E mu‵tana a mea e logo‵mae malosi i ei tatou i lō te logo‵mae o tatou māfai e fakatea se tino i te kāiga io me se taugasoa pele mai te fakapotopotoga mō te faiga o se agasala kae se salamō. E fakaasi atu i te ‵tou faka‵logo ki te fakatonuga i te Tusi Tapu e uiga ki te mea tenei a te ‵poko o te ‵tou a‵lofa ki te Atua mo te ‵tou a‵lofa fakamaoni foki ki tena fakatokaga. * Mafaufau ki nisi fesili kolā e ‵sae aka e uiga ki te mataupu tenei.

Ne a faiga e ‵tau o fai ne tatou ki se tino fakatea? E fai mai te Tusi Tapu: “Ke se faka‵piki koutou ki te tino telā e fai mai i a ia se Kelisiano, kae tela la se tino e finalalolagi, se tino e kaimanako, se tino e tapuaki ki tupua, se tino fakapiau tino, se tino konā, se tino ofa tulafono. Mo a eiloa e fakatakaga koe ki ei.” (1 Kolinito 5:11) E uiga ki “so se tino e se tumau i akoakoga a Keliso,” e fai mai penei: “ke se talia ne koutou a ia i otou fale; sa fakamanuia atu foki ki a ia penei, ‘Ke i a koe te filemu.’ So se tino o koutou e fakamanuia atu ki a ia, ka fai mo ona taugasoa i faiga o mea ma‵sei e fai ne ia.” (2 Ioane 9-11) E seai eiloa se fesokotakiga faka-te-agaga io me se isi mea aka e fai mo tino faka‵tea penā. E fai mai The Watchtower i a Setema 15, 1981, te itulau e 25: “A te fakatalofa atu fua e mafai o iku atu ki te faiga o se sau‵talaga ke oko ki te mauaga o se va fakataugasoa. E mata, e ma‵nako tatou o fai se vaegā mea penā ki se tino fakatea?”

E mata, e ‵tau eiloa o ‵kalo katoatoa keatea mai tino penā? Ao, ona ko pogai konei. A te pogai muamua, e fakaasi atu i ei te ‵tou a‵lofa fakamaoni ki te Atua mo tena Muna. E se faka‵logo fua tatou ki a Ieova māfai e faigofie ke fai penā kae i taimi foki kolā e faigata ei te fakalogo ki a ia.  E fakamalosi aka tatou ne te ‵tou a‵lofa ki te Atua ke faka‵logo ki ana fakatonuga, ke matea atu me i a ia e fai mea tonu kae loto alofa kae e maua foki a toe mea aoga mai i ana tulafono. (Isaia 48:17; 1 Ioane 5: 3) A te lua o pogai, a te ‵kalo keatea mai se tino agasala kae se salamō e puipui ei tatou mo tino katoa i te fakapotopotoga i te feitu faka-te-agaga mo amioga lai‵lai kae fakatumau ne tatou i ei te igoa ‵lei o te fakapotopotoga. (1 Kolinito 5:6, 7) A te tolu o pogai, e mafai o aoga ki te tino fakatea te ‵tou ‵piki ‵mau ki akoakoga fakavae i te Tusi Tapu. Mai te ‵lago atu ki te ikuga a te komiti fakamasino, e mafai o fai ne tatou ke otia te loto o te tino agasala telā ne seki aoga ki a ia a taumafaiga a toeaina o fesoasoani atu ki a ia. A te fakaseaiga o fesokotakiga tāua mo ana kāiga pele e mafai o fesoasoani atu ke toe maua ne ia a “mafaufauga ‵lei,” ke matea ne ia te fakamataku o tena mea ‵se, kae fai a faiga ke toe foki mai ki a Ieova.— Luka 15:17.

Kae e a māfai e fakatea se tino i te kāiga? I se tulaga penā, e mafai o fai te va ‵pili o tino i te kāiga mo fai se tofotofoga tonu o ‵tou a‵lofa fakamaoni. Ne a faifaiga e ‵tau o fai ne tatou ki se tino fakatea i te kāiga? E se aofia i te tusi tenei a fakanofonofoga katoa kolā e mafai o ‵sae aka, kae ke onoono tatou ki fakanofonofoga fakavae e lua.

I nisi taimi, kāti e ‵nofo fakatasi eiloa te tino fakatea mo tena kāiga tonu i te fale e tasi. Ona ko te mea e se fakaseai ne tena fakatea a fesokotakiga faka-te-kāiga, e mafai eiloa o fakatumau a faifaiga masani faka-te-kāiga i aso takitasi. E tiga te feitu tenā, ona ko tena mea ne fai, ne filifili eiloa te tino tenā ke fakaseai te fesokotakiga faka-te-agaga i tena va mo nisi tino tali‵tonu i te kāiga. Tela la, e se toe ‵kau fakatasi a ia mo tino fakamaoni i te kāiga i mea faka-te-agaga. E pelā me se fakaakoakoga, kafai e nofo atu te tino fakatea i te taimi e fai ei te akoga faka-te-Tusi Tapu a te kāiga, e se ‵tau o kau a ia ki ei i te faiga o ana manatu. Kae kafai te tino  fakatea se tamaliki foliki, koi maua eiloa ne mātua te tiute ke akoako kae fakatonutonu a ia. Tela la, e mafai eiloa o fakatoka ne mātua loto a‵lofa ke fai se akoga ma te tamaliki tenā. *—Faataoto 6:20-22; 29:17.

I nisi taimi, kāti e nofo loa te kāiga fakatea i se isi koga i tua o tena kāiga tonu. E tiga eiloa kāti e manakogina i nāi taimi ke fesokotaki atu ki te tino fakatea ona ko mea faka-te-kāiga, e ‵tau o fakamu‵tana aka a fesokotakiga penā. E se fai ne tino o te kāiga a‵lofa fakamaoni ne fakamasakoga ke fesokotaki atu fua latou ki kāiga faka‵tea kolā e ‵nofo i tua o te kāiga. I lō te fai penā, e fakamalosi aka latou ne te lotou a‵lofa fakamaoni ki a Ieova mo tena fakapotopotoga saukātoa ke ‵lago atu latou ki fakatokaga mai te Tusi Tapu e uiga ki tino faka‵tea. A te ‵toe mea aoga ki te tino agasala ko te lotou tumau i te a‵lofa fakamaoni, ke fesoasoani atu ke aoga ki a ia a te fakasalaga telā ne maua ne ia. *—Epelu 12:11.