Мастурбация ич-кӧгӱс јанынаҥ јарабас кылык-јаҥ, ол јӱк бойын сананарына кӱӱнзедет ле кижиниҥ сагыжын быјарсыдат *. Анайда ок кӧп сабада мастурбациянаҥ улам, кижи ӧскӧ улусты јӱк ле секс јанынаҥ кӧрӧт. Ого секс сӱӱштеҥ чек башка болуп, кыска ӧйгӧ јакшызынып, сексуальный кӱӱнине јединетен арга болуп калат. Је бу узакка эмес. Чынынча, мастурбация эт-канныҥ јаман кӱӱнин: «балыр јӱретенин, быјарды, кычаны» токтотпой јат, је оныҥ ордына там ары кӱйбӱредет (Колоссыдагыларга 3:5).

Элчи Павел бичиген: «Кару улузым... Анайдарда, Кудайдаҥ айап, бойыбысты бӱткӱлинче агару јӱрӱмге учурлап, эт-канды ла тынды быјарсыдып турган ончо немелердеҥ арутаналы» (2 Коринфтегилерге 7:1). Сеге бу сӧстӧрлӧ јӱрерге кӱч болзо, чӧкӧбӧ. Иегова јаантайын болужарга ла «јаманды таштаарга белен» (Сарын 86:5; Лука 11:9—13). Кезикте тудунып болбой, бойыҥды јаргылап турганыҥ ла јаман кылыктаҥ айрыларга тартыжып турганыҥ сениҥ јакшы кӱӱн-санааҥды керелеп јат. Анайда ок «Кудай јӱрегистеҥ јаан, Ол ончозын билер» деп ундыбай тур (Иоанныҥ 1-кы самаразы 3:20). Ол бистиҥ јаҥыс ла кинчектеристи кӧрӱп турган эмес, је кижини бӱткӱлинче кӧрӧт. Иегова бис керегинде ончоны билер,  оныҥ учун кинчегисти таштазын деп јайнап мӱргӱгенисти буурзап угат. Темдектезе, кичинек бала та неде боло берзе, канайып адазына капшай јӱгӱрип келет, анайып ла бис јаантайын јобош болуп, Кудайга акту јӱректеҥ мӱргӱӱр аргалу. Иегова сеге алкыш эдип, ару уйат берер (Сарын 51:1—12, 17; Исаия 1:18). Је сеге бойыҥныҥ мӱргӱӱлдериҥ аайынча јӱрер керек. Темдектезе, јӱзӱн-јӱӱр порнографияныҥ бӱдӱмдеринеҥ, анайда ок салтарын јетиргедий улусла куучындажарынаҥ кыйар керек *.

Мастурбировать эдер кылык-јаҥнаҥ айрылып болбой турган болзоҥ, христиан ада-энеҥле эмезе ич-кӧгӱзи тереҥ ле болужарга белен најыҥла куучындаш деп сурап турубыс (Укаа сӧстӧр 1:8, 9; 1 Фессалоникадагыларга 5:14; Титке 2:3—5) *.