Tincenyana tengati. Letincenyana titsetfwe kuletincenye letine letiyinhloko tengati—lokutinhlayiya letibovu, tinhlayiya letimhlophe, ema-platelets, kanye ne-plasma. Sibonelo saloku kutsi tinhlayiya letibovu licuketse iphrotheni lokutsiwa yihimoglobhini. Imikhicito leyakhiwa ngehimoglobhini yebantfu nobe yetilwane, iye yasetjentiswa ekwelapheni tigulane letinemphelangati (anemia) kanye naleto letophe kakhulu.

I-plasma—lenemaphesenti langu-90 emanti—icuketse incwaba yema-hormone, luswayi lwetintfo letingaphili, ema-enzamu (enzymes), kanye nema-nutrients, kuhlanganise nemaminerali kanye nashukela. I-plasma iphindze ibe netakhi letitiyisa ingati, emasotja emtimba lalwa netifo, kanye nemaphrotheni lanjenge-albumin. Nangabe umuntfu abanjwe sifo lesitsite, bodokotela bangase bakhutsate kutsi atsatse imijovo ye-gamma globulin lekhishwe ku-plasma yebantfu lesebagonyiwe. Etinhlayiyeni letimhlophe tengati kungakhishwa ema-interferons kanye nema-interleukins lasetjentiswa ekwelapheni tifo letibangelwa ngemagciwane latsite, kanye nekhensa.

EmaKhristu kufanele atemukele yini tindlela tekwelapha letihlanganisa kusetjentiswa kwetincenyana tengati? LiBhayibheli aliyiniketi imininingwane lecondzile kuloku, ngako-ke nguloyo naloyo kufanele asebentise nembeza wakhe kute atincumele embikwaNkulunkulu. Labanye bangase batale tonkhe letincenyana tengati, baphetse ngekutsi uMtsetfo waNkulunkulu kuma-Israyeli wawutsi ingati lekhishwe esidalweni kwakufanele ‘[icitselwe] phansi emhlabantsini.’ (Dutheronomi 12:22-24) Labanye, ngisho nobe bangala kumpontjelwa ingati nobe tincenye tayo, bangase bakwemukele kwelashwa lokuhlanganisa tincenyana tengati. Bangase baphetse  ngekutsi ngelizinga lelitsite letincenyana letikhishwe engatini tiyayekela kumelela kuphila kwesidalwa lekhishwe kuso ingati.

Lapho wenta tincumo letimayelana netincenyana tengati, cabangela lemibuto lelandzelako: Ngiyacaphela yini kutsi kwala tonkhe tincenyana tengati kusho kutsi ngingeke ngiyemukele imitsi letsite lenemikhicito lesetjentiselwa kulwa netifo, nobe lengase isite ekutiyiseni ingati kute kuncandvwe kopha? Ngingakwati yini kuchazela dokotela kutsi kungani ngala nobe ngemukela kusetjentiswa kwencenyana leyodvwa nobe letingetulu tengati?

Tindlela tekuhlindza. Tihlanganisa kuhlantwa kwengati (hemodilution) kanye nekongiwa kwetinhlayiya tengati (cell salvage). Lapho ingati ihlantwa, iyaphambukiswa emtimbeni, esikhundleni sayo kufakwe umtsamo wemanti, bese kutsi ekugcineni ibuyiselwa esigulaneni. Kongiwa kwetinhlayiya kusita ekuncandzeni nasekubuyiseleni ingati lelahlekako lapho kuhlindvwa. Ingati lesencebeni nobe lapho umtimba uvuleke khona, iyatsatfwa ihlantwe nobe icwengwe, bese ibuyiselwa esigulaneni. Ngenca yekwehluka kwekusetjentiswa kwaletindlela kuye ngabodokotela, umKhristu kufanele atfole nobe ati kutsi dokotela wakhe utawutisebentisa njani letindlela.

Lapho wenta tincumo mayelana naletindlela, tibute: ‘Nangabe lenye yengati yami itawuphambukiswa emtimbeni wami, futsi nekujikeleta kwayo kute kuphatamiseke kwesikhashana lesitsite, nembeza wami utawungivumela yini kutsi ngichubeke ngibheka leyo ngati njengencenye yami, futsi kungadzingeki kutsi ‘[icitselwe] phansi emhlabantsini’? (Dutheronomi 12:23, 24) Nembeza  wami loceceshwe ngeliBhayibheli utawuphazamiseka yini nangabe lapho kusetjentiswa indlela letsite yekwelapha kukhishwa incenye letsite yengati yami, yentiwe lokutsite bese ibuyiselwa emtimbeni wami? Ngiyacaphela yini kutsi kwala tonkhe tindlela tekwelapha letihlanganisa kusetjentiswa kwengati yami kusho kutsi ngingeke ngivume kutsi ingati yami ihlolwe, kutsi ngisebentise umshini wekuhlanta ingati (hemodialysis), nobe umshini wenhlitiyo nemaphaphu (heart-lung bypass machine)?’

 UmKhristu kufanele atincumele yena kutsi yini latawuyivumela kutsi yentiwe ngengati yakhe lapho kusetjentiswa indlela letsite yekuhlindza. Kuyafanana nasekuhlolweni kwemphilo kanye nasetindleleni tekwelapha tesimanje letihlanganisa kutsatfwa kwengati yakho lencane, kwentiwe lokutsite kuyo, bese ibuyiselwa emtimbeni wakho.