Väe ne toto. Väe ne toto leum ‘e tē ‘es‘ao häk ne täe ‘e laloag ne ‘os toto ta‘ag—red cell, white cell, platelet, ma plasma. Kel‘ạkiạg het, ‘e red cells ta protein hemoglobin täe ‘e ‘on laloga. Tē ne pō ‘e hemoglobin ‘on ‘is famori ma mạnmạnu tē garue‘ȧk la hạiasoagan iris ne ‘oris toto mea‘mea‘ ne iris ne la‘ȧk tot rạurạu.

Plasma—laloag‘ȧk pesen 90 ‘e tạnu—ne hormone he his, kạinag sȧs, enzyme, ma nutrient, ne laloag‘ȧk mineral ma suka. Ma ‘on plasma tape‘ma ne a‘mou hạiasoag la toto la se la‘ ti‘(clotting factor), ma tē ne pelua mạnmạn ne hunim ‘af‘afa, ma protein la fak se albumin. Kepoi ka ta le‘et ma ‘on ‘af‘af het, tạku kop ma la ‘ea la kō ‘e gamma globulin ne tekạim ‘e plasma ‘on famör ne iris a‘lelei vȧh. Ka white blood cell ma ‘on kạinag tạnut ne he‘ interferon ma interleukin, ne a‘leleia kensa ma ‘af‘af ne tore.

Tei ka lelea‘ rot fakKaristo tȧr garue‘ȧk ne väe ne toto? Puk Ha‘a kat sui‘ȧk a‘tạution ra, ka täe ‘e konsien ‘on le‘et se ‘Ạitu. Iris ‘on rereag la kal tȧr pạu ra te‘ ne tē ne laloag‘ȧk väe ne toto, ‘e rēko Foh ‘on ‘Ạitu se lelea‘ Isireli ‘e ‘on mumua ‘e ‘oris la ‘ut‘ȧk ne tot ‘on mạnmạn ta ma “ji‘ạkia kikia se pear ta.” (Nā Hoi‘ạkiag Ne Foho 12:22-24) Ka iris ‘on rereag, kal tȧr ra nā tot titi‘u, ka iris aier‘ȧk vại ne laloag‘ȧk väe tot riri‘i. Iris kop ma la a‘häe ne väe ne toto ‘e rēko iạ riri‘ iạ tokana ‘e la hat la tē mạurit ‘e rēko iạ väe ‘e tot titi‘u.

‘E avat ne ‘ou rē pure la laloag‘ȧk väe ne toto, iạ tē leleit la sạkior se sạio‘ ‘i: Ka tei ka gou ‘inea väe ne toto ‘on fuạga ne gou kal tȧr ra ta kạinag vại ne laloag‘ȧk tē garue‘ag ne garue‘ȧk toto ne hạiasoag la toto se jī hạhạiạ? Ka gou la sui‘ȧk tapen se tạk ta hunit ne gou kat tȧr ra garue‘ȧk ne väe ne toto?

Tē Garue‘ag la Ser. Tē te‘is laloag‘ȧk hemodilution ma cell salvage. ‘E hemodilution, tot ta hot‘ȧk ‘e for ta ma kotä vại ne a‘ti‘ua toto ta sur‘ȧk se tot ne hot‘ạki, ma ‘e ‘on fakmuri tot ne hot‘ạki täla sur‘ȧk hoi‘ạki se for ‘on famör ta. ‘E cell salvage tot ne hot ‘e for ta ma sur ‘e avat ne ser ta nōnō sok la‘mo. Tot ne hot ‘e ra‘oag ta a‘ma‘­ma‘ȧk ma kotä hö‘ȧk se ‘on ra‘oag ta. Iạ tē leleit la le‘ rot fakKaristo la sạkior a‘lelei se tạkut ne la rē iạ ‘e rēko tạk tūtū ma ‘on rērē het.

‘E av ne la rē pure, sạio‘ se ‘äe: ‘Kepoi ka tot ‘on rereag la hot ‘e ‘otou foro ma la kepoi ka tēet la sok ma la‘ ne ‘otou tot ta fu‘ mea‘mea‘, tei ka ‘otou konsiene la ‘es ‘e a‘häet ne tot te‘is nōnō hat ma la tot ne ‘otou foro ne kop la “ji‘ạkia kikia se pear ta”? (Nā Hoi‘ạkiag Ne Foho 12:23, 24) Ka tei ka gou la mane‘ȧk ‘otou konsien rak fakPuk Ha‘a kepoi ka avat ne ser tē ta a‘soko ka tot ‘on rereag ‘e ‘otou toto tekại ma tạunȧ‘ ag‘esea ma vại mumuạ la hö‘ȧk se ‘otou foro? Tei ka gou ‘inea ne ‘otou kat tȧr ra te‘ ne kạinag vại ma tē garue‘aga laloag‘ȧk garue‘ȧk ne ‘otou toto, ‘on fuạga ne kal aier‘ȧk ra la jek ‘ou toto, hemodialysis, ne garue‘ȧk ne misin pạmua toto se fạtumanava ma ma‘ma‘a?’

Le‘ rot fakKaristo ta nonoj la rē puer ne tes ta iạ pa ‘es la a‘sok se ‘on toto ‘e av ne iạ sere e. Tē ‘esea ma ma tēak ne tot mea‘mea‘ moit la tạunȧ‘ ag‘esea ma vại ma kotä kō‘ȧk hoi‘ȧk se ‘ou foro.