Tim me cobo miti me mit kenken obedo gin macilo tutwal i yo me cwiny pien weko ngat moni doko ngat ma dong tamo pire kene dok weko en bedo ka tamo pi jami macilo keken. Ngat ma cobo mitine me mit kekene romo cako neno jo mukene calo gin me abuta kwede ci otum. Ki tung bote, buto i kin laco ki dako doko gin ma pe kubbe ki mar ento nongo tye mere me cobo miti ma nongo obino matek i wang cawa moni ci otum. Meno cobo miti pi kare manok keken. Me kaka neko tam ma tye i cwinywa ma gin aye tim me “abor, caro, mit me kom [marac],” cobo miti kit meno tugogi atuga doki.—Jo Kolocai 3:5.

Lakwena Paulo ocoyo ni: “Wun ma amaro, . . . myero walonnye woko kekenwa i gin ducu ma cido komwa nyo cwinywa, kun walworo Lubanga, wek wadoku jo maleng atikatika.” (2 Jo Korint 7:1) Ka itye ka tute me lubu lok man, pe irweny genni. Jehovah tye atera me “weko bal” ki dok me miyowa kony. (Jabuli 86:5; Luka 11:9-13) Dong, cwinyi ma bedo ka poto ki dok tuteni matek me lweny ki tam ma kit man kadi bed ni iwoto ki poto nyutu ni itye ki cwiny matir. Po bene ni “Lubanga dit kato cwinywa woko, dok ngeyo lok ducu.” (1 Jon 3:20) Lubanga pe neno balwa keken ento neno ngat moni kacel ki cwinye ducu. Ngec man miyo en winyo  legawa ki cwiny me kica ka wakok bote. Pi meno, pe iol ki kwayo kica bot Lubanga, calo latin ma cito bot wonne ka en tye i peko. Jehovah bigoyo laane i komi kun miyo cwinyi pe bedo ka poto. (Jabuli 51:1-12, 17; Icaya 1:18) Mitte ni myero iti jami ma lubbe ki legani. Me laporre, tute matek me kwero neno cal mogo maraco kacel ki bedo ki jo ma kitgi pe atir. *

Ka inongo ni pe itwero juko tim me cobo mitini me mit kekeni, ci tim ber inywak tam man ki lanyodoni nyo Lakricitayo mo muteggi i yo me cwiny nyo laremi mo ma igeno. *—Carolok 1:8, 9; 1 Jo Tecalonika 5:14; Tito 2:3-5.