IFYEBO NA FIMBI
Ifya Kucita pa Kuleka Ukwikataula Ifya Mfwalo
Ukwikataula ifya mfwalo takutemuna Lesa, kulalenga umuntu alacita fye ifya kuisekesha umwine kabili kulenga alatontonkanya pa fyabipa. * Umuntu uwatemwa ukwikataula ifya mfwalo kuti na kabili alamona abantu bambi kwati bakubomfya fye pa kwikusha insuuna. Ku muntu wa musango uyu, ukwampana kwa mwaume no mwanakashi te nshila ya kulangilamo ukutemwa, lelo ni nshila ya kufwailamo fye ukupeema. Nomba ukupeema kwine uku kwa pa nshita fye iinono. Kanshi, mu nshita ya kuti epaye ifilundwa fya mubili wakwe umumonekela imibele yabipa, “e kutila ubulalelale, ukukowela, [ne] nsuuna,” alafibimbula ilyo alefikataula.—Abena Kolose 3:5.
Umutumwa Paulo alembele ukuti: “Mwe batemwikwa, tuisangulule kuli fyonse ifikowesha umubili no mupashi, no kuba aba mushilo icine cine mu kutiina Lesa.” (2 Abena Korinti 7:1) Nga ca kuti cilemukosela ukukonka aya mashiwi, mwibwelela inuma. Yehova ‘ali-iteyanya ukumwelela’ no kumwafwa inshita fye iili yonse. (Amalumbo 86:5; Luka 11:9-13) Ca cine, nga ca kuti umutima wenu ulamuseka kabili mulesha na maka ukuleka ukwikataula ifya mfwalo nangu ca kuti limo cilamukosela, cilangililo fye ca kuti mulafwaisha ukulekelela. Na kabili, muleibukisha ukuti “Lesa alicila imitima yesu kabili alishiba fyonse.” (1 Yohane 3:20) Lesa talolesha fye pa membu tucita; lelo alamona ne fyo umuntu umwine aba. Apo alitwishiba bwino, alatulangulukilako kabili alatumfwa nga twamupapaata ukuti atubelele uluse. E co mwilanaka ukubutukila kuli Lesa no kuinashisha kuli ena mwi pepo lya mukosha, nga filya umwana ashinaka ukuya kuli ba wishi no kubeba ubwafya akwete. Yehova akamupaala no kumupeela kampingu iyasanguluka. (Amalumbo 51:1-12, 17; Esaya 1:18) Nomba mulingile ukucitapo fimo ifilingene ne fyo mulepepela. Ica kumwenako, mufwile ukukosapo ukuleka ukutamba fyonse ifye shiku no kuleka ukwangala na bacita ifyabipa. *
Nga ca kuti mulefilwa ukuleka ukwikataula ifya mfwalo, ebeniko abafyashi benu Abena Kristu nelyo umunenu uwakosa mu kupepa kabili uwamutemwa. *—Amapinda 1:8, 9; 1 Abena Tesalonika 5:14; Tito 2:3-5.
^ para. 1 Ukwikataula ifya mfwalo kufikataula mu musango wa kuti umuntu asuka apeema.
^ para. 2 Abengi abakwata amakompyuta mu mayanda, basalapo ukubika kompyuta pa ncende apa kuti abantu na bambi balemona. Na kabili, bamo balashita amaprogramu ya pa kompyuta ayacilikila ifyebo ifyo bashilefwaya pa kompyuta yabo. Na lyo line, takwaba amaprogramu ya pa kompyuta ayo mwingacetekela umupwilapo.
^ para. 1 Nga mulefwaya ukubelenga ifyebo na fimbi ifingamwafwa ukuleka ukwikataula ifya mfwalo, moneni Loleni! iya January-March 2007 pa mutwe wa kuti “Abacaice Bepusha Ukuti . . . Kuti Nacita Shani pa Kuti Ndeke Ici Cintu Cabipa?” na pa mabula 205 ukushinta ku 211 mu citabo ca kuti Ifipusho Abacaice Bepusha—Ifyasuko Fibomba, Volyumu 1.
