Okuliseketa kononguvo ngatyina ulala nomunthu, otyituwa tyimwe tyasila tyinyona omutima nokuhindila omunthu okusoka vala kwe. * Omunthu una otyituwa otyo, tupu usoka okuti vakuavo valingwa vala pala okuhambukiswa ehando liokulinga otyihola. Omunthu oo, kalingi otyihola nohole, mahi utyilinga vala pala okutepulula ehando liae. Mahi, ehando olio kalitepuluka aliho. Otyituwa otyo, katyikuatesako omunthu okuipaa ononthele mbolutu “konthele youndalelapo, nesilo, nehando liotyihola,” mahi vitualako okuliyawisa.—Colossenses 3:5.

Apostolu Paulu wahoneka okuti: “Vakuatate, . . . tulisukulei esilo liovipuka aviho visilisa olutu no mopamphepo, opo tufuisepo ousukuke wetu nonthilo na Huku.” (2 Coríntios 7:1) Inkha okutavela onondaka ombo kuove katyapepukile, uhasoye. Jeova apeho “wafuapo pala okuevela” nokukuvatela. (Salmo 86:5; Lucas 11:9-13) Tyotyili, omutima walema nokulinga ononkhono mbokuyekapo otyituwa otyo, namphila ovikando vimwe nkhele upondola okutokelamo, tyilekesa okuti ove una ovituwa oviwa. Tupu hinangela okuti “Huku omunene vali tyipona omitima vietu iya wii ovipuka aviho.” (1 João 3:20) Huku katale vala kononkhali mbetu, utala etyi  omunthu atuwa. Mokonda wii atyiho konthele yetu, ututehelela nokankhenda tyina tumuita okankhenda. Moluotyo, uhasoye okulikuambela apeho ku Huku nomutima weliola, ngatyina omona apopia na he tyina ena ovitateka. Jeova mekuavela omutima wasukuka. (Salmo 51:1-12, 17; Isaías 1:18) Tyotyili, wesukisa okulinga omatokolo elikuata kumwe nomalikuambelo ove. Wesukisa okulinga ononkhono opo ulityilike okukala nomapanga omavi nokutala ovanthu vekahi muhoyo. *

Inkha otyitateka tyove tyokuliseketa kononguvo tyitualako, popia na ho ine na nyoko ine epanga wanoñgonoka nawa Ovihonekwa una esuko nove. * (Provérbios 1:8, 9; 1 Tessalonicenses 5:14; Tito 2:3-5)