Ciyelezyo ca kucinya ivyanzwalo cisizanzya Leza, nupya cikalenga ukuti umuntu aelenganya sile pa vintu iviipe. * Umuntu aakacinya ivyanzwalo angatandika ukulola antu yauze kwati i vintu vya kumalilako sile insuna. Umuntu wa musango uu akatandika ukulola ukulaalana kwati i cintu sile icakulenga umwi ukuvwa ningo panono ukwaula ukulanga icitemwiko. Nomba ukuvwa ningo kuuko kukaya u kwa pa kasita sile akanono. Icikacitika i cakuti, ukucinya ivyanzwalo kusikoma ivilundwa vya mwili ndi vino Baibo ikalanda, lelo kukalenga umwi aelenganya pa “kulongozya, vya winyi, [na pa] nsuna.”—Kolose 3:5.

Mutumwa Paulo walemvile ukuti: “Mwe yacuza, Leza uwacita malayo yaa. Acino tulinzile kufumako ku vintu vyonsi vino vikakowezya mili nga ni mipasi itu. Acino pa koopa Leza twaezya kuya amuzilo.” (2 Kolinto 7:1) Ndi cakuti cikamutalila sana ukuvwila mazwi yaa, mutalinzile ukutoovoka. Yeova lyonsi ‘akatwelela uluse’ nu kutwazwa. (Masamu 86:5; Luka 11:9-13) I cumicumi, ukuyuvwa uyi nu kwezya na maka kuno mukacita ukuti mute iciyelezyo cii nanti cakuti limwi-limwi mukaswilizyapo ukucicita, cikaalanga ukuti muli nu kucimvya. Lyonsi mwaiusya ukuti “Leza wene umukulu ukuluta yakampingu itu.” (1 Yoane 3:20) Leza akaalola ivingi muli sweswe ukuluta sile ukulola maifyo; akaalola vyonsi muli sweswe. Cii cikalenga ukuti auvwa mapepo itu akupapata kunoli lino tukulenga ukuti atwelele.  Fwandi mutatonta ukupepa kuli Leza nu mwenzo winu onsi ala imuicefya, wa mwana aakaya kuli isi lino ali ni ntazi. Yeova alamupolelela ukuti muye na kampingu musuma. (Masamu 51:1-12, 17; Ezaya 1: 18) Lelo, mulinzile ukuombesya ukulingana na mapepo inu. Mulinzile ukusenka kuli vyonsi ivya uzelele nu kuvyuza iviipe. *

Ndi cakuti intazi ya kucinya ivyanzwalo yatwalilila, mulinzile ukunenako avyazi inu nanti cuza umwi wino mukalongana nawe uwakoma sana umu utailo. *—Mapinda 1:8, 9; 1 Tesalonika 5:14; Tito 2:3-5.