mbumba yimoza ungaŵa chiyezgo chikuru pa nkhani ya kugomezgeka. Kasi tikwenera kuchita wuli na mubali withu uyo wasezgeka? Tingafiska yayi kuyowoya chilichose icho chingachitika, kweni tiyeni tidumbiskane waka vigaŵa vikuru viŵiri.

Nyengo zinyake, mubali withu uyo wasezgeka wangaŵa kuti tikukhala nayo pa nyumba penepapo. Pakuti kusezgeka kukumazga ubali yayi, mungalutilira kuchita nayo milimo ya pa nyumba ya zuŵa na zuŵa. Kweni chifukwa cha ivyo wakachita, wakadumulira dala ubali wauzimu uwo ukaŵa pakati pa iyo na ŵabali ŵake ŵakuthupi. Ntheura, ŵabali ŵake ŵakuthupi awo ŵakupulikira Yehova ŵakuchitira nayo lumoza yayi vinthu vyauzimu. Mwachiyelezgero, usange munthu wakusezgeka wali pa nyumba, wakwenera chara kuyowoyapo pa nyengo yakusopera ya mbumba. Kweni para wakusezgeka ni mwana muchoko, ŵapapi ŵachali na mulimo wa kumusambizga na kumupa dango. Antheura, ŵapapi ŵachitemwa ŵanganozga kuti ŵachitenge nayo sambiro la Baibolo. *—Zintharika 6:20-22; 29:17.

Kweni nyengo zinyake mubali withu wakusezgeka wangaŵa kuti wakukhala payekha, mu nyumba yithu yayi. Nangauli mwa apo na apo mungadumbiskana usange pali nkhani yinyake yakukhumbikwa chomene yakukhwaskana na mbumba, ndipouli, kuchita nthena kukwenera kuŵa kwakudumura. Mbumba za Ŵakhristu awo mbakugomezgeka kwa Chiuta, zikuŵa na pakugwenthera yayi kuti zidumbiskanenge na mubali wawo uyo ngwakusezgeka usange wakukhala nyumba yinyake. M’malo mwake, kuŵa wakugomezgeka  kwa Yehova na gulu lake vikuŵapangiska kuti ŵalondezgenge ivyo Malemba ghakuyowoya vyakukhwaskana na uyo wasezgeka. Para ŵakuŵa ŵakugomezgeka kwa Chiuta pa nkhani iyi ndikuti ŵakukhumbira viwemi wakwananga uyo wasezgeka ndipo ŵakumovwira kuti wasange chandulo na chilango icho wapokera. *—Ŵahebere 12:11.