Futithi ya kulyethetha ku vushwamwa ikathzivitha Njambi kuvihya, cho ikalingitha munu ashake kulithzivitha kuvwaha, oloni ikalumbula vithinganyeka vyendi. Munu uje wakala neyi futithi, natha kumona vakwavo kupwa vanu vanapande kulala mangana amanethe lishungu lyendi. Kethi kumona kulilala kupwa ngila ya kumwethelamo chithzemo, oloni ngwe ngila ya kulithzivitha kuvwaha na kumanetha lishungu lyendi. Oloni kulithzivitha kuvwaha kwa chifwa echi, kunapu lika kwa kathimbu kakandondo. Eyi futithi ya kwethetha ku vushwamwa kuyethi kuthsiya mashungu a kushaka kulinga “vupangala na mathzilo na mashungu amavi,” oloni ikawashambeya.—Kolose 3:5.

Kapositolo Paulu wathonekele ngwendi: “Vathamba vange, ngechi vene tulijeletheni ku vyuma vyoshe vije vijwaletha muvila nambe mwonyo, cho tupweni va kujela njwa ha kuyoya kwetu mu kuthingimika Njambi.” (2 Kolinte 7:1) Nga muli na kwonwa kupangetha awa majwi, cho kethi mujuke. Yehova ‘akathambetha’ vanu thimbu yoshe na kuvakwatha. (Myatho 86:5; Luka 11:9-13) Nga mulifwita kwechela eyi futithi nameme kwakukalu kulinga ngocho, cho mumwetha ngweni muli na mbunge yaivwa. Anukeni lalo ngweni “Njambi ikeye wakama manene kutuvakana chitakutaku chetu, cho athzivuka vyuma vyoshe.” (1 Yowano 3:20) Njambi kethi kutala ha vuvi vutukalingi, oloni akatala mu mbunge yetu. Mukemwo akatutolilila  nga tumulomba ngwetu atuthzivile ngothzi. Ngechi kethi mujuke, twaleleleni kulombela kuli Njambi ngwe muje mwanike alomba ishe mangana amukwathe nga ali mu vukalu. Yehova amikwatha mukale na chitakutaku cha kujela. (Myatho 51:1-12, 17; Isaya 1:18) Oloni munapande kupangela ha vyuma vimulomba. Chakumwenako, munapande kujenjuka ku vyuma vya vukwithzi vyoshe na ku vavuthamba vavavi. *

Nga futithi ya kulyethetha ku vushwamwa anga itwalelela, cho lekeni vithemi veni vaka-kutava, nambe muka-Kilisitu wa kuhya, nambe kavuthamba keni uje wamyaka mbunge. *—Vithimo 1:8, 9; 1 Tesalonika 5:14; Tito 2:3-5.