Ifrasau sa ephome. Ifrasau sa ephome, sinikumihiwa mmipantta xexe suulupale sa ephome, ntoko ikoloobulu sooxeerya, ikoloobulu sootteela, iplaqueta, ni eplasma. Mwa ntakiheryo, ikoloobulu sooxeerya, sookhalana eproteina eniihaniwa hemoglobina. Itthu sinipakiwa erumeeliwaka hemoglobina ya apinaatamu wala axinama, sinnirumeeliwa wira alooliwe aretta arina anemiya aahiiso atthu emwaraxen’ye vanceenexa ephome aya.

Eplasma, yeeyo erina 90 porcento ya maasi, yookhalana hormônios, sais inorgânicos, enzimas, ni itthu sikina sinimwiiriha mutthu wunnuwa, ohela muhina minerais ni esuukhiri ya mwerutthuni. Nave-tho, Eplasma yookhalana eproteina eniihaniwa albumina, ni itthu sikina sinikhaliherya wiiva iretta sa mwerutthuni. Akhala wira mutthu oophwanya eretta, matotoro pooti omuhoma esisau amurumeelaka gamaglobulina yoowo okumihiwe mplasmani ya mutthu aarina iseelula saamukhaliherya osyaka iretta. Nto, ikoloobulu sootteela, sookhalana interferon ni interleucinas sinikhaliherya omuloola mutthu orina iretta sinraveya, ni kanser.

Niireke wira muKristau pooti weemererya olooliwa sirumeeliwaka ifrasau sa ephome? Biibiliya khonihimya mithinto sotheene sa moota onilooliwa aya iretta, nto, khuta muKristau ohaana opaka yoothanla awe ohoolo wa Muluku ottharihelaka yowuupuxerya ya murima awe. Akina pooti okhootta ifrasau sotheene sa ephome, yuupuwelaka wira Nlamulo nenno Muluku aavanhe awe anaIsarayeli naahimya wira ephome yahaana ‘omwarexeliwa vathí’. (Otumererya 12:22-24) Vaavo atthu akina anikhootta aya oheleliwa ephome aahiiso ikomponente suulupale sa ephome, waaniheryasa awo pooti weemererya olooliwa sirumeeliwaka ifrasau sa ephome. Awo pooti wuupuwela wira ifrasau iye khasirina ephome, nto khasinithoonyerya okumi wa yoopattuxiwa ele ekumihiwe aya ephome ele.

Okathi munipaka anyu yoothanla voohimya sa ifrasau sa ephome, muthokorerye makoho ala anittharelana: Kiireke wira kinnisuwela wira okhootta ifrasau sotheene sa ephome, ontaphulela okhootta mirette sikina siniloola iretta, aahiiso siniiriha ephome wiinamana wira ehikhumeke? Kinoowerya omutthokiherya meedico nthowa naya kinikhootta aka, wala kineemererya aka efrasau emosa aahiiso sotheene?

Inamuna sa operasau. Inamuna iya, sinihela muhina hemodiluição ni recuperação intra-operatória de células. Muthinto ola wa operasau oniihaniwa hemodiluição, ephome enoohapuxiwa mwerutthuni, nto khuranttelihiwa ni murette oniihaniwa expansores de volume, nto nuumala vo ephome awe ennittikiheriwa mwerutthuni mwa muretta ole. Muthinto mukina oniihaniwa recuperação intra-operatória de células. Enamuna ela, ephome enimwaraxeya ya mutthu ole onooperariwa, ennikuxiwa khiyattikiheriwa mwerutthuni mwawe. Ephome ele ekhumme nipuro nne nooperariwe, ennikuxiwa khiyeekiwa ni orapihiwa, nuumala vo, khittikiheriwa mwerutthuni mwa ole oniwereiwa. Okhala wira khuta meedico pooti orumeela enamuna yoovirikana, muKristau ohaana osuwela ele meedico oniphavela awe opaka.

Okathi munipaka anyu yoothanla voohimya sa inamuna iya solooliwa, mwiikoheke so: ‘Akhala wira ephome aka enookumihiwa mwerutthuni mwaka wala omaalihiwa mu okathi vakhaani, nto kiireke wira yowuupuxerya ya murima aka ennikeemererya othokorerya ephome ele okhala yawaka, nto khihiyatthuneya ‘omwarexeliwa vathí’? (Otumererya 12:23, 24) Kiireke wira, yowuupuxerya ya murima aka yiixuttihiwe ni Biibiliya, yaarowa oxankiheya vakhanle wira okathi wa olooliwa, yookuxiwa ephome aka khutakaaxeriwa murette ni khuttikiheriwa mwerutthuni mwaka? Kiireke wira kinnisuwela wira okhootta inamuna sotheene sa olooliwa erumeeliwaka ephome aka, ontaphulela wira nkineemererya omwaleiwa ephome, opakiwa hemodiálise, aahiiso volume de escorva da máquina de coração-pulmões?’

MuKristau ohaana othanla mmensawe moota ephome awe enrowa aya orumeeliwa okathi wa operasau. Nave-tho, ela enihela muhina omwaleiwa erumeeliwaka ephome ya mutthu owo, wala okuxiwa ephome vakhaani khutatuxiwa wira ekhale murette ni khuhomeliwa esisau.