K’i ɲɛfɛla mɔmɔ walisa ka cɛnimusoko nege wasa i kelen ni kelen, o ye delinanko ye min ka gwo Ala ye. A be mɔgɔ lasun dɔɔni dɔɔni ka kɛ hasiri ye ani a b’a ka miiriyaw nɔgɔ. Mɔgɔ min b’o koo kɛ, a be laban k’a jati ko tɔɔw be yen ale ka cɛnimusoko nege wasali dɔrɔn lo kama. O ɲɔgɔnna mɔgɔ fɛ, cɛnimusoko tɛ kanuyako ye tugun, nka wale gwansan lo a be min kɛ k’a yɛrɛ ninsɔndiya dɔɔni. Cɛnimusoko nege min gwanna a la, hali n’a y’o wasa, o nege bena tila ka gwan a la tugun. Tiɲɛn na, mɔgɔ min b’a cɛya wala a musoya mɔmɔ, sanni a k’a “jogow faga, o kɔrɔ, kakalaya ni nɔgɔlenya ni ko jugu nege,” ale b’o negelajugu lawuli a yɛrɛ la le.—Kɔlɔsikaw 3:5, ABM.

Ciden Pol ye kerecɛnw ladi ko fɛɛn o fɛɛn be se k’u fari n’u ka miiriliw nɔgɔ, u k’u yɛrɛ saniya o ma ani u ka saniyali dafa ni Ala ɲɛsiran ye (2 Korɛntikaw 7:1). N’a ka gwɛlɛ i ma ka tugu o ladilikan kɔ, kana i fari faga. Jehova be “sɔn ka yafali kɛ” tuma bɛɛ ani ka mɔgɔ dɛmɛ (Zaburuw 86:5; Luka 11:9-13, ABM ). Tiɲɛn na, i dusukun b’i kɛlɛ minkɛ, ani komi i b’i jijara k’o delinanko dabila, o b’a yira ko miiriya ɲuman b’i kɔnɔ hali n’i be segi a kan tuma kelen kelen. I k’a to i hakili la fana ko “Ala ka bon ni an dusukun ye, ale bɛ fɛn bɛɛ dɔn.” (1 Zan 3:20, ABM ). Ala tɛ dan k’an ka jurumukow dɔrɔn filɛ, nka a be an ka koo tɔɔw bɛɛ kala ma. O lo b’a lasun ka hinɛ an na ani k’an lamɛn tuma min na an b’a delila ko a ka makari an na.  O kama, i ko deen b’a ɲɛsin a faa ma cogo min na n’a hakili ɲagamina, kana sɛgɛn k’i ɲɛsin Ala ma ni majigilenya ye ani k’a deli sɔbɛ la. Jehova bena i duga ani ka dusukun ɲuman di i ma (Zaburuw 51:3-14, 19; Ezayi 1:18). Nka, i ka kan ka koo tigitigi dɔw kɛ fana ka kɛɲɛ n’i ka deliliw ye. Ɲɛyirali fɛ, i ka kan k’i yɛrɛ tanga porno sifaw bɛɛ ma ani jɛnɲɔgɔn juguw ma. *

N’a sɔrɔ i delinanko lo k’i ɲɛfɛla mɔmɔ walisa ka cɛnimusoko nege wasa i kelen ni kelen. N’i ma se k’o dabila, i k’a ɲɛfɔ i somɔgɔ dɔ ye min ye kerecɛn ye wala i teri dɔ ye min kɔgɔnin lo Alako ta fan fɛ ani a b’a janto i la. *—Talenw 1:8, 9; 1 Tesalonikaw 5:14; Tite 2:3-5.