ພາກຜະຫນວກ
ຈົ່ງເອົາຊະນະການສະຫນອງຄວາມປາຖະຫນາທາງເພດດ້ວຍຕົວເອງ
ນິດໄສຢ່າງຫນຶ່ງທີ່ພະເຈົ້າບໍ່ພໍໃຈກໍຄືການສະຫນອງຄວາມປາຖະຫນາທາງເພດດ້ວຍຕົວເອງ. ນິດໄສນີ້ເຮັດໃຫ້ຄົນເຮົາມຸ່ງຄິດເຖິງແຕ່ຕົວເອງແລະເຮັດໃຫ້ຈິດໃຈເສື່ອມຊາມລົງ. * ນອກຈາກນັ້ນ ຜູ້ທີ່ສະຫນອງຄວາມປາຖະຫນາທາງເພດດ້ວຍຕົວເອງອາດມອງວ່າຄົນອື່ນເປັນພຽງວັດຖຸທາງເພດ ຫລືເປັນເຄື່ອງມືເພື່ອສະຫນອງຄວາມຕ້ອງການທາງເພດ. ຄົນແບບນັ້ນມອງວ່າເພດສຳພັນບໍ່ແມ່ນການສະແດງຄວາມຮັກລະຫວ່າງສອງບຸກຄົນ ແຕ່ເປັນການຕອບສະຫນອງທາງກາຍເພື່ອຄວາມເພີດເພີນບາງຄັ້ງບາງຄາວແລະເປັນການຜ່ອນຄາຍຄວາມເຄັ່ງຕຶງທາງເພດ. ແຕ່ການຜ່ອນຄາຍນັ້ນເປັນພຽງຊົ່ວຄາວ. ໃນຄວາມເປັນຈິງ ແທນທີ່ຈະກຳຈັດທ່າອ່ຽງແບບໂລກເຊິ່ງປາກົດໃນອະໄວຍະວະຂອງຮ່າງກາຍ “ເຊັ່ນ ການຜິດສິນທຳທາງເພດ, ຄວາມບໍ່ດີບໍ່ງາມ, ຄວາມຊົ່ວຊ້າລາມົກ” ການສະຫນອງຄວາມປາຖະຫນາທາງເພດດ້ວຍຕົນເອງພັດກະຕຸ້ນທ່າອ່ຽງນັ້ນ.—ໂກໂລດ 3:5, ທ.ປ.
ອັກຄະສາວົກໂປໂລຂຽນວ່າ “ພວກພີ່ນ້ອງຜູ້ເປັນທີ່ຮັກເອີຍ . . . ເຮົາທັງຫລາຍຕ້ອງຊຳຮະຕົວໃຫ້ປາສະຈາກການຖ່ອຍຮ້າຍແຫ່ງເນື້ອຫນັງແລະຈິດວິນຍານທຸກຢ່າງ ແລະກະທຳຄວາມບໍລິສຸດໃຫ້ສຳເລັດໃນຄວາມຢ້ານຢຳພະເຈົ້າ.” (2 ໂກລິນໂທ 7:1) ຖ້າເປັນເລື່ອງຍາກທີ່ເຈົ້າຈະເອົາໃຈໃສ່ຖ້ອຍຄຳດັ່ງກ່າວ ຢ່າຟ້າວຮູ້ສຶກຫມົດຫວັງ. ພະເຢໂຫວາ “ພ້ອມຈະຍົກຜິດ” ແລະໃຫ້ການຊ່ວຍເຫລືອ. (ຄຳເພງ 86:5; ລືກາ 11:9-13) ທີ່ຈິງ ຫົວໃຈຂອງເຈົ້າທີ່ຕຳຫນິຕົວເອງແລະການທີ່ເຈົ້າພະຍາຍາມເຊົານິດໄສນັ້ນກໍບົ່ງບອກເຖິງເຈຕະນາທີ່ດີ ເຖິງແມ່ນວ່າຈະຫວນກັບໄປເຮັດເປັນບາງຄັ້ງບາງຄາວ. ຈົ່ງຈື່ໄວ້ເຊັ່ນກັນວ່າ “ພະເຈົ້າໃຫຍ່ກວ່າໃຈຂອງພວກເຮົາແລະຮູ້ຈັກສັບພະທຸກສິ່ງ.” (1 ໂຢຮັນ 3:20) ພະເຈົ້າເຫັນຫລາຍກວ່າບາບທີ່ເຮົາເຮັດ; ພະອົງເຫັນຫມົດຕົວຕົນຂອງເຮົາ. ເນື່ອງຈາກພະອົງຮູ້ທຸກສິ່ງກ່ຽວກັບຕົວເຮົາ ພະອົງຈຶ່ງສາມາດຟັງເຮົາຢ່າງເຫັນອົກເຫັນໃຈເມື່ອເຮົາອະທິດຖານດ້ວຍຄວາມຈິງໃຈເພື່ອຂໍຄວາມເມດຕາ. ດັ່ງນັ້ນ ຢ່າລັງເລທີ່ຈະຫັນເຂົ້າຫາພະເຈົ້າດ້ວຍຄວາມຖ່ອມໃຈແລະອະທິດຖານຢ່າງຈິງຈັງ ເຊັ່ນດຽວກັບລູກທີ່ເຂົ້າຫາພໍ່ເມື່ອມີບັນຫາ. ພະເຢໂຫວາຈະໃຫ້ເຈົ້າມີສະຕິຮູ້ສຶກຜິດຊອບທີ່ສະອາດ. (ຄຳເພງ 51:1-12, 17; ເອຊາອີ 1:18) ແນ່ນອນວ່າເຈົ້າຈຳເປັນຕ້ອງເຮັດສິ່ງທີ່ຈຳເປັນເພື່ອໃຫ້ສອດຄ່ອງກັບຄຳອະທິດຖານຂອງເຈົ້າ. ຕົວຢ່າງເຊັ່ນ ເຈົ້າຈະພະຍາຍາມຫລີກລ່ຽງສື່ລາມົກທຸກຮູບແບບລວມທັງການຄົບຫາທີ່ບໍ່ດີ. *
ຖ້າເຈົ້າຍັງມີບັນຫາກ່ຽວກັບການສະຫນອງຄວາມປາຖະຫນາທາງເພດດ້ວຍຕົວເອງ ຂໍໃຫ້ບອກເລື່ອງນີ້ກັບພໍ່ແມ່ທີ່ເປັນຄລິດສະຕຽນຫລືຜູ້ທີ່ອາວຸໂສຝ່າຍວິນຍານທີ່ຫ່ວງໃຍເຈົ້າ. *—ສຸພາສິດ 1:8, 9; 1 ເທຊະໂລນີກ 5:14; ຕິໂຕ 2:3-5.
^ ຂໍ້ 1 ການສະຫນອງຄວາມປາຖະຫນາທາງເພດດ້ວຍຕົນເອງ ຄືການເອົາມືລູບຫລືຖູອະໄວຍະວະເພດ ໂດຍປົກກະຕິແລ້ວເປັນສາເຫດພາໃຫ້ເຖິງຈຸດສຸດຍອດຂອງຄວາມຮູ້ສຶກທາງເພດ.
^ ຂໍ້ 2 ເພື່ອຄວບຄຸມການໃຊ້ຄອມພິວເຕີໃນເຮືອນ ຫລາຍຄອບຄົວຕັ້ງຄອມພິວເຕີໄວ້ໃນບໍລິເວນທີ່ຄົນໃນເຮືອນຈະເຫັນຫນ້າຈໍໄດ້ງ່າຍ. ນອກຈາກນັ້ນ ບາງຄອບຄົວຊື້ໂປຣແກມຄອມພິວເຕີທີ່ກັ່ນຕອງເນື້ອໃນທີ່ບໍ່ເຫມາະສົມອອກໄປ. ແນວໃດກໍຕາມ ບໍ່ມີໂປຣແກມໃດທີ່ໄວ້ໃຈໄດ້ຢ່າງສົມບູນແບບ.
^ ຂໍ້ 1 ເພື່ອໄດ້ຮັບຄຳແນະນຳທີ່ໃຊ້ໄດ້ຈິງກ່ຽວກັບວິທີເອົາຊະນະການສະຫນອງຄວາມປາຖະຫນາທາງເພດດ້ວຍຕົວເອງ ຂໍໃຫ້ເບິ່ງບົດຄວາມ “ຫນຸ່ມສາວຖາມວ່າ . . . ຂ້ອຍຈະເອົາຊະນະນິດໄສທີ່ບໍ່ດີໄດ້ແນວໃດ?” ໃນຕື່ນເຖີດ ສະບັບເດືອນພະຈິກ ປີ 2006 (ພາສາໄທ) ແລະປຶ້ມຄຳຖາມທີ່ຫນຸ່ມສາວຖາມ—ຄຳຕອບທີ່ໃຊ້ໄດ້ຜົນ ເຫລັ້ມທີ 1 ຫນ້າ 178-182.
