Oceha meerelo anananariha makupa oomunepani, yeerihaka wi muchu akhaleno moonelo onariipiha muupuwelo awe. * Yoowo onaceha onahaala owoona akina ntoko echu ya opakano mararuwo ni waakhwaniherya nchuno nawe. Wa achu yaawo okonihana honakhala nthowa na osivela, nyenya pahiru ohakalaliha soochuna sa mwiikho sa elukuluku vakhaani ni wiisoona okhala ootaphuwa mu nchuno na oraruwa. Nyenya otaphuwa iwo honamaliha elukuluku yincipale. Mweeparipari, ohiya wiipha soochuna sa mwiikho ntoko “ochapaheya, onyala, minkhela yonanara,” oceha onnaaceererya.—Akolose 3:5.

Murummwa Paulo oorepa: “N’riahuno nto malakano yala, ósiveliwa, niryeheryele mkhatihu otcharuwa yorípiha yothene ya mwíli ni ya munepa, ni oveliha mélelo ni omova Muluku.” (2 Akorinto 7:1) Wakhala wi onnoovilaani waakhwaniha masu ala, muhiceecheye. Yehova ti “óleva” ni ookhaviherya. (Salmo 86:5; Luka 11:9-13) Mweeparipari, yawuupuxerya-ya-murima yoohokola, ni wiilipixerya wi muhiye yookhovelela eyo—moohipwacha oceecheya wanyu—yawooniherya ya meerelo aphaama. Muupuwele tho wi “Muluku ti mutokwene opwaha mirimáhu anasuwelano sothe sene.” (1 Yohane 3:20) Muluku onnoona ohiya pahiru soocheka sahu; owo onnamoona muchu ntoko oothene. Woona wi oosuwela makhalelo ahu oothene, owo onnaniwiiriyana ni osivela vaavaa nnavekaahu ikharari sawe ni murima woothene. Mwa yeeyo, muhikhale oovelavela opaka mavekelo mwawiiyeviha ni mweeparipari, ntoko mwaana  onachawela wa atiithi awe wi aavye nikhaviheryo vaavaa onahooleleiye makacamiho. Yehova onahaala wooreelihaani ni yawuupuxerya-ya-murima yaphaama. (Salmo 51:1-12, 17; Yesaya 1:18) Mweeparipari, munaphwanela opaka soolakelela saphaama iniiwanana ni mavekelo anyu. Ntoko yootakiherya, munaphwanela wiilipixerya wi musepe makhalelo oothene a woona epwitikiri ophitaanyerya onthamwene woonanara. *

Wakhala wi mookhalano makacamiho mu ocharuwa oceha, ninnoovekaani wi muloce mwaha owo ni muhima anyu ori Mukiristu awiichwelavo, mutokweene a mmulokoni naari nthamwene anyu oororomeleya. *—Masiposipo 1:8, 9; 1 Atesalonika 5:14; Tito 2:3-5.