Mongo masadi ma maya. Mongo masadi ma maya ma mawa nde o mongo mande̱ne̱ mena me nde: no̱ki i mole̱, no̱ki i masange̱, no̱k’a m’bo̱ndo̱, na madibadiba. K’eyembilan, no̱ki i mole̱ i be̱n oteten ao dongo disadi diwo̱ di mabambe̱ mūdi di masoano̱, mo̱ pe̱ nde di mabole̱ ná maya ma be̱ jola. Di dongo disadi di mole̱ le ná di no̱ngo̱be̱ o maya ma mot’a benama to̱so̱ ńama o po̱ngo̱ myanga mi mongwane̱ o bo̱lise̱ baboedi ba be̱n mbo̱lo̱n a maya to̱so̱ bena ba bo̱lo̱ne̱ maya jita.

Madibadiba​—madiba nde me mongo 9 ma 10 ma mambo ma longi mo̱. Madibadiba ma be̱n pe̱ mongo masadi mape̱pe̱ ka: no̱ki i matombe̱le̱ belongi ba ńolo mye̱ndi, belongan ba bewese na masonga, no̱ki i masiye̱ da, na no̱ki i mabongwe̱ ńolo; ma be̱n pe̱ bo̱mbo̱ nanika. Madibadiba ma be̱n pe̱ mambo ma mabole̱ ná maya ma ko̱ m’bo̱ndo̱, no̱ki i manane̱ maboa, na wanga. Moto a be̱n te̱ pat’a diboa diwo̱, mado̱kita me ná ma tilea mo̱ ndo̱ndo̱ki ni po̱ngo̱be̱ na dongo disadi di wu o madibadiba di belabe̱ ná gammaglobulin, lena di no̱ngo̱be̱ o ńol’a moto di diboa di titino̱ ná di damea. No̱ki i masange̱ i be̱n mongo mao mape̱pe̱ ma mabolane̱ o bo̱lise̱ maboa ka kanse̱r.

 Mo̱, Kriste̱n yangame̱ne̱ jemea beboledi ba do̱kita be mabolane̱ mongo masadi ma maya e? Bibe̱l e si makwalea ońola nika na bwē, moto te̱ nde angame̱ne̱ no̱nge̱ bedomsedi oboso ba Loba be se̱medi o doi lao la mulema. Bō̱ ba me̱nde̱ banga mongo masadi me̱se̱, na din jo̱nge̱le̱ ná, Loba a boli Israel Mbenda ná, maya m’ewekedi ma komabe̱ ‘nde o wase.’ (Ndimbisedi 12:22-24) Bape̱pe̱ ba mabange̱ maya o mususu mao to̱so̱ mongo mao mande̱ne̱ bena bemea myanga mi be̱n mongo masadi. Be ná ba kwala ná, mongo masadi mena ma no̱ngo̱be̱ o maya ma titi pe̱ eyemban a longe̱ la nu moto ba no̱ngo̱ne̱no̱ maya.

O ponda no̱ngo̱ la bedomsedi jombwea mongo masadi ma maya, ombwea min myuedi mibupe̱: Na bi bwambwam ná banga la mongo masadi me̱se̱ ma maya di mapula nde kwala ná na si me̱nde̱ jemea myanga mō̱ mi mongwane̱ o janane̱ maboa, to̱so̱ o jongwane̱ na maya ma ko̱ m’bo̱ndo̱, ná ma si busa pe̱ e? Mo̱ ne ná na bola do̱kita beteledi ońola nje na mabangano̱ to̱so̱ jemea bolane̱ dongo disadi diwo̱ to̱so̱ mongo masadi jita e?

Beboledi ba doma. Nika e mombwea pulisane̱ na le̱nge̱ la maya. O eboled’a pulisane̱ la maya, ba malańse̱ ngea maya tongwea na bepongolo, ńai dongo diwo̱ di mayo̱mbo̱no̱ oten timba moto o ńolo, nde epongol’a madiba epe̱pe̱ e we̱le̱be̱ moto o ńolo o ni ponda maya meno̱ o yo̱mbo̱. Le̱nge̱ la maya di male̱nge̱ na timbise̱le̱ moto maya me̱se̱ ma mabuse̱  mo̱ o ńolo o ponda doma. Maya ma male̱nge̱be̱ nde o ebango to̱so̱ o wuma i telame̱ ipe̱pe̱ ya ńolo, ma moabe̱ to̱so̱ sumwabe̱ mbindo denge̱ ma matimba muboedi o ńolo. Bolane̱ la ben beboledi ba doma le nde bupisane̱ do̱kita te̱, Kriste̱n ńangame̱n so̱ baise̱ do̱kita lao njika mo̱ a me̱nde̱no̱ pula bolane̱.

O ponda no̱ngo̱ la bedomsedi jombwea ben beboledi, baise̱ na wame̱ne̱ ná: ‘Dongo la maya mam diwo̱ langame̱ne̱ te̱ yo̱mbo̱ wala o bepongolo, nde masin ma mayo̱mbise̱ mo̱ membe̱ dangwa ońola son a ponda, doi lam la mulema di me̱nde̱ bola mba ná na benge je̱ne̱ ma maya ka maya mam  e, ná ma s’angame̱ne̱ komabe̱ “o wase” e? (Ndimbisedi 12:23, 24) Mo̱, doi lam la mulema lena di se̱medi o Bibe̱l di me̱nde̱ o kaise̱ mba yete̱na o ponda doma dongo diwo̱ la maya mam di le̱nge̱be̱, di pulisabe̱ na myanga, nde di timbisabe̱ mba o ńolo e? Mo̱, na so̱ṅtane̱ bwam ná banga la to̱ njik’eboled’a do̱kita e mabolane̱ maya mam di mapula nde kwala ná na mabanga bolane̱ la maya o po̱ngo̱ muwaso, se̱ngwe̱ la maya, to̱so̱ bolane̱ la masin ma lulabe̱ ka mulema na besaosao e?’

Kriste̱n te̱ nde ńangame̱n o no̱nge̱ bedomsedi ba ne̱ni e me̱nde̱no̱ jese̱le̱ ná maya mao ma bolane̱ o ponda doma. Nika e mombwea pe̱ muwaso ma maboa na beboledi be mabaise̱ ná maya mao ma no̱ngo̱be̱, ma pulisabe̱ na myanga nde ma timbisabe̱ mo̱ o ńolo.