APÉNDICE
¿Imanötaq haqiyanman partenkunata kuparnin kikinkunapa munëninkunata ruraqkuna?
Partenkunata kuparnin kikinkunapa munëninkuna ruraqkunaqa, Teyta Dioswan alli këninkunatam oqrayan y kushikïninkunallata ashirmi pensëninkunata rakchatäyan. * Kë ruraqkunaqa wakinkunata rikar qallëkuyanman huk rato punukuriyänampaqtanö, yatapäkuyanapaqtanö, y munëninkunata rurar kushikuyänampaqtanöllam y manam majan kananta munartsu. Y tsënö yarpararqa kikinllam cuerponwan munëninta rurar qallëkun, y tsënöpam munapäkikanqanta rurarirnin kushikurin. Pero tsëta ruranqanqa huk rätollapaqmi. Partenkunata kuparnin kikinkunapa munëninkunata rurayaptimpis, manam ollquwan o warmiwan kë munëninkunataqa ushakätsintsu, sinöqa masmi yanapan warmiwampis ollquwampis punukïman y huk rakcha rurë hutsakunaman ishkinampaq (Colosenses 3:5).
Apóstol Pablum kënö qellqarqan: “Cuyashqa wauqicuna y panicuna, Teyta Diosnintsic tseno änimarnintsic nicamashqaqa juclaya shonquyoqna car, melanepaqcunata amana rurashuntsu, antis peta mantsacur respetarnin, almecuerpu mana jutsata rurashpa pellapaqna cawacushun” (2 Corintios 7:1). Melanëpaq rurëkunata mana rurashpa kawakïqa, wakinkunapaqqa manam fäciltsu, pero sinchikuyänanmi alli kaqta rurayänampaq, Jehová Diosqa “perdonamänapaq listom këkan” y yanapamänapaqpis (Salmo 86:5; Lucas 11:9-13). Mananam rurashaqnatsu nirirnimpis itsa yapë ishkiriyanman, tsëta rurarqa itsa penqakuyanman y llakikuyanman, pero tsënö sientikuyanqanmi rikätsikun rasumpëpa haqita munanqanta y Teyta Diosnintsikqa musyanmi sinchikïkäyanqanta. Y Palabran Bibliapis kënömi nimantsik: “Shonquntsicpitapis mas puedeqmi Diosnintsicqa” nishpa, tsëtam yarpänantsik (1 Juan 3:20). Manam hutsantsikllatatsu Diosnintsik rikan sinöqa alli kaqta ruranapaq sinchikïkanqantsiktapis rikanmi. Alleq reqimarnintsikmi, yanapamänapaq mañakushqapis listo këkan yanaparamänapaq. Tsëmi mana haqishpa mañakunantsik, huk wambra yanapanampaq teytanta imë hörapis mañakoqnö. Awmi, concienciantsiktapis Jehová Diosqa limpiaramonqam (Salmo 51:1-12, 17; Isaías 1:18). Pero manam mañakïllatsu, sinöqa mañakonqantsikmannömi ruranantsik, mana alli amïgokunapitam witikunantsik, tukïläya qalapacho nunakunata televisionchö, revistakunachö rikëpitam witikunantsik. *
Y huk joven tsë rakcha rurëta haqita mana puëdernenqa parlanan cristiano teytanwan (o mamanwan) o congregacionchö poqu cristiänowanmi (o cristiänawan) yanapanampaq (Proverbios 1:8, 9; 1 Tesalonicenses 5:14; Titu 2:3-5). *
^ par. 1 Partenkunata kuparnin kikinkunapa munëninkuna rurarqa pasëpam kushikuriyan hukwan punukïkaqnöraq.
^ par. 2 Wakinkunaqa computadörankunata y televisionninkunatapis churayashqa llapan rikäyänanmanmi, tsënöpa pakëllapa mana allikunata mana rikäyänampaq, y alli kaqllata rikänampaqmi teytankuna y mamankuna familiankunata willapäyan.
^ par. 1 Partenkunata kuparnin kikinkunapa munëninkuna rurëta [masturbación] haqiyänampaq yanapakïtaqa tarinki “Los jóvenes preguntan. ¿Cómo puedo superar este hábito?”, ¡Despertad! de noviembre 2006, nishqanchö, y Lo que los jóvenes preguntan. Respuestas prácticas, vol. 1, 178-182, päginakunachömi.
