Ku icuka ki mukwa o masila kwa moya o kona ku tahiseza mutu ku ba ni buitati ni mubonelo o fosahalile. a Hape, mutu ya icukanga u kona ku kalisa ku nga batu ba silama si sili sina feela ba ku eza ni bona tobali. Tobali ha i sa ezwa ka lilato, mi se i ngiwa feela sina kezo ya ku itabisa ka yona ni ku kulisa takazo ya tobali. Kono takazo yeo i kuliswa feela ka swalelele. Niti kikuli, mwa sibaka sa ku bulaya lilama za mubili ze tahisa litakazo za “buhule ni ze masila, ni maikuto a maswe [a buhule],” ku icuka ku tahiseza mubili litakazo zeo.—Makolose 3:5.

Muapositola Paulusi naa ñozi kuli: “Balatiwa, . . . lu ikenise kwa masila kaufela a nama ni a moya, lu nze lu peta ku ikenisa kwa luna ka ku saba Mulimu.” (2 Makorinte 7:1) Haiba mu fumana hahulu taata ku mamela manzwi ao, mu si ke mwa felelwa ki sepo. Kamita Jehova “wa lata ku swalela,” mi wa tusanga. (Samu 86:5; Luka 11:9-13) Kaniti, pilu ya mina ye sweli ku mi nyaza hahulu ni buikatazo bo mu sweli ku eza bwa ku tuhela mukwa wo—ku si na taba kuli fokuñwi mwa u kutelanga—li bonisa kuli mu na ni pilu ye nde. Hape mu hupulange kuli, “Mulimu ki yo muhulu  kwa lipilu za luna, mi u ziba litaba kamukana.” (1 Joani 3:20) Mulimu haa talimi feela libi za mutu; u bona mutu kaufela yena. Zibo yeo i tahisa kuli a kone ku utwa litapelo za luna za ku kupa kuli a lu bonise sishemo. Kacwalo mu si ke mwa katala ku lapelanga ku Mulimu ka buikokobezo ni ka pilu kaufela sina mwana ya matela ku bo ndatahe haa li mwa butata. Jehova u ka mi fuyaula ka ku mi fa lizwalo le li kenile. (Samu 51:1-12, 17; Isaya 1:18) Niteñi, mu swanela ku nga mihato ye lumelelana ni litapelo za mina. Ka mutala, mu swanela ku lika ka taata ku ambuka mifuta kaufela ya maswaniso a mapunu hamohocwalo ni balikani ba ba maswe. b

Haiba mu zwelapili ku fumana taata ku tuhela mukwa wa ku icukanga, mu ambole taba yeo ni mushemi wa Sikreste, kamba ni Mukreste ya hulile kwa moya kamba mulikani ya lilato. c—Liproverbia 1:8, 9; 1 Matesalonika 5:14; Tite 2:3-5.