Raha baka amy taharo fototro lio. Ino ma taharo fototro lio zen̈y? Liomena, liofotsy, plakety ndreky plasma. Misy raha hafa koa amy tsiaraikiaraiky amindro io. Karaha ataony amy liomena, misy hemoglobiny. Aody sasany misy hemoglobiny baka aminolo na baka amy biby hitahan̈a olo efa ten̈a tsy ampy lio na olo be lio very.

Amy plasma io misy hormony maro, sira mineraly, albiminy, raha mahavelon̈o, raha mampandry lio, ndreky raha miady aminy aretin̈y, fa rano ten̈a maro amizio. Izikoa misy olo misy aretin̈y, izy mety hataony dokotera pikira gammaglobuline. Izio aody baka amy plasmanolo misy hery fiarovan̈a (anticorps). Baka amy liofotsy ndraiky hazahoan̈a raha hitahan̈a kansera na aretin̈y sasany baka amy virisy.

 Mety amy Kristianin̈y ma fitahan̈a misy raha baka amy taharo fototro lio? Arakaraka olo fo, fotony tsisy toro lalan̈a mivantan̈a momba zen̈y amy Baiboly ao. Sasany mety tsy han̈eky, fotony amindro tokony ‘haidin̈y amy tany’ lio jiaby baka amy raha manampahin̈ana. Zen̈y raha koran̈iny Lalàn̈a namian̈a iro Israelita aby io. (Deoteronomia 12:​22-24) Sasany ndraiky mety han̈eky, fotony efa tsy fahin̈ana eky raha jiaby baka amy taharo fototro lio.

Ke alohany anao hanapakevitry, diniha antsendriky ty: Izikoa anao tsy man̈eky aody baka amy taharo fototro lio foeky, tsy mety aminao koa aody sasany hiadivan̈a aminy aretin̈y mahafaty na aody mampandry lio, izikoa be lionao very. Izikoa ndraiky anao man̈eky raha araiky na maromaro baka amy taharo fototro lio io, mila hainao man̈azava zen̈y amy dokoteranao.

Tekniky Fandidian̈a Olo. Voanalohany, lio idin̈ana raha. Misy fitaovan̈a ampiasain̈y, mampivily lio hiala amy vatan̈anolo, baka io lio in̈y soloan̈a ranondraha. Koa fa vita zen̈y, ampody amy vatan̈anolo io ndraiky lio nadoso taminany in̈y. Faharoe, atao raha mampihen̈y lio very amy fotoan̈any dokotera mandidy. Alain̈a lio very io, diovin̈y na sivan̈iny, baka io ampody aminolo marary io. Dokotera aby io samy amy tekniky mahazatra iro, ke Kristianin̈y hididian̈a io mila man̈ontany dokoteranany.

 Izikoa anao efa hanapakevitry, aleva onon̈o ty: “Izikoa lionao avily hiala amy vatan̈anao, ke mety hijanon̈o hely fandihanany, asa ikeny sain̈inao fa mbala ain̈inao fo izio, ke tsy voatery ‘haidin̈y amy tany’? (Deoteronomia 12:​23, 24) Izikoa lionao misy an̈adosoan̈a, idin̈ana aody, baka io ampody amy vatan̈anao ndraiky, asa mbala mety aminy eritreritrinao fo? Izikoa tsy ikenao fitahan̈a karaha zen̈y, dikanizen̈y anao tsy mety hangalan̈a lio atao analizy? Anao koa tsy han̈eky hatao dializy na hampiasan̈a fitaovan̈a solony fo na havokavoko (poumons)?”

 Tsy maintsy manapakevitry Kristianin̈y araiky amy raha tiany hatao lionany, izy koa fa didian̈a. Mety han̈adosoan̈a hely lionany, hizahan̈a aretin̈inany na hitahan̈a izy, baka io koa mety hidin̈ana aody izio, zay vo ampody amy vatan̈anany. Kila olo manapakevitry amy zen̈y.