OSHIGWEDHELWAKO
Sinda uunkundi wokwiidhanena kiilyo yoluvalo
Okwiidhanena kiilyo yoluvalo okwo omukalo tagu yemateke Kalunga ngoka hagu humitha komeho iikala yokwiihola mwene nohagu nyateke omadhiladhilo gomuntu. Ngoka ha dhanene iilyo ye yoluvalo ohashi vulika a kale a tala ko yalwe kutya oye lile po owala okulongithwa momilalo. Omuntu a tya ngaaka iha tala ko omilalo dhi li oshinima shopahole, ihe ohe dhi tala ko owala dhi li oshinima shokwiinyanyudha pokathimbo opo a pepelelwe komahalo gopamilalo. Ihe epepelelo lya tya ngaaka olyopokathimbo owala. Odhoshili kutya aantu mboka ohaya pendutha uuhalu “ngashika oluhondelo, iipala, uuholume nuuhalu uuwinayi,” pehala lyoku wu dhipaga. — Kol. 3:5.
Omuyapostoli Paulus okwa nyola a ti: “Ookuume kandje aaholike, ano sho tu na omauvaneko ngaka agehe, natu iyogeni shaa shoka tashi nyateke olutu nenge omwenyo. Tu lalakaneni wo okukala aayapuki, tse tu tile Omuwa.” (2 Kor. 7:1) Ngele oshi li oshidhigu kungoye okutula miilonga oohapu ndhika, ino teka omukumo. Jehova ohe “tu dhimine po” aluhe nohe tu kwathele. (Eps. 86:5; Luk. 11:9-13) Ngele to ipe uusama shili noto ningi oonkambadhala opo wu ethe po omukalo ngoka, nonando ethimbo limwe oho ihaluka to shi ningi, otashi ulike kutya iikala yoye yokomutima oyi li nawa. Kaleka wo momadhiladhilo kutya “Kalunga oye omunene e vule eiyuvo lyetu nokwa tseya iinima ayihe.” (1 Joh. 3:20) Kalunga iha tala owala omayono getu, ihe oha tala omaukwatya getu omawanawa. Molwashoka oku tu shi nawa ohu uvu omaindilo getu ngele tatu mu pula e tu dhimine po.Onkene inatu vulwa okuya kuKalunga neifupipiko nokugalikana twa mana mo, ngaashi owala okanona haka matukile kuhe ngele ke li muupyakadhi. Jehova ote ke ku pa eiyuvo lya yela. (Eps. 51:1-12, 17; Jes. 1:18) Odhoshili kutya owu na okukatuka metsokumwe nomagalikano goye. Pashiholelwa, owu na okuhenuka okutala omafano giipala goludhi kehe neendathano ewinayi. *
Ngele uupyakadhi mboka wokukala to idhanene kiilyo yoluvalo otawu tsikile, oshinima shoka shi popya naavali yoye Aakriste nenge nakuume a pyokoka pambepo ngoka e na ko nasha nangoye. * — Omayel. 1:8, 9; 1 Tes. 5:14; Tit. 2:3-5.
^ okat. 2 Mokukwathela moshinima shika, omaukwanegumbo ogendji ohaga tula okompiuta yawo pehala mpoka tayi vulu okumonika kwaayehe. Kakele kaashono, omaukwanegumbo gamwe ohaga landa oprograma yokompiuta ndjoka hayi dhimi mo iinima mbyoka ya nyata. Ihe kapu na oprograma tayi vulu okwiinekelwa thiluthilu.
^ okat. 1 Opo wu mone uuyelele tawu longo nkene wu na okusinda uunkundi mbuka wokwiidhanena kiilyo yoluvalo, tala oshitopolwa shi li moAwake! yaNovomba 2006 shi na oshipalanyolo “Aagundjuka taya pula . . . Ongiini tandi vulu okusinda omukalondjigilile nguka?” nosho wo embo 1 Questions Young People Ask — Answers That Work, epandja 178-182.
