Uutopolwa uushona wa za mombinzi. Uutopolwa uushona mboka owa za miitopolwa yi li ine iinene yombinzi ngaashi oosele oontiligane, oosele oontokele, oplatelets noplasma. Pashiholelwa, oosele oontiligane odhi na oproteina yohemoglobin. Omiti ndhoka dha longwa mohemoglobin ya za maantu nenge miinamwenyo odha kala hadhi pangithwa aavu mboka taye ehamenene oanemia nenge mboka ya kanitha ombinzi oyindji.

Oplasma ndjoka ya thikama po moopelesenda 90 dhomeya oya humbata ooholomone, iimongwa, omaludhi gooproteina niitungithi oyindji mwa kwatelwa osuuka. Oplasma oya humbata wo ooproteina ngaashi oalbumin, iihekelithi yombinzi nosho wo aakwiita yolutu mboka haya kondjitha omikithi. Ngele omuntu okwa kwatwa komukithi, ndohotola ohashi vulika e mu pe owenda yedhina gamma globulin ndjoka ya kuthwa moplasma yomuntu ngoka a kwatwa nale komukithi ngoka. Oosele oontokele dhombinzi ohashi vulika dhi longwe omiti hadhi ithanwa interferons nointerleukins ndhoka hadhi longithwa okupanga omikithi dholukwawu nokankela.

Mbela Aakriste oye na okuzimina ya pangwe nuutopolwa uushona wa za mombinzi? Ombiimbeli itayi gandja uuyelele, onkene kehe gumwe oku na okuninga etokolo lyi ikolelela keiyuvo lye koshipala shaKalunga. Yamwe ohaya tindi uutopolwa mboka uushona auhe netompelo kutya Ompango yaKalunga oya li tayi pula Aaisraeli ya kuthe mo ombinzi moshinamwenyo noku yi tilahi “pevi.” (Deut. 12:22-24) Nonando yalwe otashi vulika ya tinde okutulwa iitopolwa iinene yombinzi, otashi vulika ya zimine epango lya kwatela mo  uutopolwa uushona wa za mombinzi. Otashi vulika ya tompathane kutya uutopolwa uushona wa za mombinzi kawu lile po omwenyo gwoshishitwa shoka sha kuthwa ombinzi.

Ngele to ningi etokolo shi na ko nasha nuutopolwa uushona wa za mombinzi, ipula tango to ti: Mbela ondi shi shi ngaa kutya okutinda uutopolwa uushona wombinzi auhe otashi ti kutya itandi ka taamba wo omiti ndhoka dha longwa mombinzi dhokukondjitha omikithi nenge ndhoka hadhi hekelitha ombinzi opo kaayi ziye we? Mbela otandi vulu okuyelithila ndohotola kutya omolwashike ihaandi tulwa uutopolwa uushona wombinzi nenge omolwashike handi tulwa wumwe womuwo?

Omilandu dhetando. Opu na omukalo gumwe ngoka hagu ithanwa hemodilution moka ombinzi yomuvu hayi thipwa kominino molutu yu ukithwa momakende e tayi pingenwa po noshinguluki shontumba nokonima tayi galulilwa muye. Omukwawo oongoka hagu ithanwa cell salvage moka ombinzi yomuvu ndjoka ya za molutu lwe pethimbo lyetando hayi pungulwa nokushunithwa mo. Ombinzi ndjoka yi li nawa okuza poshilalo nenge moombululu dholutu ohayi dhindwa nokonima ohayi shunwa molutu lwomuvu. Omukriste kehe oku na okukala e na uuyelele waashoka ndohotola ta ningi, molwaashoka oondohotola ohadhi longitha omikalo dha yoolokathana oku shi ninga.

Uuna to ningi etokolo kombinga yomikalo ndhika, ipula kutya: ‘Ngele ombinzi yandje oya yi kondje yolutu lwandje e tayi kala itaayi kunguluka we ethimbo limwe, mbela eiyuvo lyandje otali ka pitika ndje ngaa ndi tale ko ombinzi ndjoka yi li ongo oshitopolwa sholutu lwandje noinashi pumbiwa oku yi tilahi “pevi”? (Deut. 12:23,  24) Mbela otashi ka piyaganeka eiyuvo lyandje ndyoka lya dheulwa kOmbiimbeli ngele sho te pangwa ombinzi yandje mwene oya kuthwa mo nokutulwa mumwe nomiti dhontumba e tayi shunwa ishewe molutu lwandje? Mbela ondi shi shi ngaa kutya ngele onda tindi epango alihe ndyoka lya kwatela mo okulongitha ombinzi yandje mwene otashi ti kutya ombinzi yandje itayi ka konakonwa we, yo itayi vulu okwoopalekwa keshina opo yi shunwe molutu lwandje shoka hashi ithanwa hemodialysis nenge itandi ka zimina ombinzi  yandje yi pite keshina ndyoka hali longo pehala lyomutima nomapunga gandje pethimbo lyetando?’

Omukriste kehe oku na okutokola nkene ombinzi ye yi na oku ungaungwa nayo pethimbo lyetando. Oku na wo okutokola kombinga yokukonakonwa nosho wo kombinga yepango lyoshinanena ndyoka omuntu ho kuthwa ombinzi onshona molutu lwoye e tayi tulwa mumwe nasha noku yi wendelwa ishewe.