Mmadụ igbo onwe ya agụụ mmekọahụ bụ àgwà na-adịghị Chineke mma. Ọ na-eme ka onye ahụ na-eche banyere naanị onwe ya nakwa ihe rụrụ arụ. * Onye ahụ nwere ike na-ele ndị ọzọ anya dị ka ihe e ji enwe mmekọahụ, ya bụ, ihe e ji egbo agụụ mmekọahụ. Ọ naghị ele mmekọahụ anya dị ka ihe di na nwunye ji egosi na ha hụrụ ibe ha n’anya, kama ọ na-ele ya anya dị ka ihe na-eme ka mmadụ nwee obi ụtọ nwa oge ma gboo agụụ mmekọahụ na-agụ ya mgbe ahụ. Ma agụụ ahụ ga-emecha gụwa ya. N’eziokwu, mmadụ igbo onwe ya agụụ mmekọahụ anaghị eme ka akụkụ ahụ́ ya “nwụọ n’ihe banyere ịkwa iko, adịghị ọcha, agụụ mmekọahụ” na-ezighị ezi, kama ọ na-akpali ya akpali.—Ndị Kọlọsi 3:5.

Pọl onyeozi dere, sị: “Ndị m hụrụ n’anya, ka anyị sachapụ onwe anyị mmerụ niile nke anụ ahụ́ na nke mmụọ, wee mee ka ịdị nsọ anyị zuo okè n’egwu Chineke.” (2 Ndị Kọrịnt 7:1) Ọ bụrụ na o siiri gị ike ime ihe ahụ Akwụkwọ Nsọ kwuru, ike agwụla gị. Jehova ‘dị njikere mgbe niile ịgbaghara’ gị ma nyere gị aka. (Abụ Ọma 86:5; Luk 11:9-13) N’ezie, n’agbanyeghị na o nwere ike ịbụ na ị na-eme ya mgbe ụfọdụ, obi nke na-ama gị ikpe na mgbalị ị na-eme ịkwụsị omume ahụ na-egosi na ị chọrọ ime ihe ọma. Chetakwa na “Chineke karịrị obi  anyị, marakwa ihe niile.” (1 Jọn 3:20) Ọ bụghị naanị mmehie anyị ka Chineke na-ahụ; ọ na-ahụ ihe niile banyere anyị. Ebe ọ ma ihe niile banyere anyị, ọ na-eji ọmịiko anụ arịrịọ anyị na-arịọsi ya ike ka o meere anyị ebere. N’ihi ya, adala mbà n’iji obi umeala na-ekpeku Chineke ekpere, dị ka nwatakịrị na-agakwuru nna ya mgbe o nwere nsogbu. Jehova ga-eme ka i nwee akọnuche dị ọcha. (Abụ Ọma 51:1-12, 17; Aịzaya 1:18) N’ezie, i kwesịrị ime ihe ahụ ị na-ekpe n’ekpere eme. Dị ka ihe atụ, ị ga-agbalịsi ike izere ihe ọ bụla na-akpali agụụ mmekọahụ nakwa ndị enyi ọjọọ. *

Ọ bụrụ na ọ dịrịghị gị mfe ịkwụsị igbo onwe gị agụụ mmekọahụ, biko kọọrọ nne gị ma ọ bụ nna gị bụ́ Onye Kraịst ma ọ bụkwanụ enyi gị hụrụ gị n’anya, nke ji ofufe Chineke kpọrọ ihe. *—Ilu 1:8, 9; 1 Ndị Tesalonaịka 5:14; Taịtọs 2:3-5.