Amulidaaguni unguaü aban luriban échuni le agadeirubalin wamadagua luma Bungiu, adügati lun hawouguounrügü lan gürigia hasaminara ani gadei lumuti giñe wasaminan. Gürigia ha gawagubalin bisiu le, aba harihiniña híbiri gürigia kei adibiri lun hagalumaruni luriban hayumahan. Marihin hamuti agamariduni kei aban manera lun larufudún ínsiñeni hadan bián gürigia, ariha hamuti kei aban katei lúnrügü hagundaarun luagu murusun oura ani gáluma haméime hayumahan, gama lumoun, luágurügüñein murusun oura lagalumara. Dan le hamulidaagun gürigia houngua, gánwountimarügüti hayumahan hadügün magíaguni lidan agamariduni luma amu burí iwiyei (Kolosana 3:5).

Abürühati apostolu Pábulu: “Niduheñu hínsiñetiña nun [...]. Ligía lunti lubéi wachibuni sun luwuyeri iwiyei wawariua, dandu luéi wágubu kei tuéi wawani. Houcha wamá lun sandu wamá ligibugiñe Bungiu, lau lueirin inebesei le wawagubei lun” (2 Korintuna 7:1). Hénrenguti houn saragu gürigia hagunfuliruni dimurei burí le, mosu háfaagun; ani moun lumuti labuchadun hawagu, lugundun  ‘gíchigaditi Heowá ferudun’ ani aranseñu liña lun lídehan (Sálumu 86:5; Lúkasi 11:9-13). Háfuga anihein dan héiguadunya, gama lumoun, arufudatiña aban igaburi buiti lugundun sandí hamuti gadurun hamá ani áfaaguatiña lun méiguadunya hamá. Maweiyasun wamá abulieidei “wéiritimati [lan] Bungiu sügǘ tau wanigi, lugundun subudi lan sun katei lun” (1 Huan 3:20). Meteniti Bungiu lun sun wafigoun, téniti lun sun igaburi le wawagubei. Subudi lumuti buidu sun gádantiwa, gudemehabuti woun dan le wamuriahani luma. Ligíati, mígira waméi wafurieidun lun lau ǘnabuguni tídangiñe sun wanigi, ítara kei lamuriahan aban irahü ídemuei luma lúguchi dan le megei lani. Chóuruti gayara lan larumadahani Heowá wasaminan (Sálumu 51:1-12, 17; Isaíasi 1:18). Gama lumoun, úati buídurügü lan wafurieidun, mosu úara lan le wadügübei luma wafurieidun ani mosu desidírü wamá wígiruni luriban échuni, kéiburi tariawagún iyawaü lánina agamariduni ani ígira wamañame hagübüri umadagu. *

Anhein asigira turóbuli le, masaminara humá bián wéiyaasu lubá hadimurehan hama hagübürigu kristiánu o luma aban íbiri le derebuguhali lidan lafiñen le busenti líderagunün (Ariñawagúni 1:8, 9; 1 Tesalónikana 5:14; Titu 2:3-5). *