Kupinya-pinya mujimba yili yimwe ndako yipi yize yakuneha kuzo ni kupihisa manyonga. * Mutu yoze wakupinya-pinya mujimba wenyi mahasa kuputuka kunyonga ngwe akwo kali atu waze iye analisumbakenya no hanga alivwise kuwaha. Kuli iye kulisumbakenya kuchishi kupwa jila yakusolwelamo zango, alioze muchipwa ngwe yimwe jila yakuhuzulwilamo usolo wenyi. Alioze kulihuzuluka chino chili cha mashimbu akehe. Kwamba pundu, kupinya mujimba kuchishi kushiha yitanga ya “utanji, ni luchisa, ni kusasaminya, ni usolo upi,” alioze yakwokesa usolo wacho.​—A-Kolosu 3:5.

Postolo Paulu kasonekene ngwenyi: “Akwetu a zango, tulipemesenu ku luchisa mweswe wa musunya ni spiritu, tukamanunune usandu ni woma kumeso ja Zambi.” (2 A-Korindu 7:1) Nyi chinakaliwa kwecha yitanga yino nihindu kanda uhonga. Mumu Yehova kali “mukwa kukonekena” nawa makukwasa. (Samu 86:5; Luka 11:9-13) Kwamba pundu, nyi mbunge ye yinalipikala nawa unase tachi hanga weche ndako yacho, chipwe ngwe hi chashi ko, chino chinalumbunuka ngwo unazange kwecha yitanga yacho. Iwuluka ngwe “Zambi iye munene wahiana mbunge jetu, kananyingika yuma yeswe.” (1 Yoano 3:20) Zambi kakumona muli yetu yuma yinji yipema kuhiana shili yetu, iye kakumona utu wetu wamwenemwene. Yehova kanatunyingika kanawa, iye kakutwivwa muze twakumwita hanga atusolwele keke. Kashika, kanda tuzeia kufupa ukwaso wa Zambi ni kulikehesa cheswe ha kulemba ni mbunge yeswe, ngwe chize mwana akulinga muze mafupa ukwaso wa tato ha kupalika mu yipikalo. Yehova kakuwahisa mbunge yitoma. (Samu 51:1-12, 17; Izaia 1:18) Chochene, yena watamba kukwata yiyulo yipema kulita ni yilemba ye. Chakutalilaho, watamba kusa tachi hanga wehuke masepa api nawa ni yizulie ya sonyi. *

Nyi ndako ye ya kupinya-pinya mujimba yinanunga, hanjika ni tatenu hanji noko chipwe ni umwe sepa yoze wajama mu ufulielo mu chikungulwila. *​—Yishima 1:8, 9; 1 A-Tesalonika 5:14; Titu 2:3-5.