Say masturbasyon et kagagawa ya pakapuyen toy espiritualidad na sakey, pagmaliwen ton makasarili, tan dutakan toy nonot to. * No say sakey et kagagawa to la itan, nayarin say pakanengneng to ed arum et singa labat kagawaan ya usaren pian napenek so seksual a pilalek. Parad sikato, say pisekso et aliwan balikas na panangaro, noagta paraan pian nalikna toy liket tan pian nibulos toy agnapokpokan a pampilalek to ed sekso. Balet temporaryo labat itan. Ta diad tua, agpateyen na masturbasyon iray kabiangan na laman no “nipaakar ed seksual ya imoralidad, karutakan, [tan] agnakontrol a pantintindek ed sekso.” Imbes, liingen to laingen iratan.—Colosas 3:5.

Oniay insulat nen apostol Pablo: “Inad-arok ya agagi, lapud walad sikatayo irayan sipan, linisan tayoy sarili tayo ed amin a karutakan na laman tan espiritu pian magmaliw itayon lalon masanto legan tayon tatakotan so Dios.” (2 Corinto 7:1) No nanairapan kan mangunor ed saya, agmo komon iisipen ya anggapo lay ilalom. Si Jehova et lanang ya ‘akaparaan a mamerdona’ tan ontulong. (Salmo 86:5; Lucas 11:9-13) Diad tua, say pakakakonsiensiam tan pansasagpot mon itunda la itan ya kagagawa—anggano sagpaminsan et nagagawaan mo ni—et pakapatnagan ya talagan labay moy manguman. Tandaan mo met a “say Dios et mas baleg nen say puso tayo tan amta to so amin a bengatla.” (1 Juan 3:20) Aliwan saray kasalanan tayo labat so nanenengneng na Dios. Nenengnengen to so interon inkatoo tayo. Lapud satan, natatalosan to tayo tan dedengelen  to itayo sano onkerew tayoy panangasi to. Agka onsasawan onasingger ed si Aman Jehova diad panamegley na masimoon tan mapaabeban pampikasim. Patulongan ka ed sikato a singa sakey ya ugaw ya onasingger ed ama to no walay problema to. Ikdan ka nen Jehova na malinis a konsiensia. (Salmo 51:1-12, 17; Isaias 1:18) Siempre, kaukolan moy onkiwas unong ed pikakasim. Alimbawa, gawam so anggaay nayarian mon paliisan so amin a klase na pornograpiya tan amin a mauges a kaulop. *

No siansian agmo nitunda itan ya kagagawa, ipangasim ya itongtong itan ed Kristianon ateng mo odino diad sakey a kaarom ya maespiritual. *—Proverbio 1:8, 9; 1 Tesalonica 5:14; Tito 2:3-5.