Masturbation kuh sie orekma in sritaclkihn monum ke inkacnek fohkfohk uh tiac ahkinsewowoye God. * Kain in orekma inge oruh sie mwet in nuhnkuh kacl sifacna ac ahkkulukye nuhnak lal uh. Sie mwet suc sritaclkihn mahnol el ac kuh in muhtwacwacack in liye mwet sahyac uh oacna mwet ma el kuh in oan yohroh. Nuh sin kain in mwet inge, ohsun luhn mukul ac muhtwacn ke mahno uh tiac ma in ahkkahlwemye luhngse, a mwe na ahkfalye kena kuluk lal uh. Tuhsruhktuh, kena kuluk se ma ahkfalyeyuck inge ma nuh ke kihtin pacl na. Mweyen, sie mwet el fin sritaclkihn mahnol, ma inge ac tiac ahkwacngihnyelah kena kuluk lal uh, a ac puhrakack “kain in ma kuluk luhn moul in kosro, kuhtwena luhmah fohkfohk, [ac] luhng luhn ikoac.”​—Colossae 3:5.

Mwet sap Paul el suhmuhslah: “Mwet kawuck sacohk luhk, wuhlelah inge nuhkewa ma nuh sesr. Ke ma inge, lwelah kuht in sifacna ahknwacsnwacsye kuht liki ma nuhkewa suc ac ahkfohkfohkye mahnosr kuh nguhnasr, ac lwelah kuht in arlacna  muhtahl ke kuht moul in ahkfuhlwactye God.” (Luo Corinth 7:1) Fin upac nuh sum in ahkos kahs inge, nik kom fuhleack. Jeova el ahkolah pacl nuhkewa in “nuhnak muhnahs nuh sesr” ac in kahsre kuht. (Psalm 86:5; Luke 11:9-13) Inse toasr lom kac ac kwacfeacng lom in sislah ohiyac kuluk se ma kom pahlah kac inge ahkkahlwemye ohiyac wo lom, finne oasr pacl ma kom muhnahslah kuh puhtatlac. Esam pac lah “God el fuhlwact liki nuhnak luhn insiacsr, ac el etuh ma nuhkewa.” (Sie John 3:20) God el liye insiacsr nohfohn, el tiac liye ma kuluk lasr uh muhkwena. Etwacack lal kacsr uh oruh el kuh in pahkomuhtahsr ke kuht puhruhe nuh sel ac siyuck ke nuhnak muhnahs. Pwacnacng, nik kom ahlohloh in ngwet nuh sin God ke kom puhruhe nuh sel ke inse puhsisacl ac inse pwacye, oacna sie tuhlihk suc som nuh yurin pahpah tuhmwacl ke pacl ma el sun ma upac. Jeova el ac fah kahsre kom ac ahkinsewowoye kom ke sie nuhnak ac puhlakihn ma tiac ahkkulukye kom. (Psalm 51:1-12, 17; Isaiah 1:18) Ac in fal nuh ke puhruhe lom uh, oasr pac ma sahyac ma kom enenuh in oruh. Ke sie mwe puhpuhlyuck, kom enenuh in kwacfeacng na pwacye in fahsr liki kain in petsac fohkfohk ac asruoki kuluk nuhkewa. *

Fin upac nuh sum in sislah ohiyac kuluk se inge, nuhnak muhnahs sramsram nuh sin pahpah kuh ninac kiyom suc oasr ke luhlahlfongi uh kuh nuh sin sie mwet lili suc pah in nuhnak ac orekma ac suc fototo nuh sum. *​—Soakas 1:8, 9; Sie Thessalonica 5:14; Titus 2:3-5.