Abasi asasua owo ndifiọn̄ọ ndido idan̄ n̄kop uyụhọ. Owo emi anamde utọ n̄kpọ oro esima ndikere oburobụt n̄kpọ ye nte enye akpanamde mme n̄kpọ oro. Enye esinyụn̄ ọtọn̄ọ ndise mme owo nte mbon emi enye akpadade oyụhọ udọn̄ idan̄ esie. Enye isidaha idan̄ nte n̄kpọ oro asan̄ade n̄kpọ ndomokiet ye ima, edi esida nte n̄kpọ oro edinamde enye okop uyụhọ ke ebe oro, inyụn̄ inam ọkpọsọn̄ udọn̄ idan̄ esie osụhọde. Edi isisụhọkede ibịghi. Utu ke ndinam owo owot mme ndido idem esie man etre “use, mbubiam ido, ọkpọsọn̄ udọn̄ idan̄,” ndifiọn̄ọ ndido idan̄ n̄kop uyụhọ esikam ananam mme n̄kpọ emi ọdọn̄ owo.​—Colossae 3:5.

Apostle Paul ọkọdọhọ ete: “Ndima, ẹyak nnyịn iyet kpukpru se isabarede obụkidem ye spirit ifep ke idem nnyịn, inam edisana idaha nnyịn ọfọn ama ke edibak Abasi.” (2 Corinth 7:1) Edieke ọsọn̄de fi ndinam emi, kûkere ke okwo okụre. Jehovah eben̄e idem ndifen nnọ fi nnyụn̄ n̄n̄wam fi. (Psalm 86:5; Luke 11:​9-13) Esịt ndibiom fi ye afo ndidomo nditre idiọk edinam emi, kpa ye oro esiduede afiak anam ndusụk ini, owụt ke emenen̄ede oyom ndinam se ifọnde. Ti ke ‘Abasi okpon akan esịt nnyịn onyụn̄ ọfiọk kpukpru n̄kpọ.’ (1 John 3:20) Idịghe ndudue nnyịn kpọt ke Abasi esikụt; enye ọfiọk ata owo emi nnyịn idide. Emi esinam enye okop n̄kpeubọk ofụri esịt nnyịn onyụn̄ atua nnyịn mbọm. Ntre, ukem nte eyen mîsikpaha mba ndika mbịne ete esie ke ini  enyenede mfịna, kûkpa mba ndisụhọde idem mbọn̄ akam nnọ Jehovah ke ofụri esịt. Enye ayanam esịt etre ndibiom fi. (Psalm 51:​1-12, 17; Isaiah 1:18) Nam se ọbọn̄de akam aban̄a. Ke uwụtn̄kpọ, n̄wana nte ekekeme tre ndikot n̄wed idan̄ m̀mê ndise ndise idan̄, nyụn̄ tre idiọk nsan̄a. *

Edieke mûkemeke nditre ndifiọn̄ọ ndido idan̄ n̄kop uyụhọ, mbọk neme ye ete m̀mê eka fo edieke enye edide Christian, mîdịghe neme ye eyenete emi ọsọn̄de idem ke esop, emi afo ekperede. *​—Mme N̄ke 1:​8, 9; 1 Thessalonica 5:14; Titus 2:​3-5.