Kʋzʋʋ pilinzi yɔɔ saɣyʋʋ kɛ lakasɩ nzɩ sɩfɛyɩ ɖeu Ɛsɔ ɛzɩdaa yɔ. * Siyeki nɛ ɛyʋ maɣzɩɣ e-ɖeke ɛ-yɔɔ nɛ sɩpɩzɩɣ nɛ sipisi ɛ-lɩmaɣza. Weyi ɛlakɩ mbʋ yɔ, ɛmaɣzɩɣ se ɛyaa lɛlaa kɛ kʋzʋʋ aleɣya wondu yem na. Ɛmaɣzɩɣ ɖɔɖɔ se leleŋ nɩʋ yɔɔ ɖeke ɛyaa sʋʋnɩ ɖama. Ɛ-ɛzɩdaa lɛ, kʋzʋʋ tɩkɛ mbʋ pɩ-yɔɔ abalʋ nɛ ɛ-halʋ patɩŋɩɣna nɛ pawɩlɩɣ ɖama sɔɔlɩm yɔ. Kʋzʋʋ pɩsɩ-ɩ kɔɖɛyɩ kʋʋ pʋyʋ yem na. Ɛlɛ ɛ-kɔɖɛyɩ ɛɛsɩkɩ nɛ pileɖi. Weyi ɛsaɣyɩɣ ɛ-kʋzʋʋ pilinzi yɔɔ se ɛnɩɩ leleŋ yɔ, ‘ɛɛñaɣzɩɣ ɛ-taa pilinzi ɛzɩ hayitu labʋ, azuluma labʋ, [kʋzʋʋ kɔɖɛyɩ nɛ] sɔɔlɩm kɩdɛkɛdɩm’ yɔ. Ɛlɛ eseɣtiɣ-si kiseɣtu.​—Koloosi 3:5.

Apostoloo Pɔɔlɩ tɔm se: “Koobiya kʋsɔɔlaa, ɖɩñalɩ ɖo-tomnaɣ yɔɔ azuluma nɛ lɩm cɩɖɩ cɩɖɩ, nɛ ɖɩtɛzɩ ɖeu Kɩbaɣlʋ ñamtʋ taa.” (2 Kɔrɛntɩ 7:1) Ye ŋɖiɣni lʋbʋ se ŋɖɔ tɔm tʋnɛ tɩ-yɔɔ yɔ, pɩtaanɩ-ŋ. Yehowa ‘kpeɣ’ kɩwɛɛkɩm nɛ ɛsɩɣnɩ-ɖʋ. (Keɣa 85:5; Luka 11:9-13) Toovenim taa lɛ, ye ñɛ-ɛhʋyɛ ɛkʋʋ ñɔ-tɔm yaa ye ŋñakɩ pana se ŋyele kɩdɛkɛdɩm mbʋ yɔ, pɩwɩlɩɣ  se ŋwɛnɩ lɩmaɣza kɩbana. Paa picoɖuu-ŋ wiɖii wiɖii yɔ, taasɔɔ se “Ɛsɔ kɩlɩ ɖa-laŋɩyɛ nɛ ɛsɩm pɩtɩŋa.” (1 Yohanɛɛsɩ 3:20) Yehowa ɛɛnaɣ ɖa-kɩwɛɛkɩm ɖeke na, ɛcɔŋnɩ ɖɛ-ɛyʋtʋ maɣmaɣ. Ɛsɩm-ɖʋ camɩyɛ, pɩ-yɔɔ ɛnaɣ ɖa-pʋtɔdɩyɛ nɛ ewelisiɣni-ɖʋ ye ɖɩtɩmɩɣnɩ-ɩ yɔ. Ðɔkɩ kpam, luzi ña-tɩ nɛ ŋtɩmnɩ Ɛsɔ ɖoŋ ɖoŋ ɛzɩ pɩɣa ŋga kɛwɛ kaɖɛ naɖɩyɛ taa nɛ kɔñɔtʋʋnɩ ka-caa yɔ. Yehowa kaɣ-ɖʋ sɩnʋʋ nɛ ɖɩwɛɛnɩ ɛhʋyɛ kɩbanɖɛ. (Keɣa 50:3-14, 19; Izaayii 1:18) Pʋpɔzʋʋ ɖɔɖɔ se ña-lakasɩ ɩla nɔɔ kʋɖʋmaɣ nɛ ña-adɩma. Pɩwɛɛ se ŋñaɣ pana kpem nɛ ŋyele kʋzʋʋ kɩlɛmɩŋ cɔnʋʋ nɛ ŋse taabalɩyɛ kɩdɛkɛdɩyɛ. *

Ye ŋɖiɣni ñaɣʋ pana se ŋyele ña-kʋzʋʋ pilinzi yɔɔ saɣyʋʋ, ɛlɛ pɩwɛ-ŋ kaɖɛ yɔ, ɖitendi-ŋ yɔɔdɩnɩ ña-lʋlɩyʋ weyi ɛkɛ Yehowa Aseɣɖe Tʋ yɔ yaa koobu weyi ɛpɩ fezuu taa nɛ ɛkɛ ña-taabalʋ kɩbanʋ yɔ. *​—Aduwa 1:8, 9; 1 Tesalooniki 5:14; Tiiti 2:3-5.