Pạrpạr ne ‘ot mua ne masturbation ta ag se leleit ne a‘fekea ‘Ạitu ka a‘häe ma ke se ‘on ‘ofa ‘e lelea‘ tū-täe ‘e ia ma iạ mane‘ȧk tape‘ma ‘os a‘häe. * Le‘et ne ‘oaf la pạrpạr ‘on mua täla ‘es ‘e räet ne lelea‘ ne tore ta—tē garueag se ag fak‘inoso se ia. Ne ag fak‘inoso täla tokana la sal het ne le‘ ruạ kel‘ạkia ‘oriạ hanisi ka sal het ne kop la fakfor la pō la hö‘ fürmariạ. Ka fürmariạ ta‘ag tē karạu. ‘I, ‘e ‘on la al‘ạkiạg ne fupag ne ‘on foro ‘e “mös ‘e‘eve ma ag se ma‘ma‘a, ma hea‘hea‘ rak­sa‘a,” manea‘ ne fupag ha‘a fupu e.—Kolosa 3:5.

Apostol ta Paula fȧ‘: “‘Ạus ne gou hanis sin, lelei ke la ‘is la a‘ma‘ma‘ạkia ‘is ‘e te‘ ne tē ‘atakoa ne a‘pearpear‘ạki e ‘os foro ma ‘os ‘ata, ma ‘atakoa‘ạkia ‘os ha‘ag ne ‘isa ‘e rēko ‘os fea se ‘Ạitu.” (2 Korinita 7:1) Kepoi ka a‘noa se ‘äe la tạupir se fäeag ‘i, ma se huạg ‘af‘af. Jihova noh “‘oaf la fạu‘ȧk ag raksa‘” ma hạiasoag tape‘ma. (Salamo 86:5; Luke 11:9-13) ‘Ou la fesiạ‘ȧk ne‘ou huga ma ‘ou fe‘eni la rou ag te‘is—aier ne av ‘on rereag ‘äe vil—iạ tē leleit. Ka a‘häe‘ȧk tape‘ma, ne “‘Ạitu ti‘uạg ‘e ‘os huga, ma iạ ‘inea te‘ ne tē ‘atakoa.” (1 Jone 3:20) ‘Ạitu ‘io ma sir ‘e ‘os ag raksa‘a; iạ räe se famör ‘atakoa ta. ‘E rēko ‘Ạitu ‘inea a‘lelei ‘is tē te‘is rē iạ la a‘fại ‘e hanisi se ‘os far tē. Se ravā ‘e ‘ou la far hạiasoag se ‘Ạitu ‘e huạg vạivại ma ro‘ạit marosi, la fak se ta le‘ mea‘me‘at ne la‘ se ‘on ö‘fā ‘e avat ne iạ agtạu ma pefä‘e. Jihova täla nā‘ia se ‘äea ta konsien ma‘ma‘at. (Salamo 51:1-12, 17; ‘Ạisea 1:18) Aier ne ‘ou ro‘ạit ta tạu la la‘oag‘esea ma tē ne ‘äe a‘soko. Kel‘ạkiạg het, ‘äe kop la fe‘en la matạ‘ ‘e te‘ ne kạinag mạl kelea‘efakina ma kạumane‘ag raksa‘a. *

Kepoi ka pạrpạr ne ‘ot mua kat pō ra la toak‘ȧk, fäeag se ta ö‘ rot fakKaristo ne ta le‘ ma‘at fak‘atat ma ta kạumane‘agat ne kokon‘ȧk aier ‘äe. *—Fäeag ‘Es Fuạga 1:8, 9; 1 Tesalonaika 5:14; Taito 2:3-5.