Vaega ninii o le toto. O vaega ninii o le toto, o vaega ia ua maua mai i vaega autū e fā o le toto—o sela mūmū, o sela papaʻe, o sela faatoʻa toto (platelets), ma le vaega faasuavaia o le toto (plasma). O se faaaʻoaʻoga, o loo iai i sela mūmū le polotini e taʻua o le hemoglobin. O vailaau e fai mai i sela mūmū o toto o tagata ma manu, ua faaaogā e togafitia ai maʻi o tagata e vaivai tele le toto po ua tele naʻuā le toto e alu.

O le 90 pasene o le vaega faasuavaia o le toto e faia aʻe i le vai, o loo iai le anoanoaʻi o homone, o le masima, o polotini eseese (enzymes), ma niuturiane e aofia ai minerale ma le suka. O loo iai foʻi i le vaega faasuavaia o le toto mea e māfua ai ona toʻa le toto, o vailaau (antibodies) e tetee atu ai i faamaʻi, ma polotini e pei o le albumin. Pe afai ua maua se tasi i se faamaʻi pe e ono pisia ai foʻi, atonu o le a fautuaina e fomaʻi le faia o se tui e iai le gamma globulin lea ua aveesea mai i le vaega faasuavaia o le toto o tagata ua puipuia o latou toto mai i lea faamaʻi. E mafai ona avea sela papaʻe ma puna o polotini (o interferons ma interleukins) ua faaaogāina e togafitia ai nisi o faamaʻi pipisi e māfua mai i vairusi, atoa foʻi ma kanesa.

Pe e tatau ona talia e Kerisiano togafitiga e faaaogā ai vaega ninii o le toto? E tatau i tagata taʻitoʻatasi ona fai lana lava filifiliga e tusa ai ma lona lotofuatiaifo i luma o le Atua, auā e lē o iai ni faamatalaga maʻoti i le Tusi Paia. E teena e isi tagata vaega ninii uma o le toto, auā ua latou faapea mai o le faatonuga a le Tulafono a le Atua iā Isaraelu, e tatau ona sasaa “i le  palapala” le toto o se manu ua mate. (Teuteronome 12:22-24) Peitaʻi, e taliaina e isi tagata togafitiga e aofia ai vaega ninii o le toto, ae latou te teena tuigātoto e aofia ai le toto atoa po o vaega autū o le toto. Atonu latou te manatu, o vaega ninii na maua mai i le toto, e lē o le ola lenā o le meafaiola lea na maua mai ai le toto.

Ia manatu i fesili nei pe a faia ni filifiliga e faatatau i vaega ninii o le toto: Po ua ou iloa ea, o le teena o vaega ninii uma o le toto, o lona uiga ou te lē taliaina ai nisi o vailaau o loo aofia ai vaega ninii o le toto ua faaaogā e togafitia ai maʻi, pe e faatoʻa ai le toto ina ia taofia ai le alu o le toto? Pe e mafai ona ou faamatala atu i se fomaʻi le māfuaaga ua ou teena ai, po ua ou taliaina ai le faaaogāina o se tasi pe sili atu foʻi o vaega ninii o le toto?

Taotoga. E aofia ai taotoga e taʻua o le hemodilution ma le cell salvage. O le hemodilution, o le taotoga lea e faaalu ai le toto mai le tino ae faaaogā se vai e sui aʻi le toto, ae e toe faafoʻi le toto i le tino o le maʻi pe a māeʻa. O le cell salvage, o le taotoga lea e sefe le toto na alu ese a o faia le taotoga ma toe faafoʻi mai ai i le tino o le tagata maʻi. E maua le toto mai le manuʻa po o se vaega o le tino lea e faamamā ma vaimamā, ona toe faasolo mai lea i le tino o le maʻi. Talu ai e eseese metotia e faaaogā e fomaʻi i taotoga faapenei, e tatau la ona fesili atu se Kerisiano i lana fomaʻi i taotoga o le a ia faaaogāina.

 A o faia filifiliga e faatatau i nei taotoga, ia fesili ifo iā te oe: ʻPe afai e faatafe ese atu loʻu toto ma e iai sina taimi e motusia ai le fetafeaʻi o loʻu toto, e tusa ai ma loʻu lotofuatiaifo, po ou te manatu ua avea pea loʻu toto ma se vaega o loʻu tino, ma e lē manaʻomia ai ona sasaa “i le palapala”? (Teuteronome 12:23, 24) Pe e afāina loʻu lotofuatiaifo ua aʻoaʻoina i le Tusi Paia, pe afai e aveesea se toto mai iā te aʻu ma faafefiloi ma se  vailaau, ona toe tui mai lea i loʻu tino? Po ua ou malamalama ea afai ou te teena togafitiga uma e faaaogā ai loʻu toto, o lona uiga foʻi ou te teena le suʻeina o loʻu toto, o le faamamāina o le toto, po o se masini e faaaogā pe a faia taotoga o le fatu?’

E tatau i se Kerisiano ona fai lana lava filifiliga i le auala e faaaogā ai lona toto a o faia se taotoga. O le manatu foʻi lenā pe a suʻeina se maʻi ma togafitiga faaonapōnei, lea e tatau ai ona aveeseina sina toto mai le tino o se tagata, ma atonu e faia i ai ni suiga, ona toe tui mai lea i le tino o le tagata.