ਹਥਰਸੀ ਦੀ ਆਦਤ ਪਰਮੇਸ਼ੁਰ ਦੀਆਂ ਨਜ਼ਰਾਂ ਵਿਚ ਗੰਦੀ ਆਦਤ ਹੈ। * ਇਸ ਆਦਤ ਦਾ ਸ਼ਿਕਾਰ ਬੰਦਾ ਆਪਣੀ ਹਵਸ ਪੂਰੀ ਕਰਨ ਬਾਰੇ ਹੀ ਸੋਚਦਾ ਹੈ ਅਤੇ ਦੂਸਰਿਆਂ ਨੂੰ ਵੀ ਕਾਮ-ਵਾਸ਼ਨਾ ਪੂਰੀ ਕਰਨ ਵਾਲੀ ਚੀਜ਼ ਸਮਝਦਾ ਹੈ। ਸੈਕਸ ਪਤੀ-ਪਤਨੀ ਵਿਚਕਾਰ ਪਿਆਰ ਦਾ ਇਜ਼ਹਾਰ ਕਰਨ ਦਾ ਜ਼ਰੀਆ ਹੁੰਦਾ ਹੈ, ਪਰ ਹਥਰਸੀ ਕਰਨ ਵਾਲਾ ਵਿਅਕਤੀ ਸੈਕਸ ਨੂੰ ਆਪਣੀ ਕਾਮ-ਵਾਸ਼ਨਾ ਸ਼ਾਂਤ ਕਰਨ ਅਤੇ ਪਲ ਭਰ ਦਾ ਮਜ਼ਾ ਲੈਣ ਵਾਲੀ ਚੀਜ਼ ਸਮਝਦਾ ਹੈ। ਅਜਿਹਾ ਵਿਅਕਤੀ “ਹਰਾਮਕਾਰੀ, ਗੰਦ-ਮੰਦ, ਕਾਮ-ਵਾਸ਼ਨਾ” ਉੱਤੇ ਕਾਬੂ ਪਾਉਣ ਦੀ ਬਜਾਇ ਹਥਰਸੀ ਰਾਹੀਂ ਇਨ੍ਹਾਂ ਦਾ ਗ਼ੁਲਾਮ ਬਣਦਾ ਹੈ।​—ਕੁਲੁੱਸੀਆਂ 3:5.

ਪੌਲੁਸ ਰਸੂਲ ਨੇ ਲਿਖਿਆ: “ਇਸ ਲਈ, ਪਿਆਰੇ ਭਰਾਵੋ, . . . ਆਓ ਆਪਾਂ ਤਨ ਅਤੇ ਮਨ ਦੀ ਸਾਰੀ ਗੰਦਗੀ ਤੋਂ ਆਪਣੇ ਆਪ ਨੂੰ ਸ਼ੁੱਧ ਕਰੀਏ ਅਤੇ ਪਰਮੇਸ਼ੁਰ ਦਾ ਡਰ ਰੱਖਦੇ ਹੋਏ ਪਵਿੱਤਰ ਬਣਦੇ ਜਾਈਏ।” (2 ਕੁਰਿੰਥੀਆਂ 7:1) ਜੇ ਹਥਰਸੀ ਦੀ ਆਦਤ ਕਰਕੇ ਤੁਹਾਨੂੰ ਇਸ ਸਲਾਹ ’ਤੇ ਚੱਲਣਾ ਮੁਸ਼ਕਲ ਲੱਗ ਰਿਹਾ ਹੈ, ਤਾਂ ਹੌਸਲਾ ਨਾ ਹਾਰੋ। ਦਿਆਲੂ ਹੋਣ ਕਰਕੇ ਯਹੋਵਾਹ ਮਾਫ਼ ਕਰਨ ਅਤੇ ਮਦਦ ਕਰਨ ਲਈ ਹਮੇਸ਼ਾ ਤਿਆਰ ਰਹਿੰਦਾ ਹੈ। (ਜ਼ਬੂਰਾਂ ਦੀ ਪੋਥੀ 86:5; ਲੂਕਾ 11:9-13) ਤੁਸੀਂ ਸ਼ਾਇਦ ਇਹ ਆਦਤ ਛੱਡਣ ਦੀ ਪੂਰੀ ਕੋਸ਼ਿਸ਼ ਕਰ ਰਹੇ ਹੋ, ਭਾਵੇਂ ਕਿ ਕਈ ਵਾਰ ਤੁਸੀਂ ਇਹ ਗੰਦਾ ਕੰਮ ਕਰ ਬੈਠਦੇ ਹੋ। ਇਸ ਹਾਲਤ ਵਿਚ ਜੇ ਤੁਹਾਡੀ ਜ਼ਮੀਰ ਤੁਹਾਨੂੰ ਲਾਹਨਤਾਂ ਪਾਉਂਦੀ ਹੈ, ਤਾਂ ਇਸ ਤੋਂ ਪਤਾ ਲੱਗਦਾ ਹੈ ਕਿ ਤੁਸੀਂ ਇਸ ਆਦਤ ਤੋਂ ਛੁਟਕਾਰਾ ਪਾਉਣਾ ਚਾਹੁੰਦੇ ਹੋ। ਯਾਦ ਰੱਖੋ, “ਪਰਮੇਸ਼ੁਰ ਸਾਡੇ ਦਿਲਾਂ ਨਾਲੋਂ ਵੱਡਾ ਹੈ ਅਤੇ ਸਭ ਕੁਝ ਜਾਣਦਾ ਹੈ।” (1 ਯੂਹੰਨਾ 3:20) ਯਹੋਵਾਹ ਸਾਡੀਆਂ ਗ਼ਲਤੀਆਂ ਹੀ ਨਹੀਂ ਦੇਖਦਾ, ਸਗੋਂ ਸਾਡੇ ਗੁਣ ਵੀ ਦੇਖਦਾ ਹੈ। ਇਸ ਕਰਕੇ ਉਹ ਸਾਡੀਆਂ ਬੇਨਤੀਆਂ ਵੱਲ ਕੰਨ ਲਾਉਂਦਾ ਹੈ। ਇਸ ਲਈ ਜਿਵੇਂ ਬੱਚਾ ਮੁਸੀਬਤ ਵਿਚ ਹੋਣ ਤੇ ਵਾਰ-ਵਾਰ ਆਪਣੇ ਪਿਤਾ ਕੋਲ ਜਾਂਦਾ ਹੈ, ਤਿਵੇਂ ਤੁਸੀਂ ਵੀ ਆਪਣੇ ਪਿਤਾ ਯਹੋਵਾਹ ਨੂੰ ਹਲੀਮੀ ਨਾਲ ਦਿਲੋਂ ਪ੍ਰਾਰਥਨਾ ਕਰਨ ਤੋਂ ਕਦੇ ਨਾ ਅੱਕੋ। ਯਹੋਵਾਹ ਤੁਹਾਨੂੰ ਸ਼ੁੱਧ ਜ਼ਮੀਰ ਬਖ਼ਸ਼ੇਗਾ। (ਜ਼ਬੂਰਾਂ ਦੀ ਪੋਥੀ 51:1-12, 17; ਯਸਾਯਾਹ 1:18) ਪਰ  ਤੁਹਾਨੂੰ ਪ੍ਰਾਰਥਨਾ ਕਰਨ ਦੇ ਨਾਲ-ਨਾਲ ਹੋਰ ਵੀ ਕੁਝ ਕਰਨ ਦੀ ਲੋੜ ਹੈ। ਮਿਸਾਲ ਲਈ, ਤੁਹਾਨੂੰ ਪੋਰਨੋਗ੍ਰਾਫੀ ਅਤੇ ਮਾੜੇ ਦੋਸਤਾਂ-ਮਿੱਤਰਾਂ ਤੋਂ ਦੂਰ ਰਹਿਣ ਦੀ ਲੋੜ ਹੈ। *

ਜੇ ਤੁਸੀਂ ਆਪਣੀ ਇਸ ਆਦਤ ਤੋਂ ਛੁਟਕਾਰਾ ਪਾਉਣ ਵਿਚ ਨਾਕਾਮਯਾਬ ਹੋ ਰਹੇ ਹੋ, ਤਾਂ ਕਿਰਪਾ ਕਰ ਕੇ ਆਪਣੇ ਮਸੀਹੀ ਮਾਪਿਆਂ ਜਾਂ ਕਿਸੇ ਸਮਝਦਾਰ ਦੋਸਤ ਨਾਲ ਗੱਲ ਕਰੋ। *​—ਕਹਾਉਤਾਂ 1:8, 9; 1 ਥੱਸਲੁਨੀਕੀਆਂ 5:14; ਤੀਤੁਸ 2:3-5.