ITRE XAA MEKUN
Trije Pi La Hna Majemin Ka Ngazo, Ene La Troa Qene Tratraijëne La Kahmitrötre Së Kö
Hetre ketre hna majemine ka ngazo xajawa i Akötresie, ene la troa qene tratraijëne la kahmitrötre së kö, hnene laka kola sipu kuci ngazo caas, nge ka aciane la itre mekune ka ngazo. Ame la atr ka qene tratraijëne la kamitrötre i angeic, tre, maine jë tro fe hë angeic a xome la itre xan ceitu me itre ewekë nyine troa kuci ngazo memin; e goeënë hë la ketre atr traqa mina pi hi la itre mekune ka ngazo. Thaa angeice hmaca kö a goeëne la ce meköle trefën, ceitu me edröne ne tro la lue trefën a ithawakeune la ihnimi nyidro, ngo göi tro hi a kapa la aja i ngönetrei, me hnepe ijine tro hi a triji hace me pi drei eloin. Ngo ame hi la hnepe ijine cili, tre, ka xoxopatre catre hi. Atreine hi tro sa hetrenyi la itre ewekë ka aijijë së troa humuthe la itre hnepe ngönetrei së göi “kuci ngazo, me thina ka sis,” ngo ame la troa qene tratraijëne la kahmitrötre së, tre, kolo pe lai a ahlëne itre ej.—Kolose 3:5.
Hna cinyihane hnei Paulo aposetolo, ka hape: “Loi e tro sha nyihnyawa shë kö qa ngöne la nöjei ka sisi asë ne la ngönetei memine la ua, kola apexejene la thina ka hmitöte ngöne la qoue Akötesie.” (2 Korinito 7:1) E jole koi së troa trongëne la itre trenge ewekë celë, hmeke jë nge huliwane jë la mejiun. Ame Iehova, tre, “ate sheng” pala hi Nyidrë, nge ka canga ixatua hi Nyidrë. (Salamo 86:5; Luka 11:9-13) Ketre, maine tro sa sipu jele ngazo së kö, nge easa catre troa thipetrije la hna majemine kuca cili, kolo hi lai a amamane ka hape, lolo la aqane ujë së, ngacama easa kei hmaca e itre xaa ijin. Mekune hnyawa kö së laka, “sisitia kö Akötesie hune la ite hni shë.” (1 Ioane 3:20) Thaa Akötresieti kö a goeëne hmekuje hi la itre ngazo së; Nyidrëti mina fe a goeëne asë la pengöne la atr. Pine laka atre easë hnyawa hi hnei Nyidrë, ene pe Nyidrëti a drenge cememine la hni ka menyik, la aqane xëwe fë së la akötre së. Qa ngöne lai, loi e tro pala hi sa thithi koi Akötresie cememine la hni ka ipië me thiina ka menyik, tune la ketre nekönatr ka tro kowe la keme i angeic e kola traqa la ketre jole koi nyën. Tro hë Iehova lai a amanathithi së me hamë së la ketre mekuthethewe ka wië. (Salamo 51:1-12, 17; Isaia 1:18) Eje hi laka, nyipi ewekë tro sa huliwa thenge la itre hne së hna sipone ngöne la itre thithi së. Tune mina fe la tro pala hi sa catre thele troa trije me neëne asë la nöjei aqane kuci huliwa ka sis, tune lo itre iatr ka ngazo, itre nyine tro lai a kötren, ka ceitu fe memine la itre atr ka kuca la thiina ka sis. *
Maine jole pala hi koi së troa nue la qene tratraijëne la kahmitrötre së, pane ce ithanatane ju la jole cili memine la ketre Keresiano kem maine thin, maine ketre enehmu pena ka macaj ngöne la götrane la ua nge trene ihnimi koi së. *—Ite Edomë 1:8, 9; 1 Thesalonika 5:14; Tito 2:3-5.
^ par. 2 Celë hi matre nyimutre la itre hnepe lapa ka thupëne la aqane tro angatr a huliwane la ordinatör e hnine la hnalapa, loi e troa nyi göhnene ngöne la gaa mama koi itre atr e hnine la uma. Ketre, ame la itre xaa hnepe lapa, tre, angatr a itöne la ketre porogaram ka troa sawa la itre ewekë ka ngazo troa hane lö hnine la ordinatöre i angatr. Ngo eje hi lai laka, pëkö ka atrein enehila troa sawa asë la nöjei ewekë ka ngazo troa lö hnine la ordinatöre së.
^ par. 1 Maine kola aja ithuemacanyi ka lolo nyine troa ngaan la hna majemin ka ngazo, ene la troa qene tratraijëne la kahmitrötre së, tre, goeëne ju la hna cinyihane hna hape, “Les jeunes s’interrogent... Comment vaincre cette habitude ?” ngöne la Réveillez-vous ! ne Nofeba 2006, me itus Les jeunes s’interrogent — Réponses pratiques, götrane 205-11.
