Hmoob ib txwm txaj muag piav txog tej uas yuav hais no, tiamsis yuav tau piav kom meej sawvdaws thiaj yuav to taub tias Yehauvas xav kom nws cov tibneeg coj li cas tiag. Qhov uas  tibneeg xuas lossis rhoob chaw mos yeej pab tsis tau lawv txojkev ntseeg thiab yuav ua rau lawv ntshaw tej yam uas qias tsis huv. Tej zaum nws yuav saib luag lwm tus zoo li tej khoom ua si uas siv tas pov tseg xwb. Tsis tas li ntawd, nws yuav xav tias txojkev pw ua niam txiv tsuas yog kom tau kev lomzem nkaus xwb, tsis yog kev hlub. Tiamsis nws tsis ras tias lomzem ib vuag xwb. Qhov tseeb tiag, tus neeg ntawd yuav hajyam ntshaw ua tej kev phem uas phau Vajlugkub qhia tias yuav tsum muab “tua pov tseg.” Tej kev phem xws li “kev ua nkauj nraug, kev ua phem ua qias, kev ntshaw” uas tsis raug cai.​—Khaulauxi 3:5.

Tus tubtxib Povlauj sau tias: “Cov kwvtij uas kuv hlub, . . . peb yuav tsum ua neeg zoo kawg nkaus thiab paub ntshai Vajtswv. Peb yuav tsum tso plhuav tej kev txhaum uas peb ua thiab peb xav huv tibsi tseg.” (2 Kauleethaus [2 Khaulee] 7:1, TMZ) Yog tias nyuaj rau koj coj raws li nqe Vajlugkub no tsis txhob poob siab. Nco ntsoov tias Yehauvas zoo siab hlo “zam txim” rau koj thiab nws muaj lub siab xav pab koj tiag. (Ntawv Nkauj 86:5; Luka 11:9-13) Yog tias koj twb sib zog kawg li, los koj lub siab tseem nkaug koj qees, tsis txhob poob siab! Tej zaum qee zaus koj kuj rov qab qaug rau txojkev xyaum phem ntawd. Tiamsis yog tias koj muaj lub siab xav thum tiag tiag, Yehauvas yeej paub li ntawd. Nco ntsoov tias nws “yog tus loj dua peb lub siab thiab paub txhua yam huvsi.” (1 Yauhas 3:20) Vajtswv tsis yog pom peb tej kev txhaum nkaus xwb, tiamsis nws paub tias peb zoo li cas tiag. Qhov no pab kom Vajtswv khuvleej peb thiab cuab pob ntseg mloog peb tej lus thov. Yog li tsis txhob txaj muag thov Vajtswv. Koj yeej mus cuag tau Vajtswv ib yam li tus menyuam uas mus cuag nws leej txiv thaum nws raug teeb meem. Yog tias koj ua li no, Yehauvas yuav pab kom koj muaj lub siab tus thiab kom koj muaj kev sib raug zoo nrog nws. (Ntawv Nkauj 51:1-12, 17; Yaxaya 1:18) Tiamsis koj yuav tsum ua raws li koj thov thiab, xws li tsis txhob saib tej duab liab qab kiag li thiab tsis txhob poo cov neeg phem. *

 Yog koj thum tsis tau txojkev xyaum uas tsis zoo no, cia li nrog koj niam koj txiv uas paub Yehauvas tham, lossis nrog ib tug Khixatia uas paub tab tham. *​—Paj Lug 1:8, 9; 1 Thexalaunika 5:14; Titau 2:3-5.