Dule walagwengi na galagwensur abgan imagdiile Babgi bangudoed, ar na eginbi binsadii gudoed, geb unnila ibmar isganaginbi binsadi gudbaloed. Deyob damaladi dule baid daggalile unnila ebo galagwensur guedgi yog binsaardamalad, degsoggu unnila omebo gabedginbi binsadamalad, ome sabguedgindi binsasurdamalad, unnila na uggiar yeer iddogedginbi binsadamarsunnad. Auggi dule deyob na abgan imagdiile ar uggiar binsa yeer iddogoed. Dule degi daele soglesulid bar neg sidsigi omeganbo galagwensur gudi guosurye, agga bur bule aa ibmarginbi binsadsunnoed (Colosenses 3:5).

Apóstol Pablo sogsad: “Gwenagan, an na be sabemalad, weyob anmarga ibmar nuegan uglegoye soglessoggu, bela ibmar isgana anmar sangi naid, degi, anmar burbagi nanaid osulomarsun, adi, Bab Dummad dobeggwagwadba, gaddig gwage swilidig gumai anmar gumarsun” (2 Corintios 7:1). Abar dulemar we ibmar imagdidiidga undar gusdaed we ibmar indaggega, auggi nabir indagleged, geb we dule we ibmar imagdiid indassundibe Jehovádi ‘isgussuliyob we dule daggoed’ (Salmo 86:5; Lucas 11:9-13). We ibmar indasad sorba, sun dule gannar  aa ibmar imagbalid, auggi dule we ibmar isgana indagbiele, mag na iddogoed nosbali, degsoggu alamagdabaloed indaggega. Mer anmar iego “Bab Dummad anmar gwage iddogedba bur dummadid, degine, Bab Dummad bela ibmar wis[balid]” (1 Juan 3:20). Babdi unnila anmar isgudiidginbi addagmasulid, edina bela anmar ibmar imagdiid dagmaid, degsoggu anmar ese bendagged egidsalile wile anmar dagmadaed. Igi burwigan na babgangi wiledamoga, aaga anmar ise wilegar Babse goled abeleged, geb anmar mag na iddobalir gebed walagwengindi anmar ibmar isgana indaggosur guoed. Degsoggua Jehová nabir anmar bendagged mer anmar doggus buggib binsadii guega (Salmo 51:1-12, 17; Isaías 1:18). Auggi soglesulid be Babse golerbii unniguarye, anmar alamagna gubalir gebed we ibmar indaggega, aaga pornografía dagged nuedsulid, geb ayamar isganagan niggued nuedsurbalid. *

Bega beedse guele we ibmar indaggega be babbo (be nanbodibe) sunmaggo, gwenagan nue Bab igarba nai gudimaladbodibe (Proverbios 1:8, 9; 1 Tesalonicenses 5:14; Tito 2:3-5). *