Tim mar ng’ato tugo duong’ne e tieko gombo mar nindruok ok mor Nyasaye, omiyo ng’ato bedo gi paro mana mar miyore mor kendo omiyo ng’ato bedo gi paro mochido. Ng’at ma jatugo duong’ne nyalo dongo ka neno jomoko mana ka gik ma itiyogo e tieko gombo mag nindruok. Ochako neno nindruok, ok kaka tim mar nyiso hera e kind ji ariyo, to mana kaka tim ringruok makelo mor kuom kinde matin kendo tieko gombo mag nindruok. Kata kamano, tieko gombono en mana mar kinde matin. Adiera en ni, kar nego fuonni mag del kuom weche machalo, “terruok, tim ma ok ler, hera marach, gombo maricho,” tugo duong’ chiego fuonnigo.—Jo Kolosai 3:5.

Jaote Paulo ne ondiko kama: “Johera, . . . ber mondo walwokre a e chido mar ringruok kendo mar chuny, mondo wabed maler chuth kuom luoro Nyasaye.” (2 Jo Korintho 7:1) Ka podi ikedo matek mar tiyo gi wechegi, kik iol. Pile Jehova ‘oikore weyo’ kendo konyo. (Zaburi 86:5; Luka 11:9-13) Kuom adier, chunyi ma ng’adoni bura kod kinda miketo mondo iwe timno, kata obedo ni seche moko ipo kidokie, nyiso ni in gi paro maber. Ng’e bende ni, “Nyasaye duong’ moloyo chunywa, kendo ong’eyo duto.” (1 Johana 3:20) Nyasaye ok ne mana richowa kende; oneno dhano mangima. Nikech ong’eyo weche duto kuomwa, onyalo winjo kwayowa kokechowa mondo onyiswa ng’wono. Kuom mano, kik iol gi dhi ir Nyasaye kibolori e lamo moa e chunyi,  mana kaka nyathi madhi ir wuon mare sama en e chandruok. Jehova biro miyo ibed gi chuny maler. (Zaburi 51:1-12, 17; Isaiah 1:18) Kuom adier, dwarore ni ikaw okang’ mowinjore gi lamo mari. Kuom ranyisi, biro dwarore ni item matek mondo iwe ponografi e yorene duto, kaachiel gi weyo osiepe maricho. *

Ka chandruok ma in-go gi tim mar tugo duong’ni podi siko, wuo ane kuom wachno gi janyuol ma Jakristo kata osiepni ma odewi kendo motegno e winjruokne gi Nyasaye. *—Ngeche 1:8, 9; 1 Jo Thessalonika 5:14; Tito 2:3-5.