E tu viivii tikai teia kia Iehova, e ko te tangata e rave ra i teia peu, te manako ua ra aia i te akanavenave iaia uaorai e ko te au mea viivii ua rai tana ka akamanako. Ko tetai ua atu e rave ana i te peu titoitoi e te tāmāiniini i tona mero ainga, e manako ana aia e e apinga tarekareka ua te tangata nana ei akamerengo i tona uaorai anoano tika kore. Kiaia, kare te ainga i akakoroia ei akaari anga inangaro i rotopu i te tane e te vaine mari ra, ei akamerengo i tona uaorai anoano tika kore. Kareka ra, e navenave poto ua to te reira. Ko te tika, kare te peu titoitoi e tamate i te anoano tika kore o “te akaturi [moeaana], te tuatua viivii, te anoano viivii,” ka akatupu mai rā te reira i te kaki ainga.​—Kolosa 3:5.

 Kua tata te apotetoro a Paulo e: ‘E aku au akaperepere e, e tamā ua tatou ia tatou uaorai i te au viivii katoa o te kopapa e te vaerua, ma te akaope marie i te akonoanga tapu i te mataku anga atu i te Atua.’ (2 Korinetia 7:1) Me te ngata ra ia koe i te akono i teia au tuatua, eiaa e taitaia. E tika ua ana ia Iehova kia akakore mai i te ara e kia tauturu mai. (Salamo 86:5; Luka 11:9-13) No te mea te akaapa ra toou akava ngakau ia koe e te tauta pakari ra koe i te takore i tera peu, te akaari maira teia i toou inangaro kia autu i te reira. E akamaara katoa e “e maata te Atua i to tatou ngakau, e kua kite aia i te au mea katoa nei.” (1 Ioane 3:20) Kare ko te ara anake ua ta te Atua e kite maira mari ra, ko te turanga tikai o te ngakau. I te mea e kua kite aia i te au mea ravarai no runga ia tatou, ka akarongo mai aia i ta tatou pure akatenga kia akara aroa mai ia tatou. No reira, auraka roa e akaroiroi i te pati akaaka kia Iehova kia tauturu mai ia tatou, mei tetai tamaiti rai e aere ana ki tona metua me rokoia e te manamanata. Ka oronga mai a Iehova i te akava ngakau meitaki noou. (Salamo 51:1-12, 17; Isaia 1:18) Ka anoanoia koe kia rave i te au mea taau e pati ra kia Iehova kia tau ki taau pure. Ei akaraanga, kia tauta pakari koe i te kopae takiri i te au tu peu viivii ravarai o te ainga, e kia kopae i te au kapitianga kino. *

Me kare e kore ana toou manamanata no runga i teia peu, tuatua atu ki tetai metua Kerititiano me kore ki tetai oa takinga meitaki i roto i te tuatua mou no runga i te reira. *​—Maseli 1:8, 9; 1 Tesalonia 5:14; Tito 2:3-5.