Go tsoša ditho tša pelego ke mokgwa woo o sa kgahlišego Modimo, wo o kgothaletšago boemo bja kgopolo bja go ikgotsofatša le go šilafatša monagano. * Motho yo a tsošago ditho tša pelego a ka gola a lebelela batho ba bangwe e le feela didirišwa tša dikopano tša botona le botshadi​—didirišwa tša go ikgotsofatša ka dikopano tša botona le botshadi. Kopano ya botona le botshadi go yena e ba selo seo se sa sepedišanego le lerato gomme o e lebelela e se bohlokwa e bile e fetoga mokgwa wa nakwana wa go ithabiša le go ikimolla kgatelelong ya tša botona le botshadi. Eupša kimollo yeo ke ya nakwana feela. Ge e le gabotse, go e na le go bolaya mekgwa yeo e lego dithong tša mmele, “e lego bootswa, go se hlweke, kganyogo e fošagetšego [le e sa swanelago] ya go robala ga monna le mosadi,” go tsoša dikganyogo tše di lego dithong tšeo.​—Bakolose 3:5.

Moapostola Paulo o ngwadile gore: “Baratiwa, . . . a re itlhwekišeng ditšhila tšohle tša nama le tša moya, re phethagatša bokgethwa ka go boifa Modimo.” (2 Bakorinthe 7:1) Ge e ba o thatafalelwa ke go kwa mantšu a, o se ke wa nolega moko. Jehofa o dula a “ikemišeditše go [go] lebalela” le go go thuša. (Psalme 86:5; Luka 11:9-13) Ge e le gabotse, pelo ya gago yeo e go ahlolago le maiteko a gago a go nyaka go kgaotša mokgwa wo, go sa šetšwe gore o fela o boela morago, a bontšha boemo bjo bobotse bja kgopolo. Le  gona, dula o gopola gore “Modimo ke yo mogolo go feta dipelo tša rena gomme o tseba dilo tšohle.” (1 Johane 3:20) Modimo o bona se fetago dibe tša rena; o bona dika ka moka tša motho. Ka ge a tseba dilo ka moka ka rena, a ka kgona go kwa ge re mo lopa go tšwa pelong re kgopela gore a re gaugele. Ka gona, le ka mohla o se ke wa lapa go retologela go Modimo ka boikokobetšo le ka thapelo e tšwago pelong, go swana le ngwana yo a yago go tatagwe ge a le mathateng. Jehofa o tla go nea letswalo le le hlwekilego. (Psalme 51:1-12, 17; Jesaya 1:18) Go ba gona, go nyakega gore o gate megato e nyakegago ka go dumelelana le dithapelo tša gago. Ka mohlala, o tla katanela go phema dibopego ka moka tša diswantšho tše di kgothaletšago bootswa gaešita le bagwera ba babe. *

Ge e ba bothata bja gago bja go tsoša ditho tša pelego bo tšwela pele, hle boledišana ka taba yeo le motswadi yo e lego Mokriste goba mogwera yo a godilego moyeng le yo lerato. *​—Diema 1:8, 9; 1 Bathesalonika 5:14; Tito 2:3-5.