Olketa blood fraction. Olketa tekem olketa blood fraction from fofala main part bilong blood, wea hem nao: olketa red cell, olketa white cell, olketa platelet, and plasma. Olketa red cell garem protein wea nem bilong hem hemoglobin. Olketa savve iusim medicine wea olketa wakem from hemoglobin bilong man or animal for helpem man wea short long blood or wea lusim staka blood.

Naenti percent long plasma hem wata nomoa. Insaed long plasma hem garem staka hormone, inorganic salt, enzyme, nutrient, witim olketa mineral and sugar. Plasma garem samting wea savve mekem blood no gohed for ran taem man garekil. Hem garem tu olketa antibody for faetem sik and olketa protein olsem albumin. Sapos man no strong for faetem wankaen sik, olketa doctor savve nilam hem long medicine wea garem gamma globulin. Olketa wakem medicine hia from plasma bilong man wea strong for faetem datfala sik. Olketa savve iusim olketa interferon and interleukin from olketa white blood cell for treatim samfala sik wea virus kosim and for treatim samfala cancer.

Waswe, olketa Christian savve tekem treatment wea garem olketa blood fraction? Bible no storyim evri samting abaotem datwan, dastawe man seleva mas disaedem wanem hem bae duim. Samfala Christian no tekem eni treatment wea garem blood fraction. Long tingting bilong olketa, Law wea God givim long olketa Israelite hem sei olketa Israelite mas “kapsaetem long graon” eni blood wea olketa aotem from animal. (Deuteronomy 12:22-24) Maet samfala nara Christian tekem treatment wea garem olketa blood fraction. Bat olketa no tekem  full blood transfusion or fofala main part bilong blood. Long tingting bilong olketa, from olketa blood fraction hia smol tumas, datwan no piksarem nao laef bilong man or animal.

Taem iu ting raonem sapos iu bae tekem olketa blood fraction or nomoa, hem gud for tingim tufala kwestin hia: Waswe, iu savve hao sapos iu no acceptim evri blood fraction datwan minim tu iu bae no acceptim samfala treatment wea olketa tekem from blood for faetem sik or wea savve stopem blood for no gohed ran taem iu garekil? Waswe, iu savve explainim long doctor why iu acceptim or no acceptim samfala blood fraction?

Olketa operation. Samfala samting wea doctor savve iusim taem hem operatim man nao hem hemodilution and cell salvage. Hemodilution hem taem doctor aotem blood bilong man and putim insaed spesol plastic bag, and then putim wankaen wata insaed long body bilong man hia. Taem doctor finis for operatim hem, hem putim go bak blood insaed long body bilong datfala man. Cell salvage hem taem doctor kolektem blood wea man lusim taem hem operatim hem. Then olketa klinim blood hia and putim go bak long body bilong hem. Hao wanfala doctor duim hemodilution and cell salvage maet no semsem witim nara doctor. Dastawe Christian mas story witim doctor mekem hem savve wanem nao doctor laek for duim.

Taem iu ting raonem sapos iu bae agree for doctor duim diswan, hem gud for tingim olketa kwestin hia: ‘Sapos doctor aotem blood from body bilong iu and blood hia stap lelebet  taem aotsaed bifor doctor putim go bak, waswe, konsens bilong iu bae ting long blood hia olsem hem blood bilong iu yet? Or waswe, bae iu ting long datfala blood olsem hem go aot finis from body, and olketa mas “kapsaetem long graon” nao? (Deuteronomy 12:23, 24) Sapos doctor wea operatim iu hem aotem blood from body bilong iu, then hem duim samfala samting long blood hia and hem putim go bak, waswe, bae datwan  spoelem konsens bilong iu wea followim wanem Bible talem? Waswe, iu savve sapos iu no acceptim evri kaen operation wea iusim blood bilong iu, hem minim tu iu no acceptim doctor for testim blood bilong iu, iu bae no acceptim hemodialysis, or iusim heart-lung machine?’

Christian mas disaed seleva long olketa samting wea hem bae letem doctor for duim long blood bilong hem taem olketa operatim hem. Hemseleva tu mas disaed sapos hem bae letem doctor for duim samfala test and treatment wea maet hem aotem lelebet blood and duim samfala samting long blood hia bifor hem putim go bak long body bilong hem.