Nya bʼaʼn in nela toj twitz Dios aju in saqchan xjal tiʼj ttzʼalbʼil tuʼnju oʼkx in ximen tiʼjx ex in tzʼilix tnabʼil tuʼn. Aju xjal in bʼant jlu tuʼn jakule kubʼ t-ximen qa naq jun saqchbʼil qe txqantl, naq jun makbʼil jaku che ela toj twitz tuʼn ttzalaj. Aju xjal in bʼant jlu tuʼn mitiʼ (tiloʼ) in nel tnikʼ qa aju aj kykubʼ koẍeʼ kabʼe xjal jun yekʼbʼil jlu tiʼj kykʼujlabʼil ex nya oʼkx tuʼn ttzalaj jun xjal tjunalx toj chʼin ambʼil ex nya oʼkx tuʼn tel aju tajbʼil (tgan) tchibʼjil. Aju xjal in saqchan tiʼj ttzʼalbʼil naq toj chʼin ambʼil in tnaʼn aju bʼaʼn. Axpe ikx, mitiʼ in weʼ tajbʼil tchibʼjil tuʼn quʼn naq in tzaj mas tgan tuʼn ex in xi iqʼin tuʼn tiʼj yaẍbʼil (kyʼaʼjil) ex tiʼj ttzʼilil (Colosenses 3:5).

Kubʼ ttzʼibʼen apóstol Pablo jlu: «Aqeye erman at nkʼuʼje kyiʼje, [...] qtxʼjoʼmel tkyaqilju in tzʼilsante qchibʼjal ex in tzʼilsante qanmi; ex atwit tchi Dios tuj qwitz ex tuʼn t-xi qqʼon qibʼ te Dios tuʼn qajbʼen oʼkx te te jumajx» (2 Corintios 7:1). Kwest-xix in nela toj kywitz junjun xjal aju txokbʼil tuʼn qok te saq; naqtzen tuʼnj, mitiʼ tuʼn kykubʼ numj, quʼn kukx taj Jehová ‹tuʼn tkubʼ tnajsaʼn kyil xjal› ex tuʼn kytzaj tonin (Salmo 86:5; Lucas 11:9-13). Atle maj jaku che kubʼ tzʼaq jun ex juntl maj, naqtzun tuʼnj, in kubʼ kyyekʼun jun tbʼanel kyxim qa in kynaʼn qa otaq kubʼ kybʼinchen nya bʼaʼn ex qa in nok tilil kyuʼn tuʼn tkyaj kytzaqpiʼn jlu. Miʼ tzʼel naj tiʼj qkʼuʼj qa «ate Dios maʼ toklen twitz ju qanmi, ex ojtzqiʼn tkyaqil tuʼn» (1 Juan 3:20). Aj tok tqʼoʼn twitz qiʼj, nya oʼkx nok tqʼoʼn twitz kyiʼj qil, quʼn in nok tqʼoʼn twitz tiʼj tkyaqilju tkuʼx toj qanmi. Tuʼnju ojtzqiʼn tuʼn tkyaqilju in nikʼ toj qanqʼibʼil, in tzaj qʼaqʼin tkʼuʼj qiʼj aj t-xi qqanin qʼaqʼbʼil tkʼuʼj. Tuʼntzun aju, kukx qo naʼn Dios  tukʼe qʼuqbʼil qkʼuʼj ex qmansinku qibʼ, ik tzeʼn jun tal kʼwaʼl in xiʼ tukʼe ttat qa taj jun onbʼil. Ax tok (bʼaʼn ax), jaku bʼaj t-saqin Jehová qnabʼil (Salmo 51:1-12, 17; Isaías 1:18). Naqtzen tuʼnj, nya oʼkx tuʼn qnaʼn Dios; ax ikx ilxix tiʼj tuʼn tkubʼ qbʼinchaʼn aju in xi qqanin ex tuʼn tbʼajxix qximen tiʼ kbʼantel quʼn, ik tzeʼn tuʼn tel qikʼen tkyaqil wiq nya bʼaʼn tilbʼilal ex tuʼn miʼ tok qmojbʼan qibʼ kyukʼe nya bʼaʼn xjal. *

Qa at jun kwest tuʼn tkyaj ttzaqpiʼn tuʼn t-saqchan tiʼj ttzʼalbʼil, bʼaʼn tuʼn tyolin tukʼil ttat (moqa tukʼe tnan) aʼyeju o che okslan moqa tukʼe jun ermano (moqa tukʼe jun ermana) at tnabʼil ex at tkʼuʼj tiʼj (Proverbios 1:8, 9; 1 Tesalonicenses 5:14; Tito 2:3-5). *