Ip Srihsrihk ke Srah. Ip srihsrihk ke srah (blood fractions) inge ma tuhkuh ke ip ahkosr ma oraclah srah uh, red cell, white cell, platelets, ac plasma. Ke sie mwe puhpuhlyuck, oasr sie ip ke red cell ma pahngpahng hemoglobin. Ono ma oreklac ke hemoglobin uh ma tuhkuh ke srahn mwet kuh ma orahkrahk ma orekmakihnyuck in unwelah mwet suc wi ke sie mas ma ke srihpen arlacna srihklac red cells ke srah (acute anemia). Ma inge orekmakihnyuck pac nuh sin mwet suc yohk srah kacl ma som liki mahnol.

Oasr percent 90 ke plasma oreklac ke kof ma nwacnwaclah ke hormones, inorganic salt, enzymes, nutrients, minerals ac sugar. Oasr pac ip pucspucs ke plasma ma oruh srah uh in folot (clotting factors), oasr ma srihsrihk kac pahngpahng antibodies ma lain mas luhn mahnosr, ac kuhtuh pac protein oacna albumin. Sie mwet fin wi kuh kuh in weack sie kain in mas, doctor uh ac kuh in sang ono inge pahngpahng gamma globulin ma tuhkuh ke plasma luhn mwet sahyac suc tiac wi mas se inge. White blood cell pa oraclah ip inge pahngpahng interferon ac interleukin ac ma inge orekmakihnyuck in unwelah kuhtuh mas upac wekuhnacng cancer.

Yac mwet Christian uh kuh in eis ono ma oasr ip srihsrihk ke srah kac? Bible uh tiac ip srihsrihkiyac in ahkuhtweyac, ke srihpen kais sie mwet enenuh in oruh sulaclah lal sifacna ye muhtuhn God. Kuhtuh mwet uh tiac luhngse in eis kuhtwena ip srihsrihk ke srah uh, mweyen eltahl puhla muh ke masap luhn God nuh sin mwet Israel in pacl meet ah, kuhtwena srah ma som liki sie ma orahkrahk eltahl enenuh in “okoaclah nuh infohk uh.” (Deuteronomy 12:22-24) Mwet Christian uh sruhnga in eis srah fohn ac ip ahkosr ke srah nuh ke mahnoltahl, tuhsruhktuh kuhtuh seltahl ac kuh in sulaclah in eis ono ma oasr ip srihsrihk ke srah kac. Sahp ke srihpen eltahl puhla muh wacngihnlac moul ke ip srihsrihk ke srahn mwet kuh srahn ma orahkrahk ma orekmakihnyuck ke ono inge.

 Ke pacl ma kais sie sesr oruh sulaclah lasr sifacna nuh ke ip srihsrihk ke srah uh, nuhnkuh ke kihsen siyuck inge: Yac nga etuh lah nga fin sruhnga in eis ip srihsrihk nuhkewa ke srah uh, kalmac pa nga ac tiac pac eis kuhtwena ono ma oreklac kac in lain mas kuh in oruh foloteni srah keik uh ac tulokihnyac srah ma fahsr liki sie kihnet keik? Yac nga kuh in ahkuhtweyac nuh sin sie doctor lah efuh nga sruhnga kuh luhngse in orekmakihn sie kuh kuhtuh ip srihsrihk ke srah uh?

Inkacnek in ono pucspucs. Fin ac enenuh in laslas, oasr kain in inkacnek pucspucs ma doctor uh orekmakihn tuh in tiac yohk srah ma som liki sie mwet. Eltahl ac kuh in sang kof nuh ke srah lom uh (hemodilution). Eltahl ac kuh in oruh srahn sie mwet in utyak nuh ke sie bag ma kuhpahsr nuh ke mahnol ke lusen laslas inge. Tohkoh ac ituckyang volume expander (sie kain in kof) nuh ke srah ma luhlah ke monin mwet ingacn tuh in ahkyohkye srah kacl an. Ke lusen laslas luhn sie mwet kuh ke sahflah tari uh, srah nuhkewa ma itucklac liki mahnol ac enenuh in fohlohkyang. Sie pac inkacnek in ono pa cell salvage. Ma inge sruokeni srah ke monin sie mwet ac fohlohkihnyuckyang ke lusen laslas lal uh. Orekeni srah ma som liki sie kihnet kuh laslas, owolac kuh lihklihkiyucki ac fohlohkihnyuckyang nuh ke monin mwet sacn. Ke srihpen tiac oacna sie inkacnek in ono luhn kais sie doctor, pwacnacng sie mwet Christian el ac enenuh in konwacack lah doctor lal uh ac oruh fuhkah ma inge.

Ke kom oruh sulaclah lom nuh ke kain in oakwuck in ono, siyuck sum sifacna kihsen siyuck inge: ‘Fin kuhtuh srah ke  monuk uh sohrohrlah nuh sahyac kuh itucklac liki monuk ke kihtin pacl, yac nuhnak ac puhlakihn luhk uh ac srackna lwelah nga in liye srah inge oacna ipin pacna monuk ac tiac ma nga enenuh in “okoaclah nuh infohk uh”? (Deuteronomy 12:23, 24) Nga fin laslas ac ke lusen pacl inge oasr srah ma itucklac liki monuk, ahknwacsnwacsyeyucklac ac sifwil fohlohkihnyuckyang, yac ma inge ac tiac ahkkulukye nuhnak ac  puhlakihn luhk uh? Yac nga etuh lah nga fin sruhnga in eis oakwuck in ono nuhkewa ma orekmakihn sra luhk sifacna, kalmac pa nga sruhnga pac kuhtwena kain in oakwuck in ono, oacna blood test, hemodialysis kuh heart-lung bypass?’

Sie mwet Christian el enenuh in sifacna sulaclah lah ma fuhkah el ac lwelah in orek ke srah lal uh el fin laslas. Ma inge oacpacna nuh ke inkacnek pucspucs in orek test nuh ke monum ac inkacnek in ono ma orekmakihn kihtin ip ke srah lom sifacna, sahp in ahknwacsnwacsye ac in sifwil fohlohkuhnacng.