Уруқ-туққанлиримиз яки достумиз гунасиға товва қилмиғанлиғи үчүн җамаәттин чиқирилса, бу бизгә наһайити еғир тегиду. Муқәддәс китапта берилгән көрсәтмиләргә бойсунушимиз Худани қанчилик яхши көридиғанлиғимизни вә униң әмирлирини садақәтмәнлик билән қоллайдиғанлиғимизни көрситиду *. Мошуниңға бағлиқ бирнәччә соалларни қараштуруп чиқайли.

Җамаәттин чиқирилған киши билән қандақ муамилидә болуш керәк? Муқәддәс китапта мундақ мәслиһәт берилгән: «Шуңа әнди мән силәргә өзини қериндаш дәп санап, зинахор яки ачкөз, яки бутпәрәс, яки башқиларни қарилайдиған, яки һарақкәш, яки булаңчи болған билән арилашмай, һәтта ундақ адәм билән һәмдәстиханму болмаңлар дәп йезиватимән» (Коринтлиқларға 1-хәт 5:11). Муқәддәс китапта кимду-ким «Мәсиһниң тәлимлиригә риайә қилмиса»...«уни өз өйүңларда қобул қилмаңлар вә униң билән саламлашмаңлар. Чүнки униң билән саламлашқан киши униң яман ишлириға шерик болиду» дәп йезилған (Йоһанниң 2-хети 9—11). Җамаәттин чиқирилған киши билән роһий мавзулар һәққидә сөзләшмәймиз һәм арилашмаймиз. 1982-жилниң, 1-марттики «Күзитиш мунариниң» (рус.) 17-бетидә мундақ дейилгән: «Шу киши билән саламлишипла қоюш сөһбәткә вә достлуққа елип келишниң биринчи қәдими болуши мүмкин»,— дәп йезилған. Хулләс, җамаәттин чиқирилған киши билән арилашмаслиқ үчүн биринчи қәдәм қилиш һаҗәтму?

Һәрқандақ муамилидин қечишимиз керәкму? Һә-ә, чүнки буниң бирнәччә сәвәви бар. Биринчидин, бу Худа вә униң Сөзигә болған сақадәтмәнлигимизгә тәсир қилиду. Биз Йәһваға пәқәт қолайлиқ вақиттила әмәс, бәлки қийин вақиттиму қулақ салимиз. Худаға болған меһир-муһәббитимиз униң адил, меһир-муһәббәтлик екәнлигини вә қанунлири биз үчүн пайдилиқ болғанлиғини чүшинип, бизни униң вәсийәтлирини орунлашқа дәвәт қилиду (Йәшая 48:17; Йоһанниң 1-хети 5:3). Иккинчидин, товва  қилмиған киши билән арилашмаслиқ бизни вә җамаәтни роһий вә әхлақий зиянлиқтин һимайә қилип, җамаәтниң абройиға дағ кәлтүрмәйду (Коринтлиқларға 1-хәт 5:6, 7). Үчинчидин, Муқәддәс китап принциплириға қәтъий риайә қилғанлиғимиз җамаәттин чиқирилған кишигә иҗабий тәсир қилиши мүмкин. Сот комитетиниң қарарини қоллисақ, биз ақсақалларниң мәслиһәтлиригә қулақ салмиған гунакарниң жүригигә тәсир қилишимиз мүмкин. У қәдирлик адәмлири билән муамилидин мәһрум болуп, өзигә келип, Йәһваға қайтип келиши үчүн гунасиниң қанчилик еғир екәнлигини чүшиниши мүмкин (Луқа 15:17).

Җамаәттин чиқирилған киши туққинимиз болсичу? Адәттә аилә әзалирини қериндашлиқ риштилири бағлап турғанлиқтин, бизниң Худаға болған садақәтмәнлигимиз алаһидә синилиши мүмкин. Җамаәттин чиқирилған киши билән қандақ мунасивәттә болушимиз керәк? Һәрбир вәзийәтни қарап чиқиш мүмкин әмәс, амма асасий икки вәзийәтни қарап көрәйли.

Бәзи вақитларда җамаәттин чиқирилған киши аилә әзалири билән бир өйдә туруши мүмкин. Җамаәттин чиқирилиш қериндашлиқ риштилирини үзгәнликтин, аилә әзалири өй ишлири билән бирликтә шуғуллинишни давамлаштуриду. Амма гунакар гуна йолини таллиғанлиқтин, етиқаттики аилә әзалири билән болған роһий риштилирини үзди. Шуңа садақәтмән аилә әзалири буниңдин кейин униң билән роһий мавзулар һәққидә сөзләшмәйду. Мәсилән, җамаәттин чиқирилған киши аиләвий ибадәттә муһакимигә қошулалмайду. Лекин у камаләт йешиға йәтмигән болса, тәлим бериш вә тәрбийиләш җавапкарлиғи бурунқидәкла ата-анилириға жүкләнгән. Шуңа көйүмчан ата-анилар бала билән Муқәддәс китапни тәтқиқ қилишни қарар қилиши мүмкин * (Пәнд-нәсиһәтләр 6:20—22; 29:17).

Башқа вәзийәтләрдә җамаәттин чиқирилған киши аилисидин айрим яшайду. Гәрчә бәзи вақитларда аилә ишлирини қараштуруш тәләп қилинса, муамилини мүмкинқәдәр азайтиш керәк. Садақәтмән аилә әзалири айрим туруватқан җамаәттин чиқирилған киши билән арилишиш үчүн баһанә издимәйду. Әксичә  уларниң Йәһваға вә униң тәшкилатиға болған садиқлиғи Муқәддәс китапниң җамаәттин чиқирилиш тәртивини қоллашқа дәвәт қилиду. Улар мошу принципларға қәтъий рәвиштә әмәл қилип, гуна қилғучиниң келәчигини ойлайду вә униң мошу җазадин өзигә савақ елишиға ярдәм бериши мүмкин * (Ибранийларға 12:11).