Karisia macundadi o femiandadi i un abitu ku ka ta kontenta Deus, tambi i ta leba kin ku ta pratikal na pensa so na satisfazi si diseẑu o pensa na kusas ku ka bali. Algin ku ta karisia macundadi o femiandadi pudi tambi pasa nkara utrus suma objetus di satisfazi prazer seksual. I pudi nkara seksu suma un atu di satisfazi prazer seksual pa un mumentu en ves di nkaral suma un spreson di amor entri dus jintis. Ma es prazer i so pa puku tempu. Na bardadi karisia macundadi o femiandadi ka ta juda algin na mata partis di kurpu na asuntu di “pekadu seksual, ku susidadi, ku diseẑu mau, ku vontadi forti” pa seksu, ma i ta alimental nan. — Kolosensis 3:5.

Apostulu Paulu fala: “Ermons ku N ama, suma ku no ten e purmesas, no limpa di tudu susidadi di kurpu ku di spiritu, pa no kompleta no santidadi ku rispitu pa Deus.” (2 Koríntius 7:1) Si i sta na sedu difisil pa bu aplika es palabras, ka bu pirdi speransa. Jeova sta sempri “pruntu pa purda” i pa judau. (Salmu 86:5; Lukas 11:9-13) Na bardadi, sintimentu di kulpa ku bu sforsu di larga ki abitu apesar di kuma bu pudi falia — ta mostra kuma bu tene un bon atitudi. Lembra tambi kuma “Deus i mas garandi di ki no korson. El i sibi tudu kusa.” (1 Jon 3:20) Deus ka ta konsentra na no pekadus ma i ta jubi pa kin ku no sedu. Suma i sibi tudu aserka di nos i pudi sinti pena i tene miserikordia di nos. Pa kila, ka bu kansa di fasi orason bu  konta Deus ke ku sta na fundu di bu korson, suma ku un mininu ta diriẑi pa si pape ora ki tene un purblema. Jeova na bensuau i bu na tene un konsiensia limpu. (Salmu 51:1-12, 17; Isaias 1:18) Sin duvida bu pirsisa tambi di toma mididas pratiku pa aẑi di akordu ku bu orasons. Pur izemplu, bu pudi sforsa pa ivita di tudu tipu di pornografia ku mau kumpañerasku. *

Si bu purblema di karisia macundadi o femiandadi kontinua, papia di kila ku bu papes o ku un amigu maduru na sintidu spiritual ku ta preokupa ku bo. * — Ditus 1:8, 9; 1 Tesalonisensis 5:14; Titu 2:3-5.