I bana lem i bôble gwom gwoñ bi mbôô inyu nok mane, li yé lem i mbébél Djob inyule i ntinde mut i tôñ ndigi ngôñ yé i minsôn, i mboñ le mut a hoñol ndigi mam ma nyega. I mut a gwé lem i, a nla pam i tehe bape, ha kiki bôt ba binam bé, ndi kiki gwom a nla gwélél inyu yônôs ngôñ yé malal. A ntehe ha bé malal kiki likébla ipôla bôt iba ba ba ngwéhna, ndi kiki njel i nok mane inyu ndég manut ni inyu mômôs ngôñ yé malal. Ndi nyuu yé i mom ndigi ñwee inyu ndég ngéda. Ni maliga, ilole i lem ini i nol bijô bi nyuu inyu mam ma “ndéñg, ni nyega, ni nkañ minheña [tole ngôñ malal ibabé i gwel nyuu],” yo i nyungul ndigi gwo nyunglak.​—Kôlôsé 3:5.

Ñôma Paul a tila le: “A bagwéha . . . di pubus béhbomede ni mam momasôna ma nkééhe [nhindis] bés minsôn ni mbuu, ndi di yônôs pubha yés inyu woñi Nyambe.” (2 Korintô 7:1) Ibale u yé jôs i lem ini kiki Bibel i nkal, lehel bañ ñem. Yéhôva a yé bebee i hôla we, a “nyégi ki i nwéhél” ngéda yosôna. (Tjémbi 86:5; Lukas 11:9-13) Ni maliga, ibale kiññem i nkéés we mu jam li, ni ibale u mboñ biliya inyu nwas i lem ini​—to hala kiki u nla tiimba kwo mukété​—hala a ñunda le u gwé mahoñol malam. Tééda ki  le “Nyambe a nloo miñem nwés, a nyi ki mam momasôna.” (1 Yôhanes 3:20) Djob a ntehe ndigi bé bibéba gwés, ndi a ntehe libak jés jolisôna. Kiki a nyi mam momasôna, a nla emble ni konangoo masoohe di nsoohe inyu bat nwéhél. Jon u waak bañ kwélés nye ikété masoohe ni suhulnyu ni ñem maliga, kiki mañge a nkôôge isañ bebee ngéda jam li ntéñga nye. Yéhôva a ga sayap we, a ti ki we kiññem i mpôp. (Tjémbi 51:3-14, 19; Yésaya 1:18) I yé ntiik le di nlama boñ biliya inoñnaga ni masoohe més. Kiki hihéga, u nlama yoñ bitelbene i tjél mintén mi biliñge liñge bi malal nwomisôna, u tjél ki bilôñ bibe. *

Ibale u mpam bé i nwas lem i bôble gwom gwoñ bi mbôô, i yé loñge le u pahlene jo ngwal woñ nu a yé kristen, tole nhôôlak kristen u u yé liwanda joñ. *​—Bingéngén 1:8, 9; 1 Tésalônika 5:14; Titô 2:3-5.